Mehman Muradlı: "Hüquqi cəhətdən Lapşinlə bağlı məsələnin Ermənistana heç bir aidiyyəti yoxdur"
Belarus prezidenti Aleksandr Lukaşenko bəyan edib ki, Minsk nə Azərbaycan, nə də Ermənistanla mübahisə etmək niyyətində deyil. Bu barədə Belarus prezidenti Ermənistan səfiri Armen Xaçaturyanla görüşü zamanı bloger Aleksandr Lapşinin ekstradisiyası ilə bağlı sualları cavablandırarkən bildirib.
"Ermənistanın buna nə aidiyyəti var? Bəli, Ermənistan Lapşin haqqında mənə heç vaxt heç nə deməyib. Azərbaycan tərəfindən axtarış elan edilib. Onu burada saxlayanda düşündüm ki, niyə burada saxlayıblar? Qoy istədiyi yerə çıxıb getsin. Açıq desək, öz başıma problem açdım.
İnterpol bilirdi. Biz qanuni şəkildə məlumat vermişdik. Biz onu kimə təhvil verməliydik? Barəsində axtarış elan olunan tərəfə. Onu da deyim ki, heç kəs onu aparmaq istəmirdi. O, üç ölkənin vətəndaşıdır. Bu ölkələrin heç biri onunla bağlı iddia qaldırmadı" - Lukaşenko qeyd edib.
Göründüyü kimi, Lukaşenko səfirə Lapşin məsələsinə görə çox korrekt sual verib: Ermənistanın buna nə aidiyyəti var?
Hüquqşünas Mehman Muradlı qəzetimizə açıqlamasında bildirdi ki, doğrudan da Lapşin məsələsinə münasibətdə Ermənistan özünü tam biabır etmiş oldu: "Bilirsiniz ki, Lapşin Azərbaycanın işğal altında olan ərazilərinə ölkəmizin rəsmi icazəsi olmadan səfərlər edib. Onun bu və digər qanunazidd hərəkətləri ilə bağlı Azərbaycan tərəfi cinayət işi qaldırıb və həbs olunması üçün orderi İnterpola təqdim edib. Lukaşenko çox doğru olaraq qeyd edib ki, blogeri Belarusda saxlayıblarsa, qanunvericiliyə görə, həmin adamı axtarışı verən ölkəyə təhvil verməli idilər. Ancaq maraqlıdır ki, bu məsələdə ən böyük narahatlığı Lapşinin vətəndaşı olduğu ölkələr deyil, Ermənistan keçirməyə başladı. Belarus prezidenti tam haqlı olaraq sual edir ki, Ermənistanın bu məsələyə hansı aidiyyəti ola bilər. Bir daha sübut olunur ki, Dağlıq Qarabağ və ətraf rayonları işğal altında saxlayan, oralara qanunsuz səfərləri təşkil edən məhz rəsmi İrəvandır. Əslində, biz bunu bilirdik. Ermənistanın nümayiş etdirdiyi davranışa adekvat sualla müraciət edən Lukaşenko bunu bir daha təsdiqləmiş oldu. Hüquqi cəhətdən Lapşinlə bağlı məsələnin Ermənistana heç bir aidiyyəti yoxdur. Biz dəfələrlə bunu bəyan etmişik".
Məhəmmədəli QƏRİBLİ