Məhərrəm Zülfüqarlı: "Növbəti saxtakarlığın qarşısını almaq üçün səyləri birləşdirmək lazımdır"
Ermənistanın hakim dairələri gizlətmir ki, başqa millətlərə mənsub tarixi irsi məhv etmək onu UNESCO-nun Qeyri-maddi mədəni irs siyahısına salmaqdan daha asandır. Reallıq ondan ibarətdir ki, Ermənistan ərazisində yerləşən və erməni mədəniyyətinə aid olmayan bütün tarixi abidələr bu aqibəti yaşayıb. Ötən müddət ərzində ermənilər orada olan tarixi alban abidərini saxtakarcasına öz adına çıxır. Qədim türk abidələrini isə vandalcasına məhv ediblər. Bununla bağlı xeyli sayda fakt mövcuddur.
Bu arada erməni mətbuatının yazdığına görə, Ermənistan 2018-ci ilin sentyabrında Nyu-Yorkun məşhur "Metropoliten" muzeyində sərgi keçirməyə hazırlaşır. Erməni tərəfi iddia edir ki, sözügedən muzeydə qədim dövrdən 17-ci əsrə qədər ermənilərin qədim mədəni irsinə aid incəsənət nümunələri nümayiş olunacaq. Ermənilərin niyə məhz 17-ci əsrə qədərki dövrü əhatə edən incəsənət nümunələrini göstərmək istədiyi bəlli deyil. Heç şübhəsiz ki, həmişə olduğu kimi, gələn il keçirilməsi planlaşdırılan tədbirdə də erməni saxtakarlığı özünü göstərəcək. Şübhə yoxdur ki, bu sərgidə həm Azərbaycanın, həm də bütünlüklə türk dünyasının haqqına qəsd edən, onu mənimsəyən müəyyən incəsənət nümunələri nümayiş etdiriləcək. Tarixi saxtalaşdırmaq üzrə ixtisaslaşan ermənilərin bu cəhdinin qarşısını almaq, ya heç olmasa zərərsizləşdirmək üçün nə etmək lazımdır?
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, erməni saxtakarlığı uzun illərdir davam etdiyi üçün, biz nəyisə gözləməməliyik: "Biz adətən öyrəşmişik ki, hansısa saxtakarlıq olandan sonra ona cavab verək. Hesab edirəm ki, bu taktikadan əl çəkib özümüz hücuma keçməliyik. Yəni onları beynəlxalq aləmdə ifşa etmək, tarixi saxtalaşdırdıqlarını dünyaya göstərmək üçün özümüz tədbirlər keçirməliyik. Gözləməməliyik ki, ermənilər nəsə etsin, ondan sonra onlara qarşı hansısa tədbirlər görək. Hesab edirəm ki, artıq bu istiqamətdə işlər gedir. Diaspor, Heydər Əliyev Fondu xətti ilə və həm də araşdırmaçıların özlərinin səyləri nəticəsində işlər görülür. Növbəti saxtakarlığın qarşısını almaq üçün səyləri birləşdirmək lazımdır. Bütün bunlarla yanaşı, ermənilər dünyaya göstərmək istəyirlər ki, guya qədim xalqdırlar. Ona görə də on yeddinci əsrə qədər olan dövrü götürüblər".
Vidadi ORDAHALLI