Xəzər Teyyublu: "Hər iki bəyanatda səslənən fikirlər yetərli deyil, ümumi mənanı özündə cəm edir, bundan əvvəlkilərdən heç nə ilə fərqlənmir"
Fransanın ATƏT yanındakı daimi nümayəndəliyinin ötən il aprelin 2-dən 5-nə kimi münaqişə zonasında baş verən hərbi əməliyyatların dayandırılmasının 1 illiyi ilə bağlı bəyanatında deyilir: "Fransa bir daha əmin olduğunu bildirir ki, Dağlıq Qarabağla bağlı hazırkı status-kvo dayanıqlı deyil və münaqişənin hərbi yolla həlli yoxdur".
Bəyanatda bildirilir ki, ATƏT-in Minsk Qrupunun həmsədri kimi, Fransa digər həmsədr ölkələr olan Rusiya və ABŞ-la birlikdə atəşkəsin yenidən bərpası və Azərbaycanla Ermənistan arasında danışıqların bərpası üçün çalışıb: "Fransa tərəfləri ötən il mayın 16-da Vyanada və iyunun 20-də Sankt-Peterburqda yüksək səviyyədə götürülmüş öhdəlikləri, xüsusilə atəşkəs rejiminə hörmət, etimad tədbirlərinin gücləndirilməsi və danışıqların bərpası ilə bağlı razılaşmalara hörmət etməyə çağırır. Fransa prezidentinin Azərbaycan və Ermənistandan olan həmkarları ilə Parisdə keçirdiyi son görüşlərində də dediyi kimi, Fransa bütün regionun rifahı və stabilliyi naminə münaqişənin danışıqlar yolu ilə davamlı həllinə sadiqdir".
Rusiya Xarici İşlər Nazirliyi (XİN) də aprel döyüşləri ilə bağlı bəyanat yayıb. Rusiya XİN-in rəsmi nümayəndəsi Mariya Zaxarova keçirdiyi brifinqdə ATƏT-in Minsk Qrupu həmsədrləri və beynəlxalq təşkilatlar tərəfindən Dağlıq Qarabağ regionunda, Ermənistan-Azərbaycan sərhədində, qoşunların təmas xəttində aprel eskalasiyasından sonra vəziyyətin stabilləşməsi üçün aktiv səylər göstərildiyini bildirib.
Onun sözlərinə görə, həmsədrlər və digər vasitəçilər tərəflərin danışıqlar prosesinə qayıtması üçün əllərindən gələni ediblər: "2016-cı ilin Vyana və Sankt-Peterburq sammitləri bu münaqişənin nizamlanmasına həsr olunub. Ümid edirik ki, tərəflər danışıqlar masasına qayıdacaq, dayanıqlı nizamlanmaya istiqamətlənən dialoqu bərpa edəcəklər".
M.Zaxarova bu istiqamətdə işin davam etdirildiyini də bildirib.
İki həmsədr ölkənin aprel hadisələrinin bir illiyi ilə bağlı verdiyi bəyanatı yetərli saymaq olarmı?
Klassik Xalq Cəbhəsi Partiyasının sədr müavini Xəzər Teyyublu qəzetimizə açıqlamasında bildirdi ki, hər iki bəyanat onu verən ölkələrin bundan qabaqkı mövqeyindən heç nə ilə fərqlənmir: "Ancaq onların vasitəçiliyi ilə keçirilən danışıqlar nəticəsində sülhün təmin olunmasından danışılır. Dönə-dönə vurğulanır ki, prosesin hərbi yolla həlli ola bilməz. Əvvəlcə aprel döyüşlərinin niyə baş verdiyinə aydınlıq gətirilməli idi. Sonra qeyd olunmalı idi ki, həmin hadisələrdən sonra Ermənistan konstruktiv olmaq əvəzinə daha da azğınlaşıb. Yenə dialoqun vacibliyi qeyd edilir, amma bildirilmir ki, Ermənistan heç bir səbəb olmadan danışıqlar prosesini tərk edib. Status-kvonun belə qalmasının qəbuledilməz olduğu da heç bir bəyanatda bildirilmir. Bunlar sanki formalizm naminə hər bir yeni məsələ ilə bağlı eyni məzmunlu bəyanat verir. Hesab edirəm ki, hər iki bəyanatda səslənən fikirlər yetərli deyil, ümumi mənanı özündə cəm edir, bundan əvvəlkilərdən heç nə ilə fərqlənmir. Həmsədrlərin bu cür obyektiv olmayan mövqeyi Azərbaycanı öz torpaqlarını müharibə gücü ilə azad etməyə səsləyir".
Məhəmmədəli QƏRİBLİ