Fikrət Sadıqov: "Düşünmürəm ki, bu cür alyansın yaradılmasına böyük zərurət var idi"
Məlum olduğu kimi, Rusiya prezidenti Vladimir Putin hökumətin Rusiya Federasiyası və Ermənistan arasında silahlı qüvvələrin birləşmiş qrupunun yaradılması haqda təklifini dəstəkləyib və bununla bağlı sərəncam imzalayıb. Putin Rusiya Müdafiə Nazirliyinə XİN-in iştirakı ilə Ermənistanla danışıqlar aparmağı və Rusiya Federasiyası adından sazişi imzalamağı tapşırıb.
Məlumat üçün qeyd edək ki, Rusiyanın Ermənistanla birgə qoşun qruplaşması yaradacağı barədə xəbərlər hələ ilin əvvəlində yayılmışdı. Bu, Rusiya prezidenti V.Putinin NATO ilə sərhədlərə əlavə qoşun birləşmələrinin yerləşdirilməsi barədə Müdafiə Nazirliyinə verdiyi əmrdən sonraya təsadüf edirdi. Daha sonra iyul ayında məlum oldu ki, Rusiya Silahlı Qüvvələri Baş Qərargahının nümayəndə heyəti birgə qoşun qruplaşmasının yaradılmasına dair detalları müzakirə etmək üçün İrəvana səfər edib. Ermənistan Müdafiə Nazirliyi bildirib ki, birgə qoşun qruplaşması "cənub istiqamətində" yerləşdiriləcək. Söhbət Ermənistanın Türkiyə və Naxçıvanla sərhədindən gedir.
Ancaq Rusiya Ermənistanda hərbi baza saxladığı və bu ölkə ilə vahid hava hücumundan müdafiə sistemi formalaşdırdığı, onun təhlükəsizliyini təmin etməyə dair uzunmüddətli öhdəliklər götürdüyü bir vaxtda birgə qoşun qruplaşmasının yaradılması nəyə lazım idi? Niyə məhz indi Rusiya dövlət başçısı belə bir sərəncam imzaladı? Məsələyə münasibət bildirən keçmiş diplomat, politoloq Fikrət Sadıqov bunun səbəbini bir neçə amillə əlaqələndirdi: "Bu, Rusiya ilə Qərb arasında illərdir davam edən qarşıdurmanın nəticəsidir. Rusiyanın bir sıra hərbi ekspertlərinin fikrincə, heç kimə təhlükə törətməyən bu alyans ölkənin ərazi bütövlüyünün müdafiəsinə yönəlib və Yaxın Şərqdən gələn təhlükələrin, o cümlədən postsovet respublikalarını əhatə edən NATO-nun genişlənməsinin qarşısının alınmasına hesablanıb. Görünür, Rusiyada NATO-nun genişlənməsindən və bu hərbi-siyasi bloka Gürcüstanın cəlb olunmasından ciddi narahatlıq var. Bu, Rusiya üçün ciddi təhlükə yaradır. Əlbəttə, Rusiyanın aparıcı rol oynadığı bu alyans Azərbaycana qarşı yönəlməyib, amma, istənilən halda, bu, Ermənistanın hərbi potensialını müəyyən qədər artırır. Hətta dinc dövrdə orada rəhbərliyi Rusiya tərəfi yerinə yetirsə də, bu, Azərbaycanın diqqətindən kənarda qala bilməz. Rusiyanın bizim strateji tərəfdaşımız olduğunu və ATƏT-in Minsk Qrupunda kifayət qədər nüfuzlu vasitəçi olduğunu nəzərə alsaq, düşünmürəm ki, bu cür alyansın yaradılmasına böyük zərurət var idi. Sənəddə bunun ölkələrin ərazi bütövlüyünün qorunması məqsədilə yaradılmış müdafiə ittifaqı olduğu qeyd edilir. Bu isə müəyyən mənada alyansın yaradılmasının zəruriliyini müəyyənləşdirir. İstənilən halda, Azərbaycan özgə torpaqlarını ələ keçirmək niyyətində deyil, Ermənistan ərazilərini işğal etməyə hazırlaşmır, əksinə, ermənilər indiyədək ölkəmizin 20 faizini işğal altında saxlayır. Bu alyansın yaradılması Azərbaycan Silahlı Qüvvələri üçün işğal olunmuş ərazilərin azad edilməsi məsələsində çəkindirici amil olmamalıdır. Çünki bu ərazilər beynəlxalq hüquq səviyyəsində Azərbaycan torpaqları kimi tanınır. Bölgədə hərbi-siyasi komponentlərə sahib olmasına baxmayaraq, Azərbaycanın hər zaman məqsədi öz ərazilərini azad etmək olacaq. Bunu dövlət başçısı da dəfələrlə vurğulayıb".
Vidadi ORDAHALLI