Tağı Qəmbərov: "Bu qənaətə gəlmək olar ki, Azərbaycanın tətbiq etdiyi mexanizm öz müsbət bəhrəsini verib"
Fransadan olan sərbəst reportyor Roman Myelkarek Xarici İşlər Nazirliyinə (XİN) məktubla müraciət edərək jurnalist fəaliyyətini həyata keçirmək məqsədilə Azərbaycanın Ermənistan tərəfindən işğal olunmuş ərazilərinə səfər üçün akkreditasiya olunmasını və icazə verilməsini xahiş edib.
XİN-dən verilən məlumata görə, R.Myelkarek Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyinə, qanunlarına hörmət etdiyini bildirib. O, gələcəkdə Azərbaycanın işğal olunmuş ərazilərinə qanunsuz səfərlərdən çəkinəcəyinə dair zəmanət verib və xarici KİV nümayəndələrinin akkreditasiyası üçün nəzərdə tutulmuş müvafiq anket formasini təqdim edib.
R.Myelkarekin bu müraciəti, Azərbaycanın qanunlarına riayət və hörmət etməsi nəzərə alınaraq, onun adı arzuolunmaz şəxslər siyahısına salınmayıb.
Qeyd edək ki, 3-7 mart 2017-ci il tarixlərində Roman Myelkarek Azərbaycanda olub, cəbhə bölgəsinə səfər edib, qaçqın və məcburi köçkünlərlə görüşüb, münaqişə ilə əlaqədar Azərbaycanın mövqeyi barədə məlumat alıb. 19-20 mart tarixlərində isə Azərbaycanın Ermənistan tərəfindən işğal olunmuş ərazilərinə səfər edib.
"Bu hal Azərbaycan tərəfinin ölkəmizin qanunlarına, ərazi bütövlüyü və suverenliyinə hörmətlə yanaşan, jurnalist etikasına və obyektivliyinə zidd olaraq Azərbaycanın işğal olunmuş ərazilərində yaradılmış qondarma rejimin birtərəfli təbliğatı ilə məşğul olmayan beynəlxalq media nümayəndələri, bloger və ya sərbəst reportyorlarla konstruktiv əməkdaşlığının növbəti nümunəsidir", - deyə, XİN-dən bildirilib.
Fransalı reportyorun bu addımını necə dəyərləndirmək olar?
Hüquqşünas Tağı Qəmbərov qəzetimizə bildirdi ki, bu artıq Azərbaycanın diplomatik qələbəsi sayıla bilər: "Artıq belə hallar sübut edir ki, Dağlıq Qarabağ ərazisi sırf Azərbaycana məxsusdur və orada qurulan qondarma rejimin heç bir legitimliyi yoxdur. Fransalı jurnalistin bu addımı atması bir daha sübut edir ki, Azərbaycanın beynəlxalq hüquqa əsaslanaraq atdığı addımlar öz bəhrəsini verməyə başlayıb. Xüsusilə də bu hal Lapşinin ölkəmizə ekstradisiyasından sonra daha ciddi xarakter almağa başladı. Azərbaycan qabaqlar da deyilən ərazilərə qanunsuz səfər edənlərin adını "qara siyahı"ya salırdı. Ancaq həmin əməllərə görə kiminsə konkret məsuliyyətə cəlb olunmaması bir qədər sərbəstlik yaradırdı. Bəziləri fikirləşirdi ki, bu prosedur formal xarakter daşıyır. Ancaq dünyanın ən nüfuzlu ölkələrinin vətəndaşlığını daşıyan bir blogerin başqa bir dövlətdə tutulub Azərbaycana təhvil verilməsi, hazırda onun həbsdə saxlanması bu məsələnin ciddiliyinə şübhə yeri qoymayıb. Bundan əvvəl bir neçə nəfər müraciət edərək, səhvlərini anladıqlarını deyib, Azərbaycandan onların adının "qara siyahı"dan çıxarılmasını xahiş edib. Bu qənaətə gəlmək olar ki, Azərbaycanın tətbiq etdiyi mexanizm öz müsbət bəhrəsini verib".
Məhəmmədəli QƏRİBLİ