Ulyukayevin həbsi - rüşvət ya, neft sektoruna nəzarət uğrunda hakimiyyətdaxili savaş...
Rusiyada iqtisadi inkişaf naziri Aleksey Ulyukayev ətrafında korrupsiya skandalının pərdəarxası səbəblərilə bağlı ciddi müzakirələr gedir.
Baki-xeber.com xəbər verir ki, bazar ertəsi axşam saxlanan Ulyukayevlə yanaşı baş nazir müavini Arkadi Dvorkoviç və prezidentin köməkçisi Andrey Belousovla bağlı da operativ müşahidə aparıldığı ortaya çıxır. Bu barədə “Vedomosti” qəzeti güc qurumlarındakı mənbəyə istinadən xəbər yayıb. Mənbənin məlumatına görə, bu qalmaqalda İqtisadi İnkişaf Nazirliyi koporativ idarə departamentinin rəhbəri Oksana Tarasenko və baş nazirin birinci müavini İqor Şuvalovun köməkçisi Marina Romanovanın da adları hallanır. Belousov və Dvorkoviç məsələyə münasibət bildirməkdən imtina ediblər.
Qəzetin yazdığına görə güc qurumları Ulyukayevin komandasını çoxdan izləyirmiş və bundan prezident Vladimir Putin də xəbərdar imiş.
O da bildirilir ki, bu işlə əlaqədar yeni həbslər ola bilər və 8 vəzifəli şəxs saxlana bilər. Ancaq bu vəzifəlilərin kimliyi ilə bağlı konkret bir ad açıqlanmır.
Bununla yanaşı, Ulyukayev ətrafında baş verənləri hakimiyyət daxilində böyük güclərin toqquşması kimi dəyərləndirənlər də var. Misal üçün “Komsomolskaya Pravda” qəzeti onun həbsinin neft sektoruna nəzarət uğrunda savaşın tərkib hissəsi ola biləcəyini yazır.
Qəzet ölkənin neft sektoru uğrunda pərdə arxasında maraqlı mübarizənin getdiyini qeyd edir: "Bu hadisədə rüşvətin əsas mövzu olmadığına dair şübhələr var. Daha maraqlısı, neft sektoruna nəzarətdir... Hökumətdəki liberal blokun neft bazarında gedən proseslərin önünə qoyduqları son maneələr onların özlərini yıxır".
"Başneft hissələrini satın aldıqdan sonra “Rosneft”in 19,5 faizlik hissələrinin satışı problemi gündəmə gəldi. Sonra qızğın müzakirələr başladı: Bu hissələri kim satın alacaq? Söhbət 700 milyard rubldan gedirdi. Bu satışdan əldə ediləcək pul, 3 trilyon rubla çatan büdcə kəsirinin bir qismini qarşılamaq üçün Maliyyə Nazirliyinin ümid yeri idi. Ancaq problemlər oldu. Qərb şirkətlərinin sanksiyalar üzündən bu hissələri alması asan məsələ deyildi. Çinliləri isə neft bazarımıza soxmaq təhlükəlidir, çünki sürətlə kritik mövqeləri ələ keçirə bilərlər" – qəzet yazır.
Pərdəarxası mübarizəni şərh edən qəzet, Ulyukayev hadisəsindən sonra, 19.5 faizlik bu hissəni “Rosneft”in özünün satın almasından başqa ehtimal qalmadığını, yaşanan bu hadisələrdən sonra nə Rusiyada, nə də kənarda bunu almaq üçün risqə girəcək heç kimin olmadığını bildirir: "Mütəxəssislərin çoxuna görə, ortada adi bir rüşvət hadisəsi deyil, neft hissələrinin idarə edilməsilə əlaqədar ən yuxarıda böyük bir mübarizə var. Ulyukayev burada yalnız bir piyadadır, ya da itirmiş bir fil ola bilər".
Bütün bunlar, Ulyukayev hadisəsinin neft bazarındakı mübarizə, “Rosneft”in artan gücü, hökumət daxilində buna qarşı çıxan liberal nazirlərin müqaviməti və pərdə arxasında iqtidar daxilində qızğın mübarizənin bir parçası olduğunu göstərir.
Qeyd edək ki, Aleksey Ulyukayev bazar ertəsi axşam saxlanıb. Hakimiyyət onun “Rosneft” şirkətindən 2 milyon dollar məbləğində rüşvət alarkən yaxalandığını deyir. Amma KİV-lərin məlumatına görə pullar banka qoyulubmuş və Ulyukayevin əli o pullara heç toxunmayıb.
Məlumatlara görə o, “Başneft” in səhmlərinin sərfəli sövdələşmə ilə “Rosneft”ə satılması üçün rüşvət tələb edib. Amma keçmiş nazir ittihamı rədd edir.
Prezident Vladimir Putin noyabrın 15-də Ulyukaevi işdən azad edib və o, hazırda Minsk küçəsindəki mənzilində ev dustağıdır. Qoluna elektron bilərzik taxılan Ulyukayev gələn il yanvarın 17-dək ev dustağı olacaq. Onun səlahiyyətləri müavini Yevgeni Elinə tapşırılıb.
TAHİR
