Dağlıq Qarabağ münaqişəsi ilə bağlı danışıqların dalana dirəndiyi bir vaxtda hərbi əməliyyatların yenidən bərpa olunma ehtimalı da artır. Azərbaycan tərəfi də açıq bildirir ki, düşmən nəticə çıxarmayacağı təqdirdə müharibənin başlanması istisna deyil.
Xatırladaq ki, bu günlərdə Prezident İlham Əliyev Füzuli rayonu ərazisində ön xətdə yerləşən komanda idarəetmə məntəqəsində əməliyyat şəraiti ilə tanış olarkən ermənilərə açıq mesajlar verib. Dövlət başçısı qeyd edib: "Biz Lələtəpə ərazisindəyik. Hələ bir neçə ay bundan əvvəl bu ərazi işğal altında idi. Biz bu işğala son qoyduq. Füzuli, Cəbrayıl və Ağdərə rayonlarının ərazilərində işğal altında olan 2000 hektardan çox torpaq uğurlu əks-hücum əməliyyatı nəticəsində işğalçılardan azad edilmişdir. Minlərlə hektar torpağa bu gün Azərbaycan ordusu tam nəzarət edir. Onu da qeyd etməliyəm ki, əks-hücum əməliyyatımız əlverişsiz mövqelərdən başlamışdır. Biz yüksəklikləri, təpələri işğalçılardan azad etmişik və böyük qəhrəmanlıq göstərmişik". Elə ermənilər özləri də etiraf edir ki, barəsində bəhs edilən yüksəkliklərin alınması Azərbaycana əlavə üstünlüklər qazandırır. Erməni politoloq Manvel Sarkisyan bu fonda vurğulayır ki, Azərbaycan ordusu indi sadəcə piyada qoşunla və sadə avtomatla Qarabağa daxil olub istədiyinə nail ola bilər. Onun sözlərinə görə, Azərbaycan ərazilərin qaytarılması üçün müharibə variantından heç vaxt imtina etməyib: "Bu, Ermənistana hər an ciddi zərbənin vurulması deməkdir. Lakin iki onillikdən artıq müddətdir ki, Ermənistan rəhbərliyi bütün uğursuzluqlarına bəraət qazandırmaq üçün "müdrikcəsinə" Azərbaycandan şikayət edir. Heç vaxt uğursuzluqlarının səbəbini özlərində axtarmırlar. Azərbaycan hər an öz çatışmazlıqlarını düzəltmək üçün durmadan işləyir, budur, onlar bunun bəhrəsini də görürlər. Ermənistan hakimiyyətinin isə nə vaxt nəticə çıxaracağı məlum deyil. Sentyabr ayında ən yaxşı texnikaları nümayiş etdirdilər, lakin məlum oldu ki, müharibə şəraitində Ermənistanın onların heç birindən istifadə etmək hüququ yoxdur. Yəni bu hərbi texnika bizdə var, amma heç nə edə bilmirik. Buna görə də Azərbaycanın önü açılıb və onlar əllərində avtomatla piyada olaraq irəliləyə bilərlər". Xatırladaq ki, bundan əvvəl Ermənistan "İsgəndər" raketlərini hərbi paradda nümayiş etdirərək bununla üstün mövqedə olduğunu göstərməyə çalışırdı. Amma erməni ekspertin etiraf etdiyi kimi, bu raketlərdən istifadə heç də Qarabağ müharibəsində mümkün deyil. Digər tərəfdən, Azərbaycanın həmin raketlərə qarşı müxtəlif vasitələr əldə etməsi də diqqətdən yayınmamalıdır. "Bloomberg" nəşri yazır ki, Ermənistan həmin raketlərdən istifadə etsə, Qarabağda Rusiyanın "İsgəndər"ləri ilə İsrailin "Dron"ları üz-üzə gələcək: "Ermənistan və Azərbaycan aprel müharibəsindən sonra öz hərbi güclərini artırmaq istiqamətində addımlar atdılar. Ermənistan Rusiyadan "İsgəndər"lər aldı, Azərbaycan isə İsraildən "Dron"ları öz hərbi arsenalına daxil edir, həmçinin Pakistandan yüksək texnologiyalı silahlar idxal etməyi düşünür". Nəşr qeyd edir ki, Azərbaycan ərazilərinin azad olunması üçün lazımi addımlar atmağa hazırdır.
Yeni mümkün müharibədə isə Ermənistanın Azərbaycana müqavimət göstərə biləcəyi inandırıcı sayılmır və bunu politoloq Manvel Sarkisyanın açıqlamalarından da görmək olar. Hərbi-siyasi məsələlər üzrə ekspert, ehtiyatda olan polkovnik Şair Ramaldanov da bildirir ki, işğal olunmuş əraziləri azad etmək üçün Azərbaycan ordusuna cəmi bir neçə kilometrlik əməliyyat keçirmək lazımdır. Onu da qısa zaman ərzində mövcud iradə, silah-sursatla etmək mümkündür. Ekspert qeyd edib ki, Azərbaycan Ermənistanla dövlət sərhədinə qədər dərinliyi çox da böyük olmayan əməliyyatlar keçirməklə işğal olunmuş əraziləri qısa müddətə tam azad edə bilər: "Mən dəfələrlə demişəm ki, biz torpaqlarımızı 10-14 günə azad etməli, ərazi bütövlüyümüzü bərpa etməliyik. Mən əminəm ki, ordumuz buna nail olacaq". Onun fikrincə, aprel döyüşləri göstərdi ki, artıq cəmiyyətimiz də buna hazırdır. İndi elə erməniləri də narahat edən əsas məqam məhz aprel hadisələrinin yenidən təkrar oluna biləcəyidir. Azərbaycan, danışıqlar nəticə verməyincə, bunu istisna etmir.
Nahid SALAYEV