Parlament seçkilərinə az müddət qaldığı bir vaxtda Ermənistanda Dağlıq Qarabağ münaqişəsi ilə bağlı ölkə hakimiyyəti qarşısında daha konkert tələblər qoyulur. Bu xüsusda Ermənistanın birinci prezidenti olmuş Levon Ter-Petrosyanın səsləndirdiyi yeni fikirlər erməni cəmiyyətində və siyasi dairələrində əsas müzakirə predmetlərindən birini təşkil edir.
Belə ki, sabiq dövlət başçısı münaqişənin çözümü üçün məsələni daha konkret şəkildə qoyaraq, erməni iqtidarının bu istiqamətdə müvafiq addımlar atmasının zəruriliyini gündəmə gətirir. Levon Ter-Petrosyan hesab edir ki, Dağlıq Qarabağ ətrafındakı ərazilər tərəflərin danışıqlar apardığı sənədə uyğun olaraq Azərbaycana qaytarılmalıdır. O, "Kentron" erməni telekanalına müsahibəsində daha sonra bildirib: "Biz bunu könüllü etməsək, bir dəfə ərazilər sanksiyalarla alınacaq". Sabiq prezident vurğulayıb ki, dövlət cəmiyyəti bu qərarlara hazırlamalıdır. Levon Ter-Petrosyan "Madrid prinsipləri"nə dəstək verdiyini bir daha vurğulayıb: "Serj Sarkisyan bu yolla getsə, mən sona kimi onun yanında olacam".
Ümumiyyətlə, Ter-Petrosyanın rəhbərlik etdiyi "Ermənistan Milli Konqresi"nin digər təmsilçiləri də münaqişənin mərhələli şəkildə həllini vacib sayır və bildirirlər ki, ən azı ölkənin inkişafı üçün konflikt öz çözümünü tapmalıdır. "Ermənistan Milli Konqresi"nin parlament fraksiyasının rəhbəri Levon Zurabyan bildirir ki, ölkənin inkişafı bilavasitə Qarabağda sülhün bağlanması ilə əlaqədardır. Zurabyanın fikrincə, ölkə qarşısında dayanan əsas problem ölkəni inkişaf etməyə qoymayan Qarabağ münaqişəsidir. O bildirir ki, Qarabağda status-kvonun saxlanması və ölkənin sabit inkişafı bir arada mümkün deyil. Onun sözlərinə görə, münaqişənin sülh yolu ilə həlli Azəırbaycanla yarışmaqdan çəkilmək üçün yeganə yoldur. "Madrid prinsipləri"ni sülh yolu ilə həllin əsası kimi gördüyünü deyən Zurabyan bildirib ki, Qarabağ probleminin bu əsasda həllini tapması Ermənistanın inkişafı üçün çox mühümdür.
"Azad demokratlar" partiyasından namizəd Aşot Yegiazaryan da məsələyə bu rakursdan yanaşaraq, Qarabağ konfliktinin yaxın tezlikdə həllini tapmasının vaciblyini bəyan edir: "Ermənistanın bütün bəlalarının səbəbi onun izolyasiyası və müttəfiqlərinin olmamasıdır".
"Tert" nəşrinə müsahibəsində Yegiazaryan qeyd edib ki, qarşıdan gələn parlament seçkilərində iştirak edən siyasi qüvvələrin hamısının proqramları populizmlə doludur: "Onlar əsas problemi gündəmə gətirmirlər ki, Ermənistanın bütün bəlalarının səbəbi onun izolyasiyası və müttəfiqlərinin olmamasıdır. Bu izolyasiya aradan qalxmayana qədər hansı proqramı irəli sürürsən sür, o, boşboğazlığa çevrilir". Ermənistanın keçmiş müdafiə naziri, "Ohanyan-Raffi-Oskanyan" seçki blokunun rəhbəri Seyran Ohanyan da danışıqlar yolu ilə münaqişənin həllini mümkün sayır. Ohanyanın fikrincə, böyük potensiala malik intensiv dialoq üçün meydança rolunda Rusiya da çıxış edə bilər. "Hərçənd, münaqişənin hərtərəfli və yekun nizamlanması üçün ATƏT meydançası hazırda ən optimal və ən real olanıdır".
Beləliklə, səslənən fikirlərdən aydın görünür ki, artıq Ermənistanın siyasi səhnəsində yer alan qüvvələr münaqişənin həlli istiqamətində konkret addımlar atılmasını tələb edir. Hesab olunur ki, bu xüsusda Ermənistan hakimiyyətinə daxili təzyiqlər güclənsə, konfliktin həlli istiqamətində mühüm dəyişikliklər baş verə bilər. Özü də bütün bunlar ATƏT-in Minsk Qrupunun həmsədr ölkələrinin münaqişə tərəfləri arasında yeni görüş təşkil etmək istədiyi bir vaxtda baş verir. Erməni ekspert Aram Amatuni bildirir ki, Qarabağ münaqişəsinin həlli üçün prezidentlərin görüşü baş tutsa, hansısa razılıqlar əldə oluna bilər. Ekspert hesab edir ki, prezidentlərin görüşündə münaqişənin həlli ilə bağlı planın reallaşdırılması gündəmə gələcək: "Ermənistan isə təmas xəttində "atəşkəsə nəzarət mexanizmləri"nin tətbiqini arzulayır. Azərbaycan bunun status-kvonu möhkəmləndirəcəyini əsas gətirərək ondan imtina edir. Minsk Qrupu isə mövcud planın tətbiqində maraqlıdır". Mövcud plan məhz reallaşmasını artıq erməni müxalifətinin də tələb etdiyi "Madrid prinsipləri"dir. Məhz "Madrid prinsipləri"nin həyata keçməsi Qarabağ münaqişəsinin siyasi müstəvidə həllini mümkün edir. Elə qrupun amerikalı həmsədri Riçard Hoqlandın münaqişənin həllilə bağlı barəsində bəhs etdiyi 3 hissədən ibarət plan da əsas etibarı ilə "Madrid prinsipləri"ni özündə ehtiva edir.
Nahid SALAYEV