Bazar günü Ermənistanda keçiriləcək parlament seçkiləri bu ölkədə yeni qarşıdurmanın əsasını da qoya bilər. Artıq indidən erməni ekspertlərinin böyük əksəriyyəti parlament seçkilərinin gedişində ölkədə vətəndaş qarşıdurmasının yaşanacağını istisna etmir. Bütün bunlara əsas səbəb isə xalq arasında heç bir sosial dayağı olmayan hökumətin seçkiləri saxtalaşdırmaq üçün indidən etdiyi gedişlərdir.
Məhz elə bu fonda Ermənistanda "Əriklər Ölkəsi" Partiyası ölkə və dünya ermənilərini aprelin 2-də keçiriləcək parlament seçkilərinə qarşı dinc aksiyalara çağırıb. Bu barədə partiyanın yaydığı bəyanatda deyilir: "Seçkilərin saxtalaşdırılacağını indidən müəyyən etmək olar. Bu siyasi kampaniya klan hakimiyyətinin qalmasına xidmət edəcək. Diaspor nümayəndələrinin də səs verməsinə şərait yaratmaq lazım idi. Ancaq hakimiyyət kreslosunu itirəcəyi təhlükəsindən bunu etmir". Belə vəziyyətdə "Əriklər Ölkəsi" Partiyası seçiciləri hakim Respublika Partiyasına və hakimiyyətdə əvvəllər təmsil olunanlara səs verməməyə çağırıb. Həmçinin partiya aprelin 3-də etiraz aksiyası keçirməyi təklif edib. Qeyd edək ki, bu siyasi təşkilat qərbyönlü "İrs" Partiyasının bazasında yaradılıb.
Ermənistanın keçmiş müdafiə naziri Ohanyanın rəhbərlik etdiyi "Ohanyan-Raffi-Oskanyan" bloku da eyni mövqe sərgiləyir. Seyran Ohanyan bildirir ki, Ermənistan vətəndaşlarının mövcud rejimə qarşı çıxmaqdan başqa yolu yoxdur: "Seçkinin nəticələrini saxtalaşdıracaq hökumətdən cəmiyyətə fayda olmaz. Hakimiyyət sizə özünüzü idarə etmək hüququ verməlidir. Onlar isə bunun əksini edir. Bu gün Ermənistanda hökumətə qarşı çıxan hər kəsə təzyiq var. Görün nə qədər vətəndaşa xəyanət damğası vurularaq həbs olunub". Ohanyan bəyan edib ki, seçkidə məğlub olsalar belə, mübarizələrini davam etdirəcəklər. Blokun digər təmsilçisi Raffi Ovanisyan bildirib ki, Serj Sarkisyanın rəhbərlik etdiyi bu cinayətkar qruplaşma illərdir Ermənistanı talayır: "Onlar hakimiyyətdə təmsil olunduqları müddətdə xalqa yalan vəd verməkdən başqa iş görməyiblər. Şöhrət S.Sarkisyanın gözünü o qədər tutub ki, onu bu posta gətirən insanların əksəriyyətini şərləyərək həbs etdirib. Bu hökumət bilməlidir ki, əhalinin səbr kasası artıq daşıb. İllərdir bizi səfil vəziyyətinə qoyublar. İnsan kimi özümüzdən utanırıq. Biz münaqişə, övladlarımızın gənc yaşlarında ölməsini istəmirik". Ölkədəki problemlərdən, daxili və xarici çəkişmələrdən yorulduqlarını bildirən blok üzvləri hər kəsi Sarkisyan rejiminə qarşı birləşməyə çağırıb. Bildirilir ki, Sarkisyan nə qədər gec deyil istefa verməlidir.
Seçkilərdə iştirak edən "Tsarukyan" blokundan deputatlığa namizəd Naira Zohrabyan da hakimiyyəti sərt tənqid edib. O bildirir ki, Ermənistanda hökumət yaranmış problemləri həll etmək əvəzinə hakimiyyət uğrunda mübarizə aparır. Onun sözlərinə görə, hakimiyyəti vətəndaşların taleyi maraqlandırmır: "Ermənistan ən ağır günlərini yaşayır. Ölkə borc içində boğulur, əhali ölkəni tərk edir. Sarkisyan rejimi isə on ildə yaratdığı problemləri aradan qaldırmaq əvəzinə hökumət postunda möhkəmlənmək uğrunda mübarizə aparır. Hakimiyyət 17 il xalqı talayıb. İnsanlar xaricdə baraklarda yaşamağa məhkum kütləyə çevirib". Zöhrabyan vətəndaşları həlledici qərar verməyə çağıraraq qeyd edib ki, Ermənistanın bundan başqa yolu yoxdur: "Ölkə iqtisadiyyatı tamamilə iflasa uğrayıb. Ermənistan büdcəsi isə miqrant pullarından asılı vəziyyətə düşüb. Sarkisyan cinayətkardır. O öz hakimiyyətini insanların bədbəxtliyi, faciələri üzərində qurub. S.Sarkisyan vaxtilə ona yaxın olan insanları aradan götürür. Dünənə kimi Seyran Ohanyan və Samvel Babayan onun dostları idi, indi isə düşmənləridir". Belə vəziyyətdə xalqın artan narazılığı fonunda hakimiyyət qalib gəlmək üçün seçkiləri saxtalaşdırmaqdan başqa yol görmür. "Transparency International" Antikorrupsiya Mərkəzinin proqram rəhbəri Varujan Oktanyan da iqtidarın bu istiqamətdə fəaliyyətini genişləndirdiyini vurğulayıb. Onun sözlərinə görə, təkcə martın 13-dən 24-dək olan dövrdə seçkiqabağı seçici səslərinin satın alınması və ya rüşvət veriləcəyi ilə bağlı vədin olduğu 45 hal qeydə alınıb. Varujan Oktanyan bildirib ki, inzibati resurslardan istifadə ilə pozuntu halları bütün ölkə daxilində qeydə alınıb. Məsələn, Kəvər Dövlət Universitetinin müəllimləri, Respublika Partiyasını və "Çiçəklənən Ermənistan" Partiyasını təmsil edən seçki komissiyalarının üzvləri iş vaxtı təşviqat kampaniyasında iştirak edib. Seçkiqabağı rüşvət hallarından danışan Oktanyan seçici səslərini satın alan və ya səs qarşılığında rüşvət təklif edənlərin əsasən hakim Respublika Partiyasının nümayəndələri olduğunu vurğulayıb. Belə vəziyyətdə müxalifət vətəndaşların köməyi ilə seçkilərin saxtalaşdırılmasının qarşısını almaq istiqamətində bütün cəhdləri edəcəyini bildirib. Hakimyyətin isə əks mövqedən çıxması parlament seçkilərində toqquşmaları və vətəndaş qarşıdurmasının başlanmasını istisna etmir.
Nahid SALAYEV