Yeganə Hacıyeva: "Bu təqdimatın özü ictimai rəyi çaşdırmağa, həmsədrlərin Ermənistanın istəyilə hərəkət etdiyinə dair rəy formalaşdırmağa yönəlib"
Ermənistan mətbuatı ATƏT-in Minsk Qrupu həmsədrlərinin regiona, xüsusilə də Dağlıq Qarabağ ərazisinə etdiyi son səfərə fərqli don geyindirməyə başlayıb. Onlar iddia edir ki, həmsədrlərin budəfəki səfəri atəşkəsə nəzarət mexanizmlərinin harada yerləşdiriləcəyini müəyyən etməklə bağlı olub.
Hətta qeyd edilir ki, bu məqsədlə həmsədrlər əsasən Dağlıq Qarabağ ətrafında erməni işğalı altında olan rayonları da gəzib. Qeyd edək ki, Azərbaycan prinsipial olaraq atəşkəsə nəzarət mexanizmlərinin tətbiqinin əleyhinədir. Bunun səbəbini də ciddi dəlillərlə əsaslandırır. Həmsədrlərin regiona son səfərinin belə şərh olunması nə dərəcədə inandırıcı və doğru sayıla bilər?
Politoloq Yeganə Hacıyeva qəzetimizə açıqlamasında bildirdi ki, belə təqdimat doğru deyil: "Bilirsiniz ki, Ermənistan uzun müddətdir bu tələbi irəli sürür. Onlar danışıqlardan yayınmağın səbəblərini kompensasiya etmək üçün atəşkəsin pozulması ilə bağlı ciddi monitorinqlərin aparılmasına ehtiyacın olduğu tələbini irəli sürür. Azərbaycan tərəfi haqlı olaraq onların bu cəhdini növbəti bəhanə, danışıqlardan yayınma istəyi kimi başa düşür. Biz dəfələrlə bəyan etmişik ki, Ermənistan atəşkəsin pozulmasından bu dərəcədə narahatdırsa, onda işğaldan əl çəksin. Prezident İlham Əliyev haqlı olaraq qeyd edib ki, Ermənistan əsgəri ölməyini istəmirsə, Azərbaycan torpağından rədd olmalıdır. Bəli, həmsədrlər də status-kvonun dəyişməsinə cəhd etməlidir. Azərbaycanın atəşkəsə nəzarət mexanizmi ilə bağlı tutduğu prinsipial mövqe heç də bizim cəbhədəki vəziyyəti gərginləşdirmək istəyimizlə bağlı deyil. Tərəfimizdən aparılan monitorinqlər də göstərir ki, cəbhədəki atəşkəs daim ermənilər tərəfindən pozulur. Bu tələb heç də Ermənistanın sülhə sadiqliyindən irəli gəlmir. Onlar bu cür bəhanələrlə problemin həllini uzatmaq istəyir. Düzdür, həmsədrlər bu dəfə status-kvonun dəyişməsilə bağlı konkret mövqe ortaya qoymadı. Ancaq bu heç də o anlama gəlmir ki, onların səfəri yalnız atəşkəsə nəzarət mexanizmlərilə bağlansın. Bu təqdimatın özü ictimai rəyi çaşdırmağa, həmsədrlərin Ermənistanın istəyilə hərəkət etdiyinə dair rəy formalaşdırmağa yönəlib".
Məhəmmədəli QƏRİBLİ