Elşən Həsənov: "Sülh danışıqları fayda verməyəcəyi təqdirdə, Azərbaycan məhz bu təlimlər sayəsində qazanılan təcrübə ilə öz ərazi bütövlüyünü bərpa edəcək"
Prezident, Silahlı Qüvvələrin Ali Baş Komandanı İlham Əliyevin təsdiq etdiyi plana əsasən, aprelin 16-dan qoşunların döyüşə hazırolma qabiliyyəti, qüvvə və vasitələrin idarə olunmasının təşkili, onların qarşılıqlı fəaliyyətinin yoxlanılması məqsədilə döyüş şəraitinə uyğunlaşdırılmış vəziyyətdə genişmiqyaslı təlimlər keçiriləcək.
Müdafiə Nazirliyinin mətbuat xidmətindən bildiriblər ki, təlimlərə 30 min nəfərədək şəxsi heyət, 250-dən artıq tank və zirehli texnika, 200-dək müxtəlif çaplı raket və artilleriya qurğusu, reaktiv yaylım atəş sistemi və minaatan, müxtəlif təyinatlı 25 döyüş aviasiyası, eləcə də yeni növ radioelektron kəşfiyyat vasitələri və pilotsuz uçuş aparatları cəlb olunacaq.
Təlimlər zamanı çətin relyef şəraitində müasir ümumqoşun döyüşü və əməliyyatların keçirilməsinin müxtəlif üsulları məşq etdiriləcək. Qəbul edilmiş qərara əsasən, qoşunların və idarəetmə məntəqələrinin əməliyyat təyinatı rayonlarına yerdəyişməsi, səfərbərlik ehtiyatlarının toplanılaraq təyinatı üzrə göndərilməsi, zərbə qruplaşmalarının yaradılması və müəyyən olunmuş istiqamətlərdə tətbiqi, döyüş aviasiyasının ehtiyat aerodromlarına köçürülməsi, eləcə də raket və artilleriya qoşunlarının ehtiyat atəş və start mövqelərinə çıxarılması icra olunacaq.
Təlimlər aprelin 21-dək davam edəcək.
Bu miqyasda keçiriləcək hərbi təlimin Qarabağ sülh prosesi üçün nə kimi əhəmiyyəti olacaq?
Ekspert Elşən Həsənov qəzetimizə bildirdi ki, Azərbaycan Silahlı Qüvvələrinin cəbhəyə yaxın bölgədə hərbi təlimlər keçirməsi işğalçı ölkəni çox narahat edir: "Ərazisinin bir hissəsi işğal vəziyyətində olan dövlətin hərbi təlim keçməsi və hərbi büdcəsini artırması, o cümlədən, xaricdən ən müasir silah-sursat alması müsbət bir haldır. Azərbaycan tərəfindən atılan bütün bu addımların hamısı ölkənin ərazi bütövlüyü və suverenliyinin bərpası mənafeyinə xidmət göstərir.
Keçiriləcək irimiqyaslı hərbi təlimlərin Azərbaycan Silahlı Qüvvələri üçün çox böyük önəmi var. Məşhur deyim var: "Təlimdə tər tökərsən, döyüşdə az qan itirərsən". Bu təlimlər kiçikmiqyaslı deyil, irimiqyaslı təlimlərin keçirilməsi isə Azərbaycan üçün yalnız faydalı olacaq. Çünki Dağlıq Qarabağ münaqişəsi hələ də həllini tapmayıb. Azərbaycan Ordusunun gücü danışıqlar prosesində özünü göstərəcək. Azərbaycan Silahlı Qüvvələrinin gücünü görən həm düşmənin havadarları, həm də Ermənistan çox ciddi təşviş keçirir. Əgər onlar normal düşünməyi bacarırsa, Ali Baş Komandan, Prezident İlham Əliyevin dəfələrlə Azərbaycan ərazisində ikinci erməni dövlətinin yaradılmasına icazə verilməyəcəyi ilə bağlı bəyanatını çox ciddi qəbul etməlidir. Sülh danışıqları fayda verməyəcəyi təqdirdə, Azərbaycan məhz bu təlimlər sayəsində qazanılan təcrübə ilə öz ərazi bütövlüyünü bərpa edəcək".
Ekspert rəyindən də görünür ki, 30 minlik ordunun hərtərəfli təlimləri status-kvo məsələsini süni şəkildə uzadan Ermənistan və onun havadarlarına ciddi bir mesajdır. Başqa sözlə desək, Azərbaycan sülh danışıqlarını davam etdirməklə paralel, ordunu gücləndirməklə müharibə variantını ən aktual mövqelərdə saxlayır.
Məhəmmədəli QƏRİBLİ