Aqşin Əliyev: "Müqavilədəki 5 il şərti onu imzalayan ölkələr üçün vacib norma sayıla bilər, bizə yox"
Rusiya ilə Ermənistan birgə qoşun qruplaşması yaradır. Rusiya prezidenti Vladimir Putin tərəflər arasındakı müvafiq sazişi təsdiqləyən sərəncam imzalayıb. Bu barədə noyabrın 14-də prezidentin rəsmi saytı məlumat yayıb.
Rusiyanın Müdafiə Nazirliyinə, Xarici İşlər Nazirliyinin iştirakı ilə, Ermənistanla danışıqlar aparılması və sazişin Rusiyanın adından imzalanması tapşırılıb. Müqavilə uzadılmaq şərti ilə 5 illik imzalanacaq. Bununla bağlı indi Ermənistanda çox həvəsli formada belə mülahizələr irəli sürülür ki, Putin bununla Azərbaycana 5 il müharibənin olmayacağı ilə bağlı mesaj verib. Bu versiyanı nə dərəcədə real saymaq olar?
Konfliktoloq Aqşin Əliyev hesab edir ki, bu amil güc balansını pozsa da, o anlama gəlmir ki, Azərbaycan 5 il gözləməlidir: "Azərbaycanla Ermənistan arasında aprel döyüşlərinin 4 gündən çox uzanmamasının səbəbkarı Rusiya olub və Moskva yaranmış vəziyyətdən narahat olaraq hər iki tərəfi atəşkəsə yenidən riayət etməyə çağırıb. Halbuki, Azərbaycan Ordusunun daha uzun məsafələrə irəliləmək imkanları var idi. Bundan sonra belə bir təəssürat yarandı ki, hərbi toqquşmanın genişlənməsi perspektivi Rusiyanı narahat etdiyindən, Kreml Dağlıq Qarabağ münaqişəsinin həllini sürətləndirəcək. Bunun üçün ilk addım olaraq Kreml Ermənistan hakimiyyətinə təzyiq edəcək ki, İrəvan Dağlıq Qarabağ ətrafındakı bir neçə rayonu boşaltsın. Bu proqnozlar doğrulmadı. Əksinə, Rusiya hakimiyyəti iki addımı ilə Azərbaycan-Ermənistan qarşıdurmasında balansı Ermənistanın xeyrinə pozdu. Rusiya birinci addım olaraq Ermənistana "İsgəndər" raketləri göndərdi ki, hərbi balansda Ermənistan Azərbaycana məğlub olmasın. Rusiya ikinci addım olaraq Ermənistanla birgə qoşun birlikləri yaradır. Faktiki, bu o deməkdir ki, bundan sonra Ermənistan ordusuna Rusiya Müdafiə Nazirliyi nəzarət edəcək. Bu iki addım Azərbaycana qarşıdır.
Ancaq bu o demək deyil ki, Ermənistana artan hərbi dəstək fonunda Azərbaycan Rusiya ilə münasibətlərdə heç nə olmamış kimi davranmalıdır. Təbii ki, Rusiya prezidentinin məlum sazişi imzalaması Azərbaycanda narahatlığı artırır. Bu, ATƏT-in Minsk Qrupunun həmsədri olaraq Rusiyanın münaqişənin həllindəki tərəfsizliyinə kölgə salır. Azərbaycan vəziyyətdən çıxış yolu axtarmalıdır. Danışıqlar nəticə vermədiyi təqdirdə bizim öz torpaqlarımızı müharibə yolu ilə azad etmək haqqımız var. Bunu bizə kimsə qadağan edə bilməz. Müqavilədəki 5 il şərti onu imzalayan ölkələr üçün vacib norma sayıla bilər, bizə yox".
Məhəmmədəli QƏRİBLİ