Elşən Mustafayev: "Get-gedə prosesin sülh yolu ilə nizama salınmasına inam azalır"
Rusiyanın xarici işlər naziri Sergey Lavrov bildirib ki, həmsədrlərin vasitəçiliyi ilə rəsmi Bakı və İrəvan Qarabağ probleminin həlli istiqamətində mövqelərini əhəmiyyətli dərəcədə yaxınlaşdırıb: "Regiona sülhün qayıtmasında, orada insanların ölümünün sona çatmasında, sərhədlərin açılmasında, iqtisadi əlaqələrin bərpasında səmimi olaraq maraqlıyıq.
Bunün üçün əlimizdən gələn hər şeyi edirik. Həm fərdi, həm də ATƏT-in Minsk Qrupunun həmsədr ölkələri - Fransa və ABŞ-la birgə həmsədrlik missiyamızı yerinə yetiririk. Həmsədrlərin vasitəçiliyi ilə tərəflər arasında bir sıra mübahisəli məsələlər üzrə mövqeləri yaxınlaşdırmaq mümkün olub. Münaqişənin həlli üzrə baza prinsipləri artıq razılaşdırılıb".
Eyni zamanda Lavrov vurğulayıb ki, Azərbaycan və Ermənistan göstərilən baza prinsiplərinin həyata keçirilməsi ardıcıllığını fərqli formada görür: "Bununla əlaqədar əsas məsələ tərəflərə balanslı həll yolunu tapmaqda yardım etməkdir. Hesab edirik ki, Bakı və İrəvan siyasi iradə, kompromisə getməyə hazır olmalarını nümayiş etdirə biləcəklər. Bu, danışıqlar prosesində nəticənin olması üçün lazımdır".
Onun sözlərinə görə, irəliləyiş üçün ən əsas şərt münaqişə zonasında gərginliyin azaldılması və onun həlli üçün güc yolundan istifadə etmək cəhdindən imtinadır: "Öz növbəsində Rusiya münaqişəyə cəlb olunan bütün tərəflərə sərf edəcək problemin həlli variantını dəstəkləməyə, razılıq əldə olunacağı təqdirdə isə digər həmsədr ölkələrlə birgə nizamlanmanın qarantı kimi çıxış etməyə hazırdır".
Lavrovun həmsədrlərin səyi ilə Bakı və İrəvanın Qarabağ probleminin həlli istiqamətində mövqelərinin əhəmiyyətli dərəcədə yaxınlaşması kimi fikrini nə dərəcədə əsaslı saymaq olar?
Milli İstiqlal Partiyasının funksioneri Elşən Mustafayev qəzetimizə açıqlamasında bildirdi ki, Lavrovun bu açıqlamasındakı səmimiyyətə inanmır: "Onun Dağlıq Qarabağ münaqişəsilə bağlı bütün fikirlərinə xronoloji ardıcıllıqla nəzər yetirilsə məlum olar ki, məntiqi baxımdan eyni məqamları söyləyir. Lavrov nə deməlidir? Özünə, təmsil etdiyi ölkənin missiyasına əlavə sual yaranmasın deyə, belə optimist ruhlu bəyanatlar verir. Ancaq biz həm Azərbaycan, həm də Ermənistan rəsmilərinin səsləndirdiyi bəyanatları onun fikirlərilə tutuşduranda, kəskin təzad görürük. Faktiki olaraq Ermənistanın nümayiş etdirdiyi qeyri-konstruktivlik ucbatından sülh danışıqları dalana dirənib. Ermənistan hətta sülh danışıqlarına qayıtmaq istəmirsə, hansı yaxınlaşmadan danışa bilərik? Kənardan mövqelərdə yaxınlaşma hiss edilmir. Azərbaycan ən böyük güzəştləri belə açıqladı. Ermənistanın heç bir reaksiyası olmadı. Demək ki, get-gedə prosesin sülh yolu ilə nizama salınmasına inam azalır. Bu baxımdan da Lavrovun son açıqlamasını protokol xarakterli saya bilərik".
Məhəmmədəli QƏRİBLİ