Qabil Hüseynli: "Azərbaycanın indiki halda güzəştə gedəcəyi nəsə yoxdur"
Rusiyanın xarici işlər naziri Sergey Lavrov "Bakinskiy raboçiy" qəzetində iki ölkə arasında diplomatik münasibətlərin 25 illiyinə həsr olunan məqaləsində bildirib ki, Rusiya Dağlıq Qarabağ probleminə böyük diqqət ayırmağa davam edir.
S.Lavrov qeyd edib ki, Rusiya regiona sülhün və sakitliyin qayıtmasında, insanların ölməməsində, sərhədlərin açılmasında, iqtisadi mübadilənin bərpa olunmasında maraqlıdır: "Bunun üçün mümkün olanı edirik. Vasitəçilik missiyasını tək, eləcə də ATƏT-in Minsk Qrupunun digər həmsədr ölkələri olan ABŞ və Fransa ilə birgə həyata keçiririk. Vasitəçilərin sayəsində tərəflər bir çox mübahisəli məqamlarla bağlı mövqelərini yaxınlaşdırmağa nail olublar. Əsasən münaqişənin nizamlanmasının baza prinsipləri razılaşdırılıb. Lakin Azərbaycan və Ermənistan bunun həyata keçirilməsi ardıcıllığını fərqli görürlər. Bununla əlaqədar bizim vəzifəmiz tərəflərə balanslı həlli tapmağa kömək etməkdən ibarətdir".
S.Lavrov ümid etdiyini bildirib ki, Bakı və İrəvan qarşılıqlı güzəştə hazır olmaları barədə siyasi iradə göstərə biləcək: "Bu, danışıqlar prosesinin nəticəli olması üçün vacibdir. Əlbəttə ki, irəliyə getməyin əsas şərti münaqişə zonasında gərginliyin azaldılması, münaqişənin hərbi yolla həllindən imtina etməkdir. Rusiya da, öz növbəsində, bütün cəlb olunmuş tərəfləri qane edən problemin həlli variantını dəstəkləməyə, razılıq əldə olunacağı təqdirdə digər vasitəçilərlə birlikdə nizamlanmanın zəmanətçisi olmağa hazırdır".
Göründüyü kimi, Lavrov yenidən qarşılıqlı güzəşt məsələsini ortaya atmaqla məsuliyyəti hər iki ölkənin üzərinə qoyub. Lavrov Bakı və İrəvan üçün hansı qarşılıqlı güzəştdən danışır?
Politoloq Qabil Hüseynlinin sözlərinə görə, Lavrovun fikirləri əvvəlki mövqeyindən heç nə ilə fərqlənmir: "Dəfələrlə vurğulamışıq ki, Dağlıq Qarabağ probleminin nizama salınması ilə bağlı məsələ birbaşa Rusiyanın əlindədir. Yəni onların konfliktin nizama salınması istiqamətində göstərə biləcəyi həqiqi səylər ciddi nəticə verə bilər. Çox təəssüflər olsun ki, bu illər ərzində biz Rusiyadan belə konkret addımlar görmədik. Lavrov bu problemin anatomiyasını hamıdan gözəl bilir. Xəstəliyin necə müalicə olunması yollarından da məlumatlıdır. Hiss olunan budur ki, Rusiya problemin həllində deyil, konservləşdirilməsində maraqlıdır. Faktiki olaraq Azərbaycanın torpağı işğal edilib. Ermənistan bütün təzyiqlərə baxmayaraq, danışıqlara gəlmir. Azərbaycan Prezident səviyyəsində gedə biləcək kompromisləri açıqladı, hətta Dağlıq Qarabağa ən yüksək statuslu muxtariyyətin verilə biləcəyini bildirdi. Ermənistanın bunların da fonunda səsi çıxmırsa, yaxşı olar ki, Lavrov güzəşt tələbilə bağlı istiqaməti düz seçsin. Azərbaycanın indiki halda güzəştə gedəcəyi nəsə yoxdur".
Məhəmmədəli QƏRİBLİ