Parlament seçkiləri başa çatdıqdan sonra Ermənistanda daxili ziddiyyətlərin daha da dərinləşməsi müşahidə edilməkdədir. Əvvəla, müxalif qüvvələr yeni qanunverici orqanın legitimliyini tanımır. Digər tərəfdən, hakimiyyətdə məmurlar arasında müəyyən vəzifələrlə bağlı ziddiyyətlərin gedərək daha da dərinləşməsi müşahidə olunur.
Artıq məlumdur ki, "Ohanyan-Raffi-Oskanyan" bloku yeni parlamenti tanımayacağını bəyan edib. Blokun seçkiqabağı qərargahının rəhbəri, "İrs" partiyasının sədr müavini Armen Martirosyan bildirib ki, Ermənistanda qeyri-legitim parlament seçilib: "Hazırda ölkədə nə dövlət maraqlarını müdafiə edə, nə Dağlıq Qarabağ məsələsində irəliləyişə nail ola, nə də iqtisadi sahədə islahatlar həyata keçirə biləcək qanunsuz formalaşmış hakimiyyət var. Əsas siyasi proseslər parlamentdən kənarda qalıb". Ermənistanın eks-prezidenti Levon Ter-Petrosyan da vurğulayır ki, ölkə tamamilə korrupsiyaya bulaşmış dövlət məmurlarının, hüquq-mühafizə orqanları, monopolist biznesmenlər və kriminal avtoritetlərin əlindədir: "Artıq mötərizələri açmaq vaxtı çatıb. Ölkə tamamilə korrupsiyaya bulaşmış dövlət məmurlarının, hüquq-mühafizə orqanları, monopolist biznesmenlər və kriminal avtoritetlərin əlindədir. Məhz bunlar kölə statusunda olan xalqın taleyini əllərində saxlayır, bütün qanunsuz yollarla öz mövcudluqlarını qoruyurlar. Təəccüblüsü odur ki, 1988-ci ildə sovet tiraniyasına qarşı qalxan xalqı necə diz çökdürə biliblər. Bu yalnız Ermənistanda 2000-ci illərin əvvəlində hakimiyyətə gələn quldur rejimin xalqı mütləq yoxsulluğa məhkum etməsi ilə mümkün olub". Beləliklə, real vəziyyət göstərir ki, əsas müxalif qüvvələr parlamentin legitimliyini tanımır və ona qarşı mübarizəni davam etdirməyi düşünür. Aydındır ki, bu hal qarşıdakı dövrdə ölkə daxilində ziddiyyətləri də tətikləyəcək.
Daha bir məqam odur ki, hakimiyyətin öz daxilində də vəziyyət sabit deyil. Belə ki, "Jamanak" qəzetinin yazdığına görə, Serj Sarkisyan Ermənistan parlamentinin sədri vəzifəsinə öz adamını təyin etməyə çalışır: "Bu günlərdə parlament sədrliyinə namizədlər aktiv müzakirə edilir. İndiyə qədər ən inandırıcı namizəd baş nazir Karen Karapetyanın adamı, rusiyalı oliqarx Samvel Karapetyan sayılırdı. Lakin bizdə olan məlumatlara görə, Serj Sarkisyan artıq bütün parlament rəhbərliyini "gəncləşdirmək" qərarı qəbul edib. O, bütün əsas postlara öz adamlarını təyin edəcək. Nəticədə hazırkı vitse-spiker Eduard Şarmazanov parlament sədri, Armen Aşotyan isə hakim Respublika Partiyasının parlamentdəki fraksiyasının rəhbəri olacaq". Bununla belə, Sarkisyanın istəyi ilə baş nazir Karen Karapetyan razı deyil və o, Moskvadan aldığı dəstəklə Samvel Karapetyanı spiker görmək istəyir. Belə vəziyyət isə prezidentlə baş nazir arasında münasibətləri daha da gərginləşdirir. Amma spiker postuna "Daşnaksütyun" Partiyası da iddia edir. "İravunk" qəzeti yazır ki, daşnaklar Aqvan Vardanyanın parlament sədri olmasını istəyir.
Hələlik isə əsas diqqət prezidentlə baş nazirin savaşına yönəlib. Belə vəziyyətdə Sarkisyan Karapetyana qarşı mövqelərini gücləndirmək üçün xarici işlər naziri Edvard Nalbandyanı da vəzifəsindən uzaqlaşdırmağa hazırlaşır. Çünki Nalbandyan da Rusiyanın adamı sayılır və Karapetyana dəstək verir. "Jamanak" qəzeti isə yazır ki, Sarkisyan israrla Nalbandyanı postundan uzaqlaşdırmaq, onun yerinə isə hazırkı müdafiə naziri Vigen Sarkisyanı gətirmək istəyir. Qəzet mənbələrə istinadən qeyd edir ki, müdafiə naziri postunda Vigen Sarkisyanı Ermənistanın polis rəisi Vladimir Qasparyan əvəz edəcək. Onu da qeyd edək ki, Vigen Sarkisyan Serj Sarkisyanın varisi hesab olunur. Təsadüfi deyil ki, parlament seçkilərində hakim Respublika partiyasının namizədlər siyahısına məhz o rəhbərlik edirdi. Aprel döyüşlərində məğlubiyyətdən sonra prezident Rusiyaya yaxın Seyran Ohanyanı istefaya göndərdi, əvəzində Vigen Sarkisyanı gətirdi. Vigen Sarkisyanın xarici siyasət idarəsinə rəhbərlik edəcəyinə dair informasiyalar ABŞ Mərkəzi Kəşfiyyat İdarəsinin "kölgəsi" hesab olunan "Stratfor" mərkəzinin araşdırmalarında da yer alır: "Moskva İrəvanda təsir dairəsini gücləndirmək üçün Sarkisyanın aparatında müxtəlif gücləri ələ alır. İnformasiyalar var ki, xarici işlər naziri Edvard Nalbandyan Rusiya ilə ailə əlaqələrinə malikdir. Lakin Moskva üçün yeni müdafiə naziri Vigen Sarkisyan əlverişli görünmür". Elə bu səbəbdən baş nazir Karen Karapetyan da Vigen SarkisyanA və beləliklə həm də Serj Sarkİsyana qarşı çıxır. Bu vəziyyət də öz növbəsində Ermənistan daxilində qarşıdurmanı daha da gücləndirir və o üzdən tezliklə burada ziddiyyətlərin daha açıq müstəviyə keçməsi tamamilə gözlənilən hal sayılır.
Tahir TAĞIYEV