Aqşin Əliyev: "Bundan sonra biz BMT baş katibinin həmin məruzəni etməsinə nail olmağa çalışmalıyıq"
Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev verdiyi müsahibədə Ermənistanın xarici işlər naziri Edvard Nalbandyanın bu günlərdə BMT-nin mənzil-qərargahına səfər edərək Ermənistanın BMT Nizamnaməsinə, qurumun məqsəd və məramlarına sadiq olduğunu bildirməsinə və bir sıra digər vacib mövzulara aydınlıq gətirib.
H.Hacıyev bildirib ki, BMT kimi mötəbər bir qurum və onun baş katibi münaqişənin nizamlanması ilə bağlı mümkün olan səlahiyyətlərindən istifadə etmir: "BMT Təhlükəsizlik Şurasının mandatı əsasında Minsk Qrupunun həmsədrlərinə BMT TŞ-nin qətnamələrinin icrası həvalə edilib. Qəbul edilmiş 884 saylı qətnamənin sonuncu bəndində deyilir ki, BMT-nin baş katibi Minsk Qrupu ilə məsləhətləşərək vəziyyət haqqında Təhlükəsizlik Şurasına məruzə etsin.
ATƏT-in Minsk Qrupunun həmsədrlərinin mandatına dair 1995-ci il Budapeşt sənədinə görə, beynəlxalq hüquq, Helsinki Yekun Aktı və BMT Təhlükəsizlik Şurasının qətnamələri onların mandatının əsasını təşkil edir".
Göründüyü kimi, BMT tərəfindən qəbul edilən qətnamədə BMT baş katibinin Minsk Qrupu ilə məsləhətləşərək vəziyyət haqqında Təhlükəsizlik Şurasına məruzə etməsinin mükünlüyü və vacibliyi kimi bir bənd var. Maraqlıdır, indiyə qədər Minsk Qrupunun səmərəli olmayan fəaliyyətilə bağlı BMT baş katibi tərəfindən niyə bir dəfə də olsun belə məruzə edilməyib?
Ekspert Aqşin Əliyev qəzetimizə bildirdi ki, H.Hacıyev çox mühüm bir məqama işarə edib: "Tamamilə doğrudur ki, dünyanın ən nüfuzlu qurumları, kifayət qədər əllərində əsas olduğu halda, Ermənistana təzyiq göstərmir. Münaqişənin həlli ilə bağlı beynəlxalq qurumların səsləndirdiyi bəyanatlar ümumi xarakter daşıyır və tövsiyələr hər iki tərəfə ünvanlanır. BMT-nin ən nüfuzlu təsisatı olan Təhlükəsizlik Şurasının qətnamələri icra olunmadığı halda, BMT-nin baş katibi Ermənistanın qurumla əməkdaşlığını yüksək qiymətləndirir. Bu necə ola bilər? Ortada konkret sənəd var ki, BMT baş katibinə Təhlükəsizlik Şurasının qəbul etdiyi qətnamələrin icrasına nəzarət etmək həvalə olunub. Artıq üstündən illər deyil, onilliklər keçib, nə qətnamələr icra olunub, nə də Minsk Qrupundan bununla bağlı hesabat tələb edilib. BMT-nin bundan əvvəlki baş katibləri də bu barədə hüquqlarından istifadə edərək məruzə etməyiblər. Yeni baş katibə bunun vacibliyini anlatmaq lazımdır və Azərbaycan diplomatiyası çalışmalıdır ki, buna nail ola bilsin. İndiyə qədər bu istiqamətdə tərəfimizdən BMT baş katiblərinə ciddi pressinq də olmayıb. Bundan sonra biz BMT baş katibinin həmin məruzəni etməsinə nail olmağa çalışmalıyıq".
Məhəmmədəli QƏRİBLİ