Seyid Camal Əzimbəyli: "İnanclı kəsimin ibadəti üçün hər cür şərait yaradılıb"
Azərbaycan müstəqillik qazandıqdan sonra ölkədə dini, milli və mədəni dəyərlərə, müxtəlif dinlərin, millətlərin mədəniyyətlərinə tolerantlıq nümunəsi göstərilib. Azərbaycanda dövlətin din sahəsində həyata keçirdiyi siyasətin başlıca məqsədi bu sahədə mövcud olan qanunvericiliyin tələblərinə riayət olunmasının təmin edilməsi, dini tolerantlıq mühitinin qorunub saxlanmasıdır.
SSRİ dövründə Azərbaycanda cəmi 17 məscid fəaliyyət göstərirdisə, 2017-ci ilin əvvəlinə onların sayı 2166-ya çatıb. Hazırda ölkədə 306 məscid dövlət tərəfindən tarixi abidə kimi qorunur. 1993-2003-cü illər ərzində ölkədə 517 məscid inşa olunub, 200-ə yaxın məsciddə əsaslı təmir işləri aparılıb, 16 məscid yenidən qurulub. Dövlət vəsaiti hesabına 1998-ci ildə Bibiheybət məscid-ziyarətgah kompleksinin yenidən qurulmasına başlanıb və 1999-cu ildə rəsmi açılışı olub. 2003-2016-cı illər ərzində ölkədə 219 məscid inşa və əsaslı təmir olunub. Dövlət vəsaiti hesabına 12 məscid tikilib və ya əsaslı şəkildə bərpa edilib.
Ümumilikdə, müstəqillik dövründə Azərbaycanda məscidlərlə bağlı yeridilən siyasət ictimaiyyətin, dövlətin və inanclı insanların maraqlarına uyğun olub. Bununla bağlı bəzi tənqidi fikirlərin, təbii ki, məntiqi əsası yoxdur. Bütövlükdə, müstəqillik dövründə məscidlərlə bağlı yeridilən siyasət nə dərəcədə qənaətbəxş hesab olunur?
Məsələyə münasibət bildirən şərqşünas Seyid Camal Əzimbəylinin sözlərinə görə, müstəqillik dövründə məscidlərlə bağlı yeridilən siyasət qaneedici səviyyədə olub: "İki keçid dövrünün adamı olaraq əminliklə bunu deyirəm. Çünki sovetlər dönəmində bu sahədə vəziyyət tamamilə fərqli idi. Müstəqillik dövründə yüzlərlə məscid tikilərək istifadəyə verildi. İnanclı kəsimin ibadəti üçün hər cür şərait yaradılıb. Bu hər bir inanclı ölkə vətəndaşının uğuru olmaqla yanaşı, həm də dövlətin uğurudur. O baxımdan dövlətin inanclı insanların dini duyğularını nəzərə alaraq məscidlərlə bağlı yeritdiyi siyasət düzgün qurulub. Eyni zamanda, bu yöndə yeridilən siyasət təqdir olunasıdır. Həmçinin, bu sevindirici haldır. Çox üzücü haldır ki, bəziləri nəyisə əndazədən çıxarmağa çalışır. Azərbaycandakı birlik və bərabərliyi, dini dözümlülüyü sarsıtmağa çalışırlar. Təbii ki, belə cəhdlər yolverilməzdir. Azərbaycanda dövlətin din siyasətini, məscidlərlə bağlı əməli fəaliyyətini birmənalı olaraq təqdir edirəm".
Vidadi ORDAHALLI