Elşən Mustafayev: "Ümid edirəm ki, yaranan bu problem öz həllini tapacaq"
Rusiya Ədliyyə Nazirliyinin azərbaycanlıların böyük diaspor təşkilatlarından biri olan Ümumrusiya Azərbaycanlıları Konqresinin (ÜAK) dövlət qeydiyyatının ləğvi üçün Ali Məhkəməyə müraciət etməsi bu qurumun fəaliyyətinə son qoyulması təhlükəsinin olduğundan xəbər verir.
Azərbaycanın Diaspor Komitəsi, ayrı-ayrı deputatlar, siyasi ekspertlər məsələ ilə bağlı münasibətini, narahatlığını bildirib.
Milli Məclisin Hüquq siyasəti və dövlət quruculuğu komitəsinin sədri, MM-in Rusiya Dövlət Duması ilə dostluq qrupunun rəhbəri Əli Hüseynli deyib ki, ÜAK-a Rusiya Ədliyyə Nazirliyindən sənədlərin qaydaya salınması ilə bağlı üç dəfə müraciət olunub: "Sonuncu dəfə 2016-cı ilin oktyabr ayında müraciət edilib. 2016-cı ilin dekabr ayında ÜAK-ın qurultayı keçirildi və Fazil Qurbanov sədr seçildi. Bu qurultayda sənədlərdə düzəlişlərin edilməsi üçün müvafiq işlərin görülməsinə başlandı. Amma çox təəssüf ki, bu ilin mart ayında Rusiya Ədliyyə Nazirliyi ÜAK-ın ləğvi tələbi ilə Ali Məhkəməyə müraciət etdi. Mən bir hüquqşünas kimi qeyd etməliyəm ki, Rusiya qanunvericiliyində sənədlərin düzgün olmaması ilə bağlı 3 addım nəzərdə tutulur. Bunlardan biri xəbərdarlıq, ikincisi cərimə və yalnız sonuncusu ləğvetmədir. Amma çox maraqlıdır ki, sonuncu addımı ilk addım kimi atmaq barədə qərar verilir.
Çox istərdim ki, bu məsələyə siyasi yox, hüquqi cəhətdən yanaşaq. Mən ad çəkmək istəmirəm, amma Azərbaycandakı rus icmasının sənədlərində də çatışmazlıqlar var. Buna baxmayaraq, bizim tərəfdən heç vaxt ləğvetmə ilə bağlı məsələ qaldırılmayıb. Çünki bu, hüquqi sistemdə ən sonuncu addımdır. Əminəm və ümidvaram ki, Ali Məhkəmə Ədliyyə Nazirliyinin bu müraciətini rədd edəcək".
Azərbaycan rəsmisinin bu eyhamını Rusiyaya ünvanlanan bir mesaj kimi də dəyərləndirmək olar. Hətta belə başa düşülür ki, Azərbaycandakı rus icmasının da sənədlərində olan çatışmazlıqlar nəzərdən keçirilə bilər.
Rusiya ÜAK-ın bağlanması ilə bağlı qərar verəcəyi təqdirdə, Azərbaycan hansı adekvat addımları ata bilər?
AMİP-in beynəlxalq əlaqələr katibi Elşən Mustafayevin sözlərinə görə, ÜAK-ın bağlana biləcəyi ilə bağlı yayılan məlumatlar çox narahatedicidir: "Doğrudur, bu məsələ elə də asan deyil. Rusiya Ədliyyə Nazirliyi hələ elə bir qərar qəbul etməyib və bunu edəcəyini də konkret söyləməyib. Hər hansı texniki problemlərin olduğu söylənir. Amma məsələnin özünün gündəliyə çıxması heç də baş verə biləcək yaxşı hadisələrdən xəbər vermir. Hesab edirəm ki, Azərbaycan bu məsələyə ehtiyatla yanaşaraq, oradakı diaspor nümayəndələrimizə Rusiya qanunlarının yol verdiyi həddə dəstək verməlidir. Bilirsiniz ki, ÜAK bir diaspor təşkilatıdır və adətən dünyada belə təşkilatlar həmin dövlətlərin öz vətəndaşlarından ibarət xalqların, millətlərin nümayəndələrindən formalaşır. Mədəni, etnik kimliklərini, adət-ənənələrini saxlamaq, şəbəkələşmək, nəticə olaraq vətəndaşı olduqları dövlətin siyasi, ictimai, iqtisadi həyatında iştirak etmək imkanlarını genişləndirmək üçün bu çox yaxşı vasitədir. İndiki məqamda da, ehtiyac olarsa, məsələyə yalnız dövlət başçısı səviyyəsində, o da qeyri-rəsmi şəkildə müdaxilə edilməlidir. Ümid edirəm ki, yaranan bu problem öz həllini tapacaq. Çünki Rusiya ərazisində yaşayan ən çoxsaylı millətlərdən birinin böyük bir diaspor təşkilatını bağlamaqda maraqlı olmayacaq".
Məhəmmədəli QƏRİBLİ