Aydın Mirzəzadə: "Serj Sarkisyan ancaq bir halda Azərbaycan Prezidentinə zəng edə bilər..."
Ermənistan prezidenti Serj Sarkisyan təmas xəttində hadisələrə operativ reaksiya verilməsi üçün Bakı ilə İrəvan arasında "qaynar xətt"in yaradılması təşəbbüsü ilə çıxış edib. Maraqlıdır ki, aparılan sülh danışıqlarını faktiki olaraq donduran bir prezident sərsəm təkliflər irəli sürməyə başlayıb.
Qeyd edək ki, Sarkisyanın danışıqlar masasına gəlməməsi faktını ATƏT-in Minsk Qrupunun həmsədrləri də bəyan edib. Sarkisyan sərsəm təklifinin mahiyyətini belə izah edib ki, bu alınsa, hadisələrə operativ reaksiya vermək mümkün olar.
S.Sarkisyanın sözlərinə görə, ötən əsrin 90-cı illərinin əvvəllərində belə praktika olub: "O zaman mən müdafiə naziri idim və Azərbaycanın müdafiə naziri ilə təcili əlaqə qurmaq lazım olduqda, əlaqə qururduq. Amma bu gün belə bir əlaqə yoxdur".
Sarkisyanın bu təklifinin arxasında hansı maraqlar dura bilər?
Milli Məclisin deputatı Aydın Mirzəzadə hesab edir ki, Sarkisyanın Ermənistan və Azərbaycan prezidentləri arasında "qaynar xətt"in yaradılması təklifi beynəlxalq ictimaiyyəti aldatmağa hesablanıb: "Ermənistan prezidenti S.Sarkisyan Ermənistan və Azərbaycan prezidentləri arasında "qaynar xətt"in olmasını və atəşkəs pozularkən bir-birini xəbərdar etməklə insidentin qarşısını birgə almağı təklif edib. Görünür, Sarkisyan növbəti dəfə beynəlxalq ictimaiyyəti aldatmağa çalışır. Ortada Ermənistan tərəfindən Azərbaycan torpaqlarının bir hissəsinin işğal edilməsi faktı var və Azərbaycan ərazi bütövlüyünün təmin edilməsini tələb edir. Bu torpaqlar 1991-1994-cü illərdə məhz Serj Sarkisyan Ermənistanın müdafiə naziri olarkən işğal edilib.
Sarkisyan bu "qaynar xətt"i müdafiə naziri kimi torpaqlarımızı işğal edəndə yaradaydı. Ermənistan atəşkəsin pozulmasını yox, Azərbaycanın ərazilərindən qoşunlarını çaxarmağı düşünməlidir. O yaxşı bilir ki, Azərbaycan öz torpaqlarını işğaldan azad etmək üçün bütün mümkün üsullardan, o cümlədən hərbi yoldan da istifadə etməyi həmişə gündəlikdə saxlayır. Azərbaycan Prezidenti İlham Əliyev demişkən, "erməni əsgəri ölmək istəmirsə, o rədd olub Azərbaycan torpaqlarından çıxıb getməlidir".
Serj Sarkisyan ancaq bir halda Azərbaycan Prezidentinə zəng edə bilər: öz qoşunlarını Azərbaycan ərazilərindən çıxarmağa hazır olduğunu bildirmək üçün".
Məhəmmədəli QƏRİBLİ