Qabil Hüseynli: "Bu, Azərbaycanın Avropaya inteqrasiya məsələlərində, həm də bütövlükdə Avropa-Azərbaycan əlaqələrinin dərinləşməsində böyük rol oynayacaq"
Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev Azərbaycanla Avropa İttifaqı arasında vizaların ləğv edilməsinin mümkünlüyü ilə bağlı məsələyə münasibət bildirib. O, açıqlamasında deyib ki, Avropa İttifaqı ilə Azərbaycan arasında əməkdaşlıq çərçivəsində Aİ tərəfindən Azərbaycan vətəndaşlarına münasibətdə vizaların ləğv edilməsi müzakirə mövzularından biridir.
"Aİ ilə Azərbaycan arasında vizaların sadələşdirilməsi və readmissiya haqqında saziş artıq bir neçə ildir qüvvədədir. Sözügedən saziş çərçivəsində uğurlu əməkdaşlıq viza məsələsi ilə əlaqədar müzakirələrin növbəti yeni mərhələyə çıxarılmasına əlverişli zəmin yaradır", - deyə XİN sözçüsü vurğulayıb.
O əlavə edib ki, vizaların ləğv edilməsi məsələsinə Azərbaycan və Aİ arasında danışıqlar aparılan yeni tərəfdaşlıq sazişi çərçivəsində baxılması da istisna deyil.
Qeyd edək ki, aprelin 25-də Bakıda Azərbaycanla Aİ arasında yeni strateji tərəfdaşlıq sazişi ilə bağlı danışıqların ilk raundu keçiriləcək.
Bu danışıqların nəticəsi vizasız gediş-gəlişi reallaşdıra bilərmi?
Politoloq Qabil Hüseynlinin sözlərinə görə, Aİ ilə Azərbaycan arasında yeni münasibətlər əməkdaşlığın səviyyəsini yüksəltməyi nəzərdə tutur: "Burada ən mühüm məqam Aİ ilə Azərbaycan arasında gediş-gəliş vizasının xeyli asanlaşdırılması, ya da tamamilə aradan qaldırılması məsələləri olacaq. Bu həm də qarşılıqlı ticarət əlaqələrinin dərinləşməsini ehtiva edir. Ümidvaram ki, bu görüşlərin nəticəsi olaraq Aİ ilə Azərbaycan arasında vizasız gediş-gəliş rejimi tətbiq ediləcək. Bu, Azərbaycanın Avropaya inteqrasiya məsələlərində, həm də bütövlükdə Avropa-Azərbaycan əlaqələrinin dərinləşməsində böyük rol oyanayacaq.
Yaxın zamanlarda Bakı-Tiflis-Qars dəmir yolu işə düşəcək. Həmçinin bu da Avropa ilə əlaqələrin genişlənməsində böyük rol oynayacaq. Bundan başqa, Avropaya qaz ötürülməsi prosesi bu il başa çatacaq. Yəni Azərbaycanın Avropaya töhfəsi çoxdur. Bu baxımdan Avropa tərəfi də Azərbaycana yəqin ki, sürpriz hazırlayır. Bu sürpriz vizasız gediş-gəliş ola bilər".
Politoloq hesab edir ki, münasibətlərin yeni mərhələsində Qarabağ məsələsinin də yer alması üçün Azərbaycanın özü aktiv olmalıdır: "Postsovet məkanındakı bütün münaqişələr eyni ssenari üzrə başlayır və əsas detonator Moskva olur. Separatçı hərəkətlar ocağı sonradan münaqişələrə çevrilir. Azərbaycan tərəfi bu məsələdə Avropa ilə güclü iş aparmalıdır. Avropadakı məsələlərə ikili standartlarla yanaşmanın axırına çıxmalıdır. Postsovet məkanındakı bütün münaqişələrə eyni məntiqlə yanaşmalıdırlar. Bizim xarici siyasət idarəmizin qarşısında duran əsas vəzifələrdən biri budur".
Məhəmmədəli QƏRİBLİ