Məhəmməd Əsədullazadə: "Orada düzgün seçkinin keçirilməsindən söhbət gedə bilməz"
Ermənistanda keçirilən seçkilərdən sonra ceparatçı Qarabağ klanı parlament üzərində nəzarətini gücləndirdi. 2 aprel parlament seçkisinin nəticəsindən fərqli heç nə çıxmadı. Prezident Serj Sarkisyanı sərt tənqid edən hər iki müxalif bloku parlamentdən kənarda qaldı. Halbuki, müxalifət adına keçirdikləri mitinqlərdə kifayət qədər etirazçı toplaya bilirdilər. Buna baxmayaraq, hakimiyyətlə bir çox dəyərləri bölüşdürən "Çiçəklənən Ermənistan" və "Daşnaksütyun" partiyaları müxalifət adı ilə parlamentə düşdülər.
Beləliklə, Ermənistan parlamentində partiya kimi yalnız hakim Respublika Partiyası və "Daşnaksütyun" təmsil olunmaq hüququ qazanıb. Respublika Partiyası seçicilərin 49,12 faizinin, "Daşnaksütyun" isə 6,57 faizinin səsini toplayıb. Blok qismində isə parlamentdə 27,32 faiz səs toplamış "Tsarukyan" və 7,77 faiz səs toplamış "Yelk" ("Çıxış") blokları təmsil olunacaq.
Qeyd edək ki, parlamentdə təmsil olunmaq üçün partiyalar ən azı 5, bloklar isə 7 faiz səs qazanmalıdır. Beləliklə, əsas müxalif qüvvələr sayılan, Ermənistanın ilk prezidenti Levon Ter-Petrosyanın rəhbərlik etdiyi Ermənistan Milli Konqresi və 1999-cu ildə parlamentdə atışmada öldürülən spiker Karen Dəmirçyanın oğlu Stepan Dəmirçyanın başçılıq etdiyi "Xalq" partiyasının birgə təmsil olunduğu blok (1,65 faiz) və sabiq müdafiə naziri Seyran Ohanyan, 1991-1992-ci illərdə Ermənistanın xarici işlər naziri olmuş Raffi Ovanisyan və 1998-2008-ci illərdə xarici siyasət idarəsinin rəhbəri vəzifəsini tutmuş Vardan Oskanyan başçılıq etdiyi "Ohanyan-Raffi-Oskanyan" bloku (2,7 faiz), o cümlədən Azad Demokratlar Partiyası (0,94 faiz), Ermənistan Kommunist Partiyası (0,75 faiz), Erməni Dirçəlişi Partiyası (3,71 faiz) parlamentdən kənarda qalıb.
Ter-Petrosyanın rəhbərlik etdiyi Ermənistan Milli Konqresinin ümumiyyətlə parlamentə düşə bilməməsi təəccüb doğurur. Çünki sözügedən siyasi təşkilat mötədil prizmadan çıxış edərək Dağlıq Qarabağ məsələsində kompromis mövqe sərgiləyirdi.
Maraqlıdır, Ter-Petrosyanın rəhbərlik etdiyi siyasi təşkilatın ümumiyyətlə parlamentə düşə bilməməsi nəyin göstəricisidir? Məsələyə münasibət bildirən politoloq Məhəmməd Əsədullazadə bunu bir sıra amillərlə əlaqələndirdi: "Ermənistanda keçirilən parlament seçkilərində, gözlənildiyi kimi, Serj Sarkisyanın rəhbərlik etdiyi Respublika Partiyası "qalib" gəldi. Təbii ki, Sarkisyan əlində olan inzibati metodlarla bu seçkini öz lehinə formalaşdırmağa nail oldu. Bu minvalla onun hakimiyyətdə qalmaq üçün baş nazir postuna gəlməsi isə qaçılmazdır. Bu seçkidə əsas müxalifət olan Levon Ter-Petrosyanın "Milli Konqres"i və Seyran Ohanyanın rəhbərlik etdiyi blok parlamentə düşmək üçün 7 % marjanı keçə bilməyib. Amma hakim partiyaya yaxın olan Tsarukyanın rəhbəri olduğu "Tsarukyan" bloku isə Respublika Partiyasından sonra ikincidir. Ölkədə kifayət qədər böyük nüfuza malik olan S.Ohanyan və L.Ter-Petrosyanın parlamentə buraxılmaması Sarkisyanın bu iki nüfuzlu şəxslə koalisiya hökuməti yaratmamaq niyyətindən irəli gəlir. Həmçinin, onları özünə kifayət qədər ciddi rəqib görür. Bu iki şəxs parlamentə buraxılsaydı, Sarkisyanın devrilməsi labüd olardı. Ona görə də Sarkisyan özünə loyal olan şəxsləri parlamentə buraxdı ki, növbəti illərdə hakimiyyəti öz əlində saxlasın. Müxalifətin mitinq keçirməsi istisna deyil. Nəzərə alaq ki, Petrosyan və Ohanyan da Moskvaya bağlı şəxslərdir. Onların mitinqləri böyük siyasi çaxnaşmaya səbəb ola bilər. Moskvanın buna icazə verməməsi gözlənir. Ümumilikdə, orada düzgün seçkinin keçirilməsindən söhbət gedə bilməz".
Vidadi ORDAHALLI