Məhəmməd Əsədullazadə: "Aİ Azərbaycanın ərazi bütövlüyünü tanıdığını rəsmən sazişdə göstərməlidir"
Bakıda aprelin 25-də Avropa İttifaqı (Aİ) ilə Azərbaycan arasında strateji tərəfdaşlıq sazişi üzrə danışıqların birinci mərhələsi keçiriləcək. Bunu Avropa İttifaqının Azərbaycandakı nümayəndəliyindən bildiriblər.
Danışıqlarda iştirak etmək üçün "Şərq tərəfdaşlığı" məsələləri, Rusiya, Mərkəzi Asiya üzrə əməkdaşlıq, regional əməkdaşlıq və ATƏT məsələləri üzrə Avropa xarici siyasət xidmətinin direktoru Lyuk Devin Azərbaycana gələcək.
Məlumata görə, eyni vaxtda Ermənistanla da danışıqlar aparılacaq. Bir növ, bu məsələdə Azərbaycanla Ermənistana paralel yanaşırlar. Halbuki, Azərbaycanın nüfuzu, regionda bir sıra parametrlərə görə çəkisi, rolu Ermənistanla müqayisəolunmaz dərəcədə böyükdür. Ən başlıcası isə, Azərbaycan Aİ üçün daha böyük əhəmiyyət kəsb edir, nəinki Ermənistan. Belə olan halda, bərabər yanaşma təəccüb doğurur.
Bir məqamı da xüsusi qeyd etmək lazımdır ki, Azərbaycanla Aİ arasında strateji tərəfdaşlıq sazişi imzalamaq üçün rəsmi Bakının başlıca şərti ölkənin ərazi bütövlüyünün tanınmasıdır. Yəni bu məqam sazişdə konkret olaraq öz əksini tapsın. Ancaq Ermənistan, təbii ki, bunun əleyhinə olacaq.
Aİ Azərbaycanın ərazi bütövlüyünü sazişə daxil etmək məsələsində sonadək necə mövqe tutacaq? Ermənistanın etirazına saymaz yanaşacaqmı?
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin sözlərinə görə, Aİ Cənubi Qafqaz siyasətində əsasən təhlükəsizlik məsələsinə deyil, siyasi məsələlərə önəm verir: "Avropa İttifaqı Cənubi Qafqaz ölkələrinə xüsusi önəm verməkdədir. Təəssüf ki, Aİ Cənubi Qafqaz siyasətində əsasən təhlükəsizlik məsələsinə deyil, siyasi məsələlərə önəm verir. Hesab edirəm ki, təhlükəsizlik məsələsi Aİ-nin siyasətində prioritet olmalıdır və Ermənistan-Azərbaycan münaqişəsi ilə əlaqədar beynəlxaq hüquq çərçivəsində işğalçı ölkəyə qarşı fərqli siyasət yürütməlidir. Aİ-nin Ermənistanla eyni səviyyədə Azərbaycanla da danışıqları hesab edirəm ki, qurumun ikili standartlarından irəli gəlir. Təbii ki, burada Avropanın siyasi təşkilatlarında erməni lobbisinin fəaliyyəti Azərbaycana qarşı belə bir siyasətin formalaşmasında mühüm rol oynayır. Azərbaycan Aİ-yə Ermənistandan daha vacibdir. Çünki regionun əsas dövləti olaraq, Avropanın enerji təhlükəsizliyində mühüm rol oynayır. TAP və TANAP layihələri Avropanın enerji sektorunun şaxələndirilməsində mühüm əhəmiyyət kəsb edir. Azərbaycanın iqtisadi tərəfdaşı məhz Aİ-dir. Ermənistan isə Avrasiya İttifaqının üzvü olaraq, heç bir potensiala malik deyil. Qeyd edim ki, Aİ Qarabağ münaqişəsinin həllində Azərbaycana tam dəstək verməli, Ermənistana qarşı siyasətində dəyişiklik edərək, Avropanın ümumi təhlükəsizliyi üçün Ermənistana təzyiqlər etməlidir. Qarabağ münaqişəsi uzandıqca, Avropanın cənub sərhədlərində təhlükəsizlik risq altında qalacaq. Aİ çalışır ki, Azərbaycanla siyasi əlaqələrini genişləndirsin. Hesab edirəm ki, bu vacibdir. Amma Aİ də bizim ərazi bütövlüyümüzün təmin olunması üçün gərəkən addımları atmalıdır. Aİ Azərbaycanın ərazi bütövlüyünü tanıdığını rəsmən sazişdə göstərməlidir".
Vidadi ORDAHALLI