Elşən Mustafayev: "Bu, faktiki olaraq, Azərbaycanı işğal faktoru ilə barışmağa sövq etdirmək istəyidir"
Ermənistan KİV-i həmin ölkənin Dağlıq Qarabağla bağlı gedən danışıqlarda nümayiş etdirdiyi qeyri-konstruktiv mövqeyə müxtəlif yollarla haqq qazandırmağa çalışır. Hazırda onların aparıcı KİV-i Ermənistanı guya sülhsevər və atəşkəsə razı olan bir ölkə kimi təqdim etməyə çalışsa da, mətləb başqadır. Belə ki, onlar Ermənistanın sülh danışıqlarının bərpası ilə bağlı iki mühüm şərtini açıqlayıb: 1. Atəşkəsə nəzarət mexanizminin tətbiqi. 2.Mövcud status-kvonun Azərbaycan tərəfindən qəbul olunması.
Azərbaycanın bu şərtlərlə bağlı münasibəti təbii ki, məlumdur. Lakin Ermənistanın bu qəbuledilməz şərtlərinin arxasında nə demək istədiyi çox maraqlıdır.
Azərbaycan Milli İstiqlal Partiyasının sədr müavini Elşən Mustafayev qəzetimizə açıqlamasında bildirdi ki, bu təbliğatı Ermənistanın növbəti həyasızlığı sırasına aid edə bilərik: "Ermənistan sülh danışıqlarından ona görə imtina edir ki, Azərbaycan onun qoyduğu şərtləri rədd edir. Azərbaycanın bu məsələ ilə bağlı mövqeyi qətidir. Prezident İlham Əliyev bildirib ki, hətta Dağlıq Qarabağa Azərbaycanın tərkibində yüksək muxtariyyət verməyə hazırıq. Təbii ki, bütün bunlar işğal edilmiş rayonların azad edilməsindən sonra mümkündür. Ermənistan isə belə kompromis variantlardan qaçır. Onların irəli sürdüyü şərtlərə diqqət edin. Hər iki şərti Azərbaycan dəfələrlə rədd edib. Bu, faktiki olaraq, Azərbaycanı işğal faktoru ilə barışmağa sövq etdirmək istəyidir. Mövcud status-kvonun qorunub saxlanması o anlama gəlir ki, Azərbaycan ətraf yeddi rayondan imtina etməlidir. Digər şərt isə işğal faktoruna təhlükəsizlik çətiri yaratmaq üçündür. Bəllidir ki, Ermənistan tərəfi çıxılmaz durumda qaldığı üçün belə addımlar atır. Çünki artıq beynəlxalq ictimaiyyət onlara pressinq etməyə başlayıb. Onlar da bunu bildiyi üçün müxtəlif bəhanələrə əl atır. Azərbaycanın hər iki şərtlə bağlı konkret mövqeyi var. Ermənistan bu dərəcədə həyasızcasına özünü aparacaqsa, bizim üçün alternativ variantların tətbiqi gündəmə gələ bilər. Yəni Ermənistanın bu cür mövqe nümayiş etdirməsi uzun sürə bilməz. Biz hərbi yolla torpaqlarımızı işğaldan azad etmək və status-kvonu dəyişmək kimi hüququmuzu özümüzdə saxlayırıq".
Məhəmmədəli QƏRİBLİ