Qabil Hüseynli: "Bu bəyanatı da heç bir təsiri olmayan sənəd parçası kimi qiymətləndirməliyik"
ATƏT-in Minsk Qrupunun həmsədrləri ATƏT-in fəaliyyətdə olan sədrinin şəxsi nümayəndəsi Anjey Kaspşiklə birgə martın 11-də Bakıda, 27-də İrəvan və 28-də Dağlıq Qarabağda səfərdə olublar.
Bununla bağlı həmsədrlərin yaydığı bəyanatda deyilir ki, səfərin əsas məqsədi təmas xətti və Ermənistan-Azərbaycan sərhədi haqda detallı siyasi və hərbi məlumat almaq, 2016-cı ilin Vyana və Sankt-Peterburq sammitlərində əldə edilmiş razılaşmaların tətbiqi və Dağlıq Qarabağ münaqişəsinin nizamlanmasına dair növbəti addımları müzakirə etmək olub. Bildirilib ki, həmsədrlər Azərbaycan və Ermənistan prezidentləri, XİN rəhbərləri, qondarma respublikanın təmsilçiləri ilə görüşüb. Onlar, həmçinin, Dağlıq Qarabağ ətrafındakı ərazilərə səfər edib: "Danışıqlar zamanı həmsədrlər qoşunların təmas xəttindəki insidentlərlə bağlı narahatlığını bildirib və tərəfləri təmkinli olmağa çağırıb. Prezidentlər həmsədrlərin xüsusilə Novruz və Pasxa bayramlarında atəşkəs rejimini gücləndirmək və gələcək eskalasiyalardan çəkinmək məqsədilə irəli sürdüyü təkliflərlə bağlı mövqelərini bildirib. Onlar münaqişənin siyasi yolla həlli üçün danışıqları davam etdirmək öhdəliklərinə sadiq olduqlarını ifadə ediblər".
Qeyd edək ki, həmsədrlər Minsk Qrupu üzvlərini məlumatlandırmaq üçün tezliklə Vyanaya səfər edəcəklərini bildirib.
Həmsədrlərin bəyanatından bir daha görünür ki, onlar status-kvonun dəyişməsi məsələsinə heç bir münasibət bildirməyib. Bunu nə ilə izah etmək olar?
Politoloq Qabil Hüseynli hesab edir ki, Ermənistan rəhbərliyi son vaxtlar Dağlıq Qarabağ münaqişəsinin danışıqlar prosesində aranı qarışdırmağa çalışır: "Onlar öncə danışıqlar prosesindən çəkildiklərini bəyan etdilər, daha sonra Moskva və Fransaya səfər edərək cəfəng fikirlər səsləndirdilər. ATƏT-in Minsk Qrupunun amerikalı həmsədri Dağlıq Qarabağ münaqişəsinin danışıqlar prosesində daha fəal görünür. Amerikalı həmsədr Bakıda olanda dedi ki, Dağlıq Qarabağ problemi postsovet məkanındakı digər problemlərdən fərqlənir. Ona görə də ona əlahiddə yanaşma metodu tətbiq edilməlidir. Amma münaqişənin nə ilə fərqləndiyini və bu metodun nədən ibarət olduğunu demədi. Ondan əvvəlki amerikalı həmsədr isə arada bir mətbuatda görünərək kifayət qədər obyektiv fikirlər səsləndirir. Düşünürəm ki, münaqişənin həlli ilə bağlı ABŞ-la Rusiya arasında razılaşma olarsa, danışqları həmin istiqamətə yönləndirməyə çalışacaqlar. Ancaq Azərbaycan ərazi bütövlüyümüzə xələl gətirən heç bir təklifi qəbul etməyəcək. Son zamanlar Fransa ilə Rusiya arasında Dağlıq Qarabağ münaqişəsinə dair xoşagəlməz işbirliyi yaranıb. Bununla bağlı Fransa prezidenti Fransua Olland və Rusiyanın bəzi səlahiyyət sahibləri də beynəlxalq hüquq normalarına zidd olan fikirlər səsləndirib. Bu, mövcud olan həll variantlarının açıqlanmaq istəməməsindən irəli gəlir. Həmsədrlərin status-kvonun dəyişməsinin vacibliyinə toxunması da məhz onların ölkələrinin problemin həllinə sərgilədiyi münasibətdən qaynaqlanır. Həmsədrlərin bu bəyanatını da heç bir təsiri olmayan sənəd parçası kimi qiymətləndirməliyik. Çünki hazırkı mərhələdə yalnız status-kvonun dəyişməsi problemin həllinə təkan verə bilər. Bunu etmirlərsə, deməli, nəsə yenilik gözləmək olmaz".
Məhəmmədəli QƏRİBLİ