Elşən Mustafayev: "Prinsipcə, situasiya AB-nin Dağlıq Qarabağla bağlı bir qədər konkret mövqe ortaya qoymasını tələb edir"
"Azərbaycan Avropa İttifaqı (Aİ) ilə yeni strateji tərəfdaşlıq sazişinin imzalanmasından qurumun Dağlıq Qarabağ münaqişəsinin nizamlanması üzrə dəqiq mövqeyinin müəyyən edilməsini gözləyir". Bunu Azərbaycan xarici işlər nazirinin müavini Mahmud Məmməd-Quliyev deyib.
Nazir müavini əlavə edib ki, bu, Azərbaycan və Aİ arasında gələcək danışıqlar çərçivəsində müzakirə olunacaq ən vacib məsələdir. Onun sözlərinə görə, strateji tərəfdaşlıq barədə Azərbaycanın təqdim etdiyi saziş layihəsində danışıqların bu məcrada aparılacağı vurğulanıb. Nazir məhz bu məsələnin rəsmi Bakı üçün vacib olduğunu deyib.
M.Məmməd-Quliyev danışıqların başlama müddətinin Aİ ilə ayrıca müzakirə olunacağını vurğulayıb.
Hazırda Azərbaycanla Aİ arasında əməkdaşlıq 1999-cu ildə qüvvəyə minmiş saziş əsasında nizamlanır.
Mahmud Məmməd-Quliyevin "Azərbaycan Avropa İttifaqı ilə yeni strateji tərəfdaşlıq sazişinin imzalanmasından qurumun Dağlıq Qarabağ münaqişəsinin nizamlanması üzrə dəqiq mövqeyinin müəyyən edilməsini gözləyir" fikrindən hansı nəticəni çıxarmaq olar?
Ekspert Elşən Mustafayev açıqlamasında bildirdi ki, Avropa İttifaqı tərəfindən Azərbaycan Respublikası ilə hərtərəfli əməkdaşlığa dair danışıqlar aparılması üçün mandatın verilməsi alqışlanmalıdır: "Uzun müddətdir Azərbaycanla qurum arasındakı münasibətlərdə soyuqluq müşahidə edildi. Bunun da səbəbləri bəllidir. Hazırda AB belə bir addım atırsa, normaldır. Ancaq təbii ki, perspektivdə nəzərdə tutulan əməkdaşlıq formatı indidən götür-qoy edilməlidir. Azərbaycan üçün ən önəmli və prioritet olan məsələ, təbii ki, Qarabağ problemidir. Rəsmi şəxsin əməkdaşlığ üçün qurumun bu məsələyə münasibətinin önəmini qabartması doğrudur. Çünki biz uzun müddət ikili standartlardan əziyyət çəkmişik. Hazırda bizim bölgədə vəziyyət bir qədər fərqlidir. Rusiya Ermənistanla birgə ordu yaratmaq haqda razılığa gəlib. Bu, faktiki olaraq, balansın pozulmasıdır və təbii ki, AB-nin maraqlarına ziddir. Bizim üçün maraqlıdır, bu faktora görə AB Azərbaycana münasibətdə fərqli mövqe sərgiləyəcəkmi? Prinsipcə, situasiya AB-nin Dağlıq Qarabağla bağlı bir qədər konkret mövqe ortaya qoymasını tələb edir. Biz də bunu gözləyirik".
Məhəmmədəli QƏRİBLİ