Elşən Mustafayev: "Belə məsələdə Ermənistan səfirinə həmin ölkə tərəfindən etiraz notası təqdim edilməli idi"
XXI əsrdə, informasiya texnologiyaları dövründə, istənilən məlumatın dəqiqləşdirilməsi üçün saniyələr lazım olduğu müasir zamanda Ermənistan hakimiyyəti növbəti dəfə özünü gülməli vəziyyətə qoyub. Yalan və dezinformasiya üzərində qurulan Ermənistan Respublikasının təbliğat-təşviqat siyasəti "ağıllı başbilənləri" sayəsində bu dəfə yalanın dozasının miqdarını qaçırıb.
Belə ki, 30-31 yanvar 2017-ci ildə Ermənistan parlamentinin sədri Qalust Saakyan Yaponiyaya səfər edib. Azərbaycanlı həmkarı Oqtay Əsədovun 2015-ci ilin aprelində bu ölkəyə rəsmi səfərinin proqramından fərqli olaraq Q.Saakyan Yaponiya imperatoru və Parlamentin Müşavirlər Palatasının sədri tərəfindən qəbul edilməyib.
Yaponiya Parlamentinin Nümayəndələr Palatasının sədri Tadamori Oşima tərəfindən qəbul edilən Q.Saakyan görüşdən sonra müzakirə olunan məsələləri deyil, xəyal etdiklərini mətbuatda yayıb. Ermənistan rəhbərliyi hətta bir addım da irəli gedərək, Ermənistan parlamentinin rəsmi səhifəsində görüşdə Ermənistan-Azərbaycan, Dağlıq Qarabağ münaqişəsinin və qondarma "erməni soyqırımı"nın müzakirə edildiyi barədə, Tadamori Oşimanın məlum aprel döyüşlərində həlak olmuş erməni əsgərlərinə başsağlığı verdiyinə dair yalan informasiya yayıb.
Bundan xəbər tutan Yaponiya tərəfi sözügedən məsələni təkzib edib və Nümayəndələr Palatası sədrinin belə bir ifadə işlətmədiyini bildirib. Tragikomik vəziyyətə düşən Ermənistan tərəfi dərhal parlamentin rəsmi səhifəsində adıçəkilən xəbəri silib.
Çox maraqlıdır ki, Yaponiya hakimiyyəti diplomatik qalmaqal həddinə çatan bu məsələyə lazımi şəkildə etiraz etməyib. Təəssüflər olsun ki, Yaponiyanın Azərbaycandakı Səfirliyi də məsələ ilə bağlı susqun mövqe nümayiş etdirir. Yaponiyanın mövzu ilə bağlı nümayiş etdirdiyi reaksiyanı qənaətbəxş hesab etmək olarmı?
Ekspert Elşən Mustafayev qəzetimizə bildirdi ki, bu olduqca ciddi təxribatdır: "Biz Ermənistan hakimiyyətində təsadüfi adamların təmsil olunduğunu bilirdik. Ancaq dövlətlərarası münasibətlər səviyyəsində belə dələduzluğun nümayişini birinci dəfədir görürük. Məlum oldu ki, Ermənistan parlamentinin sədri nə imperator tərəfindən qəbul edilib, nə də orada baş tutan hansısa görüşdə aprel döyüşlərilə bağlı müzakirə aparılıb. Hesab edirəm ki, Ermənistan rəsmilərinin bu tip hərəkəti diplomatik qalmaqal həddinə çatan əməldir. Çünki onlar bu cür davranışları ilə həm də aramızda normal diplomatik münasibətlərin olduğu Yaponiya ilə əlaqələrimizə kölgə sala bilərdilər. Bu əməl eyni zamanda Yaponiyanın da imicinə ziddir. Medianın məsələyə münasibətindən sonra Yaponiyadan kiçik təkzib reaksiyası verilib. Hesab edirəm ki, Yaponiyadan verilən reaksiya edilən əmələ adekvat deyil. Belə məsələdə Ermənistan səfirinə həmin ölkə tərəfindən etiraz notası təqdim edilməli idi. Yaponiyanın Azərbaycandakı Səfirliyinin passivliyi isə bəlkə də elə bu günlərdə baş verən yeni təyinatla bağlıdır. Artıq 2 gündür Yaponiyanı ölkəmizdə yeni səfir təmsil edir. İstənilən halda, Ermənistanın daha bir saxtakarlığı dünyaya açıldı".
Məhəmmədəli QƏRİBLİ