Xaqani Cəfərli: “Rusiya və İran məsələsi həll olunduqdan sonra bir çox ölkələr, banklar və şirkətlər iri miqyaslı cəzalarla üzləşəcəklər”
Nümayəndələr Palatasının Prosedur Komitəsi Rusiya əleyhinə sanksiyaların sərtləşdirilməsi ilə bağlı qanun layihəsinin təqdim edilməsini dəstəkləyib. ABŞ Nümayəndələr Palatasının Qaydalar Komitəsində Rusiyaya qarşı yeni sanksiyalar qanun layihəsinin prosedur qaydalarına dair keçirilən səsvermə 7-3 (yeddi lehinə, üç əleyhinə) nisbəti ilə nəticələnib.
“Qanun layihəsinin baxılması proseduruna qarşı bütün etirazlar ləğv edildi”, - deyə komitənin veb saytında qanun layihəsinin sonrakı baxılması ilə bağlı razılığa gəlinən iclasdan sonra dərc olunmuş qərarda bildirilir.
Buna görə də, qanun layihəsi baxılmaq üçün tam palataya təqdim ediləcək.
Prosedur Komitəsi qanun layihələrinin palatada müzakirəsi qaydalarını müəyyən etməkdən məsuldur. Xüsusilə, o onların müzakirəsi və səsverməsi üçün müddətləri, eləcə də sənədlərin qəbulu ilə bağlı digər məsələləri müəyyən edir.
Bloomberg mənbələrə istinadən Rusiya əleyhinə sanksiyalar qanun layihəsi ilə bağlı səsvermənin bu həftənin əvvəlində keçirilə biləcəyini bildirib.
Bu yay (iyulun sonu) qanun layihəsi ABŞ Senatı tərəfindən təsdiqlənib. Digər məsələlərlə yanaşı, Rusiya ilə aktiv ticarət aparan ölkələrə qarşı ikinci dərəcəli sanksiyaların tətbiqini nəzərdə tutur.
Həm Respublikaçılar, həm Demokratlar, həm də Ağ Ev tərəfindən dəstəklənən bu qanun layihəsi əvvəllər ABŞ Prezidenti Donald Trampın qəbul ediləcəyi təqdirdə tariflər tətbiq etmək üçün genişləndirilmiş səlahiyyətlər əldə edəcəyi və bunun neft qiymətlərinin daha yüksək olmasına səbəb ola biləcəyi ilə bağlı narahatlıqlar səbəbindən tənqid olunmuşdu.
ABŞ Ticarət Palatası qanun layihəsindən tariflərlə bağlı səlahiyyətlərin çıxarılmasına və bunun əvəzinə hədəflənmiş sanksiyalara, mövcud məhdudiyyətlərin yayınmasına qarşı mübarizəyə və Rusiya enerji ehtiyatlarının alıcıları ilə diplomatiyaya diqqət yetirilməsinə çağırıb.
Bu qanun qəbul olunsa o deməkdir ki, Rusiya ilə sanksiyalardan kənarda əməkdaşlıq edən, ticarət aparan ölkələrə də rüsüm tətbiq olunacaq. Yəni Rusiya ilə sanksiyalardan gizli iş görən ölkələr də cəzalanacaq.
Politoloq Xaqani Cəfərli baki-xeber.com-a bildirdi ki, mərhum senator Lindsi Qremin təşəbbüsü ilə gündəmə gələn “cəhənnəm sanksiyaları” Ukraynaya qarşı cinayətkar müharibəyə görə Rusiyaya qarşı sanksiyaların sərtləşdirilməsini, Rusiya ilə ticarət edən ölkələrə qarşı məhdudiyyət və qadağaların tətbiqini nəzərdə tutur. “Prezident Donald Trampın arzusu ilə qanun layihəsinə İranla bağlı da bəndlər əlavə edilib. Qanun layihəsinin qəbul olunması sanksiyaların dərhal tətbiqini nəzərdə tutmur və təşəbbüsü prezidentin ixtiyarına buraxır. Lakin demokratlar bildirirlər ki, noyabr seçkilərində qalib gələcəkləri halda Tramp adminstrasiyasını qanunda nəzərdə tutulan sanksiya və məhdudiyyətlərin tətbiqinə vadar edəcəklər. Rusiyanın sanksiyalardan yayınmasına yardım edən ölkələrə qarşı cəzalar da tədricən tətbiq olunacaq. Ümumiyyətlə isə, Rusiyanın Ukraynaya qarşı cinayətkar müharibəsi başlayanadan Rusiya ilə siyasi, iqtisadi, ticari və digər əlaqələrin məhdudlaşdırmasının daha doğru olacağına, müharibədən sonra Rusiya ilə münasibətlərə görə cavab vermək lazım olacağı barədə dəfələrlə fikir bildirmişəm. Hazırda Konqresin gündəmində olan qanunvericilik layihəsi haqlı olduğumu təsdiqləyir. Lakin, onu da qeyd etməliyəm ki, bu yalnız başlanğacdır. Rusiya və İran məsələsi həll olunduqdan sonra bir çox ölkələr, banklar və şirkətlər iri miqyaslı cəzalarla üzləşəcəklər”-deyə X.Cəfərli qeyd etdi.
İradə SARIYEVA
