"Bunlar hamısı seçkiqabağı oyunlardır"
Arzu Nağıyev: "İstifadə etsə də, onun qarşısını ala biləcək hava hücumundan müdafiə sistemlərimiz var"
Azərbaycan Müdafiə Nazirliyi Ermənistan prezidenti Serj Sarkisyanın "İsgəndər" operativ-taktiki raketlərindən ölkəmizə qarşı istifadə edilməsinə düşünmədən əmr verəcəyi barədə bəyanatına sərt reaksiya verib.
Müdafiə Nazirliyinin mətbuat xidmətindən verilən məlumata görə, S.Sarkisyanın bu bəyanatı öz cinayətkar dəstəsinin itirilmiş nüfuzunu bərpa etmək və seçkiqabağı xal toplamaqla reytinqini yüksəltmək məqsədilə daxili auditoriyaya hesablanmış primitiv bir addımdır: "Düşmən tərəf anlamalıdır ki, Azərbaycanın işğal edilmiş əraziləri, o cümlədən Ermənistanda yerləşən bütün hərbi təyinatlı və digər strateji əhəmiyyətli obyektlər ordumuzun son illər ərzində əldə etdiyi ən müasir raket və artilleriya qurğularının daim hədəfindədir.
Ermənistan tərəfindən yarana biləcək istənilən təhdid və hədələrin qarşısı dərhal və qətiyyətlə alınacaq. Görüləcək cəza tədbirləri nəticəsində Ermənistanın məruz qalacağı irimiqyaslı itkilər və dağıntılar qaçılmaz olacaq, onun üçün faciəvi və bərpası mümkün olmayan fəsadlara gətirib çıxaracaq. Odur ki, Ermənistanın rəhbərliyi belə məsuliyyətsiz bəyanatlar verməzdən əvvəl əhalisinin aqibətini düşünməlidir".
Sarkisyanın son hədəsi nəyə hesablana bilər?
Təhlükəsizlik məsələləri üzrə ekspert Arzu Nağıyevin sözlərinə görə, sözügedən hay-küylü açıqlamalar daha çox aprel ayında keçiriləcək parlament seçkilərinə hesablanıb: "Bunlar hamısı seçkiqabağı oyunlardır. Hamıya məlumdur ki, Dağlıq Qarabağ "kartı" seçkilərdə siyasi kart kimi istifadə olunur. Ermənistanda yalnız "İsgəndər" raketləri ilə bağlı deyil, həm də SSRİ vaxtından qalma SKAD raketləri barədə də erməni ekspertlər açıqlamalar verir. Fikrimcə, "İsgəndər" raketlərinin Dağlıq Qarabağda necə peyda olmasına aydınlıq gətirilməlidir. Dağlıq Qarabağ bütün dünya dövlətləri tərəfindən Azərbaycanın tərkibinə daxil olan ərazi kimi qəbul olunursa, o halda necə ola bilər ki, "İsgəndər" raketləri Dağlıq Qarabağa gətirilsin? Həmin raketlər Ermənistana satılıbsa, deməli, 102 saylı hərbi bazanın ərazisində ola bilər. "İsgəndər" sistemlərinin Dağlıq Qarabağa gətirilməsi birbaşa beynəlxalq konvensiyalara ziddir. Eyni zamanda, Ermənistan "İsgəndər" raketlərindən nə qədər istifadə etsə də, onun qarşısını ala biləcək hava hücumundan müdafiə sistemlərimiz var. Sadəcə olaraq, hazırda Ermənistanda hakimiyyətdə olan Respublika Partiyası Dağlıq Qarabağ kartından istifadə edir. Çünki onlar separatçılara müstəqillik söz veriblər. Bu vədin üstündə də Qarabağ klanı gəlib Ermənistanda hakimiyyəti zəbt edib. Mən düşünmürəm ki, onlar hər hansı bir raketdən istifadə edə bilər. Çünki Ermənistanın bu hərəkəti regionda olan bütün aktorların hamısını ayağa qaldırmaq anlamına gələ bilər".
Məhəmmədəli QƏRİBLİ