Bəhruz Quliyev: “Ermənistan beynəlxalq tribunalarda başqa, daxildə isə tamamilə fərqli obraz nümayiş etdirir”
Ermənistan BMT Baş Assambleyasının 80-ci sessiyasının Üçüncü Komitəsinin 14 noyabr iclasında müzakirə olunan nasizmin, neonasizmin və irqi dözümsüzlüyün müasir formalarının qəhrəmanlaşdırılmasına qarşı mübarizə ilə bağlı Rusiya qətnamə layihəsinin lehinə səs verib. Rusiyanın İrəvandakı diplomatik nümayəndəliyi bildirib ki, sənədi birgə hazırladığı üçün Ermənistana minnətdardırlar.
Ümumilikdə qətnaməni 114 dövlət dəstəkləyib və onun həmmüəlliflərinin sayı 44 ölkəyə çatıb. Səfirlik vurğulayıb ki, Ermənistanın dəstəyi “Xüsusilə II Dünya müharibəsində Qələbənin 80 illiyində simvolikdir və nasizmə qarşı döyüşərək Vətəni və bəşəriyyəti xilas etmək uğrunda canlarını qurban vermiş qəhrəmanların xatirəsini gücləndirir”.
Belə paradoks olar? Qəhrəmanların xatirəsini necə gücləndirir ki, İrəvanın mərkəzində faşist Njdenin heykəli hələ də qalır?
“Həqiqi antifaşist mövqe yalnız sözlə deyil, əməllə nümayiş etdirilir”
Sözügedən məsələni “Bakı-Xəbər”ə şərh edən “SƏS” qəzetinin baş redaktoru, politoloq Bəhruz Quliyevin fikrincə, Ermənistanın BMT Baş Assambleyasının 80-ci sessiyasının Üçüncü Komitəsində nasizmin və neonasizmin qəhrəmanlaşdırılmasına qarşı mübarizəyə dair Rusiya tərəfindən irəli sürülmüş qətnamə layihəsinin lehinə səs verməsi ilk baxışdan “sülhsevər mövqe” kimi təqdim edilə bilər: “Lakin bu addımın arxasında çox ciddi bir paradoks dayanır: Nasizmə qarşı mübarizə qətnaməsini dəstəkləyən bir ölkənin paytaxtının mərkəzində nasizmlə ideoloji bağlılığı olan Qaregin Njde kimi bir fiqurun heykəli hələ də ucalır. Bu, sadəcə riyakarlıq deyil, Ermənistanın illərdir davam edən siyasi ikili standartlarının daha bir nümunəsidir. Rusiya səfirliyinin “Ermənistanın dəstəyinin II Dünya müharibəsində Qələbənin 80 illiyi ərəfəsində simvolik olması” barədə qeydi nə qədər pafoslu səslənsə də, reallıq göstərir ki, bu “simvolizm” yalnız diplomatik jestdən ibarətdir. Çünki qəhrəmanların xatirəsini gücləndirmək üçün əvvəlcə nasizmlə əməkdaşlıq edənlərin adının və abidələrinin ölkənin siyasi həyatından tam təmizlənməsi lazımdır. Əgər doğrudan da Ermənistan nasizmin qəhrəmanlaşdırılmasına qarşı çıxırsa, onda sual yaranır: o zaman İrəvanın mərkəzində nasist ideologiyasının təbliğatçısı olan Njdeyə heykəl qoymaq nəyin mesajıdır? Bu paradoksun mahiyyəti ondan ibarətdir ki, Ermənistan beynəlxalq tribunalarda başqa, daxildə isə tamamilə fərqli obraz nümayiş etdirir. Xaricdə “demokratik”, “humanist”, “anti-faşist” imici yaratmağa çalışan rəsmi İrəvan ölkə daxilində faşizmlə əməkdaşlıq etmiş şəxsləri milli qəhrəman kimi təqdim etməyə davam edir. Bu ziddiyyət təkcə tarixi yaddaşa hörmətsizlik deyil, həm də regionda sülh təşəbbüslərinə, xüsusilə də nasizmin təbliğinə qarşı beynəlxalq mübarizəyə zərbə vurur. Həqiqi antifaşist mövqe yalnız sözlə deyil, əməl ilə nümayiş etdirilir. Əgər Ermənistan dünyaya göstərmək istədiyi obrazda səmimidirsə, o zaman ilk addım olaraq Njde heykəlini sökməli və nasizmin qəhrəmanlaşdırılmasına yönəlmiş bütün ideoloji elementləri ölkə gündəmindən çıxarmalıdır. Əks halda, bu addımlar diplomatik manipulyasiya xarakteri daşıyır və cəmiyyətdə haqlı olaraq suallar yaradır. Nasizmin qəhrəmanlaşdırılmasına qarşı mübarizə aparan bir ölkə, necə olur ki, faşist ideologiyasının simvollarından birini tarixinin “şanlı səhifəsi” kimi qoruyur? Bu sualın cavabı hələ də verilməyib. Açıqlanan mövqe ilə atılan real addımlar arasında uçurum hələ də qalır və bu uçurum Ermənistanın siyasi səmimiyyətini ciddi şəkildə şübhə altına alır”.
Vidadi ORDAHALLI
