Üzeyir Cəfərov: "Məlum açıqlamada düşmənin həm işğal altında olan ərazilərdə, həm də..."
Məlum olduğu kimi, Ermənistan prezidenti Serj Sarkisyan işğal altındakı Dağlıq Qarabağ ərazisinə bir neçə gün bundan əvvəl səfər edib. Səfər çərçivəsində o, işğalçı ordunun hərbçiləri ilə görüşüb, hətta onlar qarşısında çıxış edərək geniş nitq söyləyib. Adəti üzrə Sarkisyan bu dəfə də sərsəmləyib, Azərbaycanın ünvanına hədə dolu bəyanatlar səsləndirib.
Sarkisyan işğalçı ordunun əsgər və zabitlərinin qarşısında cuşa gələrək, Azərbaycan Silahlı Qüvvələrinə qarşı "İsgəndər" operativ-taktiki raketlərindən istifadə edilməsinə dair əmr verəcəyini deyib. Bildirib ki, lazım olsa, Ermənistanın baş komandanı gözünü qırpmadan bu barədə əmr verə bilər. Hərbi xuntanın başçısı bir qədər də irəliyə gedərək bildirib ki, Ermənistandakı müasir silahlar, Azərbaycan torpaqlarındakı ən əhəmiyyətli infrastruktur və obyektlər başda olmaqla, bütün istiqamətləri hədəf almağa qadirdir.
Azərbaycan Müdafiə Nazirliyi buna cavab olaraq bildirib ki, düşmənin bütün hərbi təyinatlı məntəqələri hədəfdədir: "Düşmən tərəf anlamalıdır ki, Azərbaycanın işğal edilmiş əraziləri, o cümlədən Ermənistanda yerləşən bütün hərbi təyinatlı və digər strateji əhəmiyyətli obyektlər ordumuzun son illər ərzində əldə etdiyi ən müasir raket və artilleriya qurğularının daim hədəfindədir. Ermənistan tərəfindən yarana biləcək istənilən təhdid və hədələrin qarşısı dərhal və qətiyyətlə alınacaq. Görüləcək cəza tədbirləri nəticəsində Ermənistanın məruz qalacağı irimiqyaslı itkilər və dağıntılar qaçılmaz olacaq, onun üçün faciəvi və bərpası mümkün olmayan fəsadlara gətirib çıxaracaq".
Maraqlıdır, hərbi ekspertlər düşmən obyektlərinin daim hədəfdə olmasını necə izah edir?
Sözügedən məsələ ilə bağlı fikirlərini "Bakı-Xəbər"lə bölüşən hərbi ekspert Üzeyir Cəfərovun sözlərinə görə, burada söhbət sırf hərbi təyinatlı obyektlərdən gedir: "Məlum açıqlamada düşmənin həm işğal altında olan ərazilərdə, həm də Ermənistan ərazisində müxtəlif strateji əhəmiyyətli hərbi hissə və birləşmələri nəzərdə tutulur. Burada söhbət mülki təyinatlı obyektlərdən getmir. Çünki Azərbaycan heç vaxt mülki şəxslərlə müharibə aparmayıb. Ona görə də bizim istəyimiz odur ki, Ermənistan hədələrdən əl çəksin və işğala son qoysun. Anlamalıdırlar ki, bu gün Azərbaycanın imkanları Ermənistanla müqayisədə daha böyükdür. Azərbaycanın son illər İsraildən, Pakistandan, Rusiyadan, Çin Xalq Respublikasından əldə etdiyi silahlar ən yeni nəsil silahlardır. Bu silahlarla Ermənistanın istənilən hərbi təyinatlı məntəqələrini məhv etmək mümkündür. Həmçinin, bu silahlar düşməni mütəmadi olaraq izləmək imkanı verir. Düşmən günlərin birində hər hansı bir ağılsız hərəkət edərsə, Azərbaycan bunu cavabsız qoymayacaq. Bunu Ermənistan tərəfi də gözəl bilir. Ona görə də bundan nəticə çıxarmalıdırlar".
Vidadi ORDAHALLI