Fikrət Sadıqov: "Prezidentin işlətdiyi fikirlər beynəlxalq təşkilatlar üçün də ciddi mesajdır"
Azərbaycan Prezidenti İlham Əliyev Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında deyib ki, ilin birinci rübündə də Dağlıq Qarabağ münaqişəsinin həlli diqqət mərkəzində olub:
"Ermənistan-Azərbaycan, Dağlıq Qarabağ münaqişəsi ölkəmizin ərazi bütövlüyü çərçivəsində həll olunmalıdır. Postsovet məkanında mövcud olan digər münaqişələrdən fərqli olaraq, BMT Təhlükəsizlik Şurası bu münaqişə ilə bağlı dörd qətnamə qəbul edib. O qətnamələr bəllidir, bütün dünya bunu bilir, erməni işğalçı qüvvələri işğal edilmiş torpaqlardan dərhal və qeyd-şərtsiz çıxarılmalıdır. Bax, budur əsas prinsip və bu prinsipdən kənarda heç bir başqa məsələ müzakirə oluna bilməz.
Onu da qeyd etməliyəm ki, Ermənistanın bütün cəhdlərinə baxmayaraq, onların qeyri-konstruktiv və qeyri-səmimi siyasəti artıq qınaq obyektinə çevrilib. Onlar nə qədər tez danışıqlar masasına qayıtsalar, onlar üçün bir o qədər yaxşı olacaq. Çünki Azərbaycan gündən-günə güclənir, möhkəmlənir, həm siyasi, həm hərbi, həm iqtisadi potensialımız artır və gec-tez biz bu məsələni istədiyimiz kimi ədalətli həll edəcəyik.
Birinci rübdə Ermənistan-Azərbaycan, Dağlıq Qarabağ münaqişəsi ilə bağlı bir neçə hadisəni qeyd etmək istəyirəm. Birincisi, Dağlıq Qarabağda keçirilən qondarma "referendum"u qeyd etmək istəyirəm. Bu "referendum"un keçirilməsi ilə Ermənistan özünü bir daha biabır və ifşa etdi. Mən bir dəfə demişəm və bir daha demək istəyirəm ki, onlar orada nə qədər çox qanunsuz "referendum" keçirsələr, bu bir o qədər çox bizim xeyrimizə işləyir. Çünki bütün qonşu ölkələrimiz, Minsk Qrupuna həmsədrlik edən ölkələr, Avropa İttifaqı və bir çox ölkələr dərhal bu "referendum"u pislədilər. Bəyan etdilər ki, bu "referendum"u tanımırlar və Dağlıq Qarabağ Azərbaycanın ayrılmaz hissəsidir.
Əslində, bu "referendum"un keçirilməsi ilə onlar bütün ölkələri bu həqiqəti bir daha təkrar etməyə sövq etdilər. Əlbəttə ki, bütün beynəlxalq aləm bu "referendum"u qəbul etməməklə bizim ərazi bütövlüyümüzə və Ermənistan-Azərbaycan, Dağlıq Qarabağ münaqişəsinin məhz bu prinsip əsasında həll edilməsinə öz dəstəyini göstərmiş oldular".
Prezident vurğulayıb ki, Ermənistan danışıqları dayandırmağa çalışır, ancaq buna nail ola bilməyəcək. Ölkə başçısının Dağlıq Qarabağla bağlı beynəlxalq təşkilatlara verdiyi mesajların nə kimi əhəmiyyəti ola bilər?
Politoloq Fikrət Sadıqovun sözlərinə görə, dövlət başçısı tək müşavirələrdə yox, daim Ermənistanın qeyri-konstruktiv, azğınlaşmış mövqeyini açıqlayır və tənqid edir: "Prezident Ermənistanın mövqeyini tənqid edərkən konkret faktlar və sübutlar gətirir. Ermənilər başa düşür ki, beynəlxalq hüquq normalarına zidd siyasət aparırlar. Artıq Ermənistanın daxilində hakimiyyət əleyhinə qüvvələr formalaşıb, çıxışlar edir. Ölkə daxilində partiyalar, bloklar və sağlam düşüncəli siyasətçilər anlayır ki, Dağlıq Qarabağ münaqişəsi həll olunmayana qədər bu, Ermənistanın maraqlarına zərbədir. Buna görə də danışıqlar nəticəsində razılığa gəlmək lazımdır. Bizim mövqeyimiz sağlamdır. Torpaqlarımız işğal altındadır və bütün vasitələrdən istifadə edib onu azad etməyə hazırıq. Əgər ermənilər istəyirsə burunları qanamasın və vəziyyətdən sağ-salamat çıxsınlar, gərək işğal edilmiş ərazilərin azad edilməsinə başlasınlar. Dağlıq Qarabağın statusu ilə bağlı danışıqlar davam edəcək və bu zaman bir sıra məqamları nəzərə ala bilərik. Təbii ki, Prezidentin işlətdiyi fikirlər beynəlxalq təşkilatlar üçün də ciddi mesajdır. Yəqin ki, onlar vəziyyətin ciddi xarakter aldığını nəzərə alıb daha təsirli addımlar atmağa çalışacaq".
Məhəmmədəli QƏRİBLİ