Arzu Nağıyev: "Qondarma "soyqırım" etirafı ilə bağlı ermənilər yəqin ki, bu dəfə də məyus ola bilər"
24 aprel tarixi yaxınlaşdıqca, ermənilər yenə qulaqlarını ABŞ prezidentinin ağzına tuşlamalı olacaq. Çünki adəti üzrə onlar hər il dəridən-qabıqdan çıxırlar ki, ABŞ prezidentləri bir kəlmə də olsun "soyqırım" ifadəsi işlətsin. İndi də bu gözləntilər Trampdandır. Qeyd edək ki, Barak Obama da ənənəvi çıxışlarında 1915-ci il hadisələrini "soyqırım" adlandırmayıb. O, ermənicə "böyük fəlakət" mənasını verən "meds yegern" kəlməsindən istifadə edib.
Qeyd edək ki, Birinci Dünya Müharibəsi zamanı Osmanlı dövlətinin şərq vilayətlərində ermənilər xarici qüvvələrin təhriki ilə silahlı üsyan qaldırıblar. Silahlı erməni dəstələri yerli hakimiyyət nümayəndələrinə, dinc əhaliyə hücumlar edərək kütləvi qırğınlar törədiblər, infrastrukturu məhv etməyə çalışıblar. Müharibə gedərkən dövlətə arxadan vurulan bu zərbəni neytrallaşdırmaq üçün Osmanlı hökuməti erməni əhalinin imperiyanın ucqarlarına (indiki Suriya və Livan ərazilərinə) köçürülməsi barədə qərar qəbul edib. Köç zamanı epidemiyalar, xəstəliklər nəticəsində yolda müəyyən sayda erməni ölüb.
Ermənilər isə bu hadisələri "soyqırım" kimi qələmə verərək Türkiyədən böyük təzminat tələb edirlər.
Ermənilərin Trampdan gözlədikləri reallaşa bilərmi?
Ekspert Arzu Nağıyev qəzetimizə açıqlamasında bildirdi ki, cənab Tramp bütün ABŞ prezidentlərindən fərqli olaraq, erməni və digər diaspor üzvlərinin maliyyə dəstəyindən öz seçki kampaniyasında istifadə etməyən yeganə prezidentdir: "Bu baxımdan həmin o qurumlar təsir mexanizminə malik deyil. Türk dünyası ilə hər hansı bir qarşıdurma yaradılmasının da əleyhinə olan cənab Tramp və onun komandası öz NATO tərəfdaşına qarşı belə addım atmaqdan çəkinər. Yəni qondarma "soyqırım" etirafı ilə bağlı ermənilər yəqin ki, bu dəfə də məyus ola bilər.
Maraqlı bir məqam da odur ki, Tramp bir prezident kimi əsasən iqtisadi məsələləri, terrorla mübarizə və bununla da dövlətin təhlükəsizliyini mühüm amil sayan bir siyasətçi imicini saxlamağa çalışır. Qondarma "soyqırım" etirafı isə bu proseslərə kölgə sala bilər".
Məhəmmədəli QƏRİBLİ
