"Hər halda, bu görüş dünyaya tam sülhün yaranmasını vəd etməsə də, irəliləyişin olacağı gözləniləndir"
Rusiya və ABŞ Baş Qərargah rəisləri Bakıdakı görüşdə dünyada gərginliyin azaldılması, risqlərin qarşısının alınması ilə bağlı birgə ölçü götürmək barədə razılığa gəliblər.
Rusiya Müdafiə Nazirliyinin mətbuatda yayılmış məlumatında deyilir: "Hərbi fəaliyyətin təhlükəsizliyinin yaxşılaşdırılması, gərginliyin və risqlərin azaldılması üçün birgə iş istiqamətləri müəyyənləşdirilib".
Məlumatda, həmçinin, deyilir: "ABŞ-ın Baş Qərargah (BQ) Rəisləri Komitəsinin sədri general Cozef Danford və Rusiya müdafiə nazirinin birinci müavini, Rusiya Silahlı Qüvvələrinin Baş Qərargah rəisi Valeriy Gerasimov ABŞ və Rusiya arasında hazırkı vəziyyətlə bağlı fikir mübadiləsi aparıblar, Avropa, Yaxın Şərq, Şimali Afrika və digər regionlarda beynəlxalq təhlükəsizliklə bağlı məsələləri müzakirə ediblər. Əlaqələrin davam etdirilməsinə dair razılıq əldə ediblər".
Bakı görüşündə dünyadakı gərginliyin azaldılması ilə bağlı əldə olunan razılaşma geniş miqyasda sülhün bərqərar olmasına stimul verəcəkmi?
Politoloq Yeganə Hacıyeva qəzetimizə bildirdi ki, bu, Vaşinqton və Moskva hərbi rəhbərliyi arasında 2014-cü ildən bəri keçirilən ilk görüş oldu: "Həmin dövrdən bəri dünyada vəziyyət dəyişib. Eləcə də bu iki superdövlətin münasibətləri kifayət qədər antoqonist mərhələyə qədəm qoyub. Fikir verin, görüş hansı mərhələdə baş tutur? Rusiyanın ABŞ hərbi gəmilərinə qarşı münasibətinin gərginləşdiyi, Ukraynanın şərqində hərbi əməliyyatların davam etdiyi və silahlanma ilə bağlı müqaviləni pozmasına görə rəsmi Moskvaya yönələn ittihamların fonunda.
Pentaqon bildirirdi ki, görüşün diqqət mərkəzində ABŞ-Rusiya münasibətləri və iki ordu arasında yarana biləcək səhvlərdən qaçılması üçün dəqiq kommunikasiyanın yaradılması olacaq. Əlbəttə, iki ölkə arasında vəziyyət daha yaxşısını arzu etməyə imkan verir. Görüşün mahiyyəti isə bir çox hərbi analitiklərin mübahisə predmetinə çevrilib. Bir çoxları iddia edir ki, Trampın Moskvaya qarşı münasibəti qeyri-müəyyən qaldığı müddətdə iki generalın görüşü çox şey verməyəcək. Ancaq görüşdən sonra tərəflərin optimist görünməsi və bir sıra məsələlər üzrə ortaq məxrəcə gəlmələrilə bağlı verdikləri bəyanatlar dünyada gərginliyin doğrudan da azala biləcəyinə dəlalət edir. Təbii ki, bir çox qaynar ocaqları məhz bu iki superdövlətin razılaşması əsasında söndürmək olar. Hər halda, bu görüş dünyaya tam sülhün yaranmasını vəd etməsə də, irəliləyişin olacağı gözləniləndir".
Məhəmmədəli QƏRİBLİ