Vüqar Qədirov: "Çox güman ki, Bişkekdə də Ermənistanın istəyi ürəyində qalmış olacaq"
Aprelin 14-də Kollektiv Təhlükəsizlik Müqaviləsi Təşkilatına (KTMT) üzv dövlətlərin rəhbərlərinin Bişkekdə qeyri-formal görüşü keçiriləcək. Bu barədə Kremlin sözçüsü Dmitri Peskov deyib. O, həmçinin, Bişkekdə Avrasiya İqtisadi İttifaqının da iclasının keçiriləcəyini açıqlayıb. Lakin Kremlin sözçüsü toplantılarda konkret nələrin müzakirə ediləcəyi haqda məlumat verməyib.
Avrasiya İqtisadi İttifaqında Belarus, Ermənistan, Qazaxıstan, Qırğızıstan və Rusiya təmsil olunur. KTMT-də isə Belarus, Ermənistan, Qazaxıstan və Qırğızıstanla yanaşı, Tacikistan da yer alır.
Bişkek toplantısı KTMT-yə yeni sədrin seçilməsi baxımından əhəmiyyətlidir. Təşkilatın keçmiş sədri Nikolay Bordyuja səlahiyyətlərini bu ilin 1 yanvar tarixində müavini Valeri Semerikova həvalə etdi. Halbuki, KTMT-yə sədr ötən ilin oktyabr ayında İrəvanda keçirilən toplantıda seçilməli idi. Əlifba sırasına görə yeni sədr Ermənistandan olacaqdı. İrəvan üçün KTMT-yə baş katibin erməni olması iki aspektdən önəmlidir. Birinci şans ötən ilin oktyabrında İrəvanda keçirilən toplantıda yaranmışdı. Hətta Ermənistanın namizədləri də hazır idi. Lakin Qazaxıstan prezidenti Nursultan Nazarbayev xəstələndiyini əsas gətirərək, İrəvana gəlməkdən imtina etdi. Təşkilata üzv dövlətlərin birinin rəhbərinin iştirak etməməsi baş katib seçkisinin təxirə salınması deməkdir və beləliklə, ermənilərin ilk ümidləri boşa çıxdı.
İkinci şans ötən ilin dekabrında Sankt-Peterburqda keçirilən toplantıda yarandı. Belə ki, İrəvan rus torpaqlarında arzusuna nail olacağına əmin idi. Bu dəfə isə Belarus prezidenti Aleksandr Lukaşenko Ermənistanın arzusunu gözündə qoydu. Lukaşenko ölkəsində dövlət çevrilişi təhlükəsinin olduğunu əsas gətirərək, toplantıya qatılmadı.
İrəvan üçün üçüncü imkan yaranıb. Bişkekdə KTMT-yə yeni baş katibin seçilməsi nəzərdə tutulur. Ermənistan aprelin 14-də məqsədinə nail ola biləcəkmi?
Ekspert Vüqar Qədirovun sözlərinə görə, KTMT-nin nizamnaməsi Ermənistanın bu postu icra etməsinə çoxdan imkan verir: "Ancaq görürsünüz ki, bu proses iki dəfədir təxirə düşür. Deyilən qurum faktiki olaraq Rusiyanın nəzarətindədir. Ermənistanın nümayəndəsinin KTMT-yə baş katib seçilə bilməməsi quruma üzv olan dövlət başçılarının fərqli vaxtlarda iclasa qatılmaması ilə bağlı olub. Burada təsadüf axtarmaq yersiz olar. Fikrimcə, bütün bu prosedur pozuntuları Rusiyanın diqtəsilə baş tutub. Çünki Ermənistan KTMT adı ilə dəfələrlə Azərbaycanı şantaj edib. Halbuki, Dağlıq Qarabağdakı münaqişəyə qarışmağa KTMT-nin heç bir səlahiyyəti yoxdur. Görünür, Ermənistanın sədrliyi Rusiyanın ürəyincə deyil. Çox güman ki, Bişkekdə də Ermənistanın istəyi ürəyində qalmış olacaq".
Məhəmmədəli QƏRİBLİ