Elşən Mustafayev: "Gücü çatmayanda isə həmin amillə sona qədər mübarizə aparıb"
Rusiya prezidenti Vladimir Putin deyib ki, Rusiya istər ölkə daxilində, istərsə də Kollektiv Təhlükəsizlik Müqaviləsi Təşkilatı ölkələrində "rəngli inqilab"larla mübarizə aparacaq: "Biz bilirik ki, dünyanın müxtəlif regionlarında həyata keçirilən müxtəlif nəzəriyyələr həmin regionlarda sabitliyi ciddi şəkildə pozur. Əlbəttə, buna oxşar heç nəyin yaranmasına imkan verməməliyik. Rusiyada müvafiq tərzdə özümüzü aparmağa çalışacaq və Kollektiv Təhlükəsizlik Müqaviləsi Təşkilatı üzrə tərəfdaşlarımıza istənilən formada dəstək verəcəyik".
Qeyd edək ki, fevralda Rusiya müdafiə naziri Sergey Şoyqu "rəngli inqilab"lar coğrafiyasının genişlənməsi təhlükəsinin mövcud olduğunu deyib. Onun fikrincə, bunun qarşısını ancaq səyləri birləşdirməklə almaq mümkündür.
Xatırladaq ki, KTMT-yə Rusiya, Belarus, Ermənistan, Qazaxıstan, Qırğızıstan və Tacikistan daxildir.
Putinin bu açıqlaması KTMT-yə üzv olan ölkələri mühafizə etməklə yanaşı, həm də qurumda təmsil olunmayan dövlətləri mühüm təhlükələrdən sığortalanmaq üçün KTMT-yə cəlb etmək istəyindən irəli gələ bilərmi?
AMİP funksioneri Elşən Mustafayev qəzetimizə açıqlamasında bildirdi ki, Rusiyanın orbitində yaradılan bəzi qurumlar formal xarakter daşıyır: "MDB, KTMT kimi adlar çəkiləndə dərhal beyinlərdə Rusiya assosiasiya olunur. Rusiyanın istəyinə gəldikdə isə, həmin ölkə bütün vasitələrlə öz maraqlarını qorumaqda israrlıdır. Putin bu tip açıqlamaları əvvəl də verib. Hətta əməllərində də göstərib ki, Rusiya onun təmsil olunduğu ittifaqlarda olmayan ölkələrdə belə hər hansı "məxməri inqilab"ın baş verməsinə imkan verməyib. Gücü çatmayanda isə həmin amillə sona qədər mübarizə aparıb. Məsələn, Qırğızıstanda belə bir hadisə baş verdi, ancaq sonra ora Rusiyanın istədiyi adam rəhbər gəldi. Bir sözlə, demək olar ki, Rusiya marağı olan istənilən ölkədə ona sərf edən hakimiyyətlərin dəyişməsini istəmir və bunun uğrunda sona qədər mübarizə aparır. Suriya bəyəm KTMT-yə aiddir? Görürsünüz ki, Rusiya hətta hüdudlarından çox uzaqda olan ölkədə belə öz maraqlarını qoruyur, hətta müharibəyə belə girişir. Putinin son bəyanatı isə daha çox "rəngli inqilab"ları etmək istəyənlərə ünvanlanıb. Demək istəyir ki, bunu edən qarşısında Rusiyanı görəcək. Aydındır ki, bu bəyanat ora girmək istəməyən ölkələrin fikrini dəyişməsinə səbəb olmayacaq. Çünki Rusiya belə cəhdləri çox edib, amma nəticəsiz olub. İstənilən halda, Putin bununla demək istəyir ki, heç kim onun təsir dairələrinə müdaxilə etməsin".
Məhəmmədəli QƏRİBLİ