Məhərrəm Zülfüqarlı: “Bu cür fikirlər məğlub dövlətin son çırpınışları kimi dəyərləndirilməlidir”
Ermənilər hər zaman olduğu kimi, yenə də yalan, yanlış məlumat yaymaqla məşğuldur. Artsaxın Mədəni İrs üzrə Ombudsmanı Hovik Avanesov bildirib ki, azərbaycanlılar Artsax Respublikasında yerləşən İslam abidələrini dağıdır:
“Müvəqqəti işğal altında olan Artsaxda Azərbaycan hakimiyyəti ardıcıl olaraq mədəni soyqırım törətməyə davam edir. Beynəlxalq təşkilatlar əvvəllər Azərbaycanın erməni mədəni irsini mənimsəmək və məhv etmək siyasəti ilə bağlı narahatlıqlarını bildirsələr də, indi aydındır ki, hətta İslam abidələri də Bakının diktator rejiminin dağıdıcı siyasətinin qurbanı olur. Kaşatağ bölgəsinin Ayqek kəndindəki şiə məscididir ki, o, "tikinti işləri" bəhanəsi ilə tamamilə dağıdılıb”.
“Ermənistan işğalçı dövlət kimi Azərbaycan abidələrini dağıdıb, ancaq onlar bunun əksini iddia edir”
Ermənilərin növbəti uydurması ilə bağlı fikir bildirən tarix elmləri doktoru, professor Məhərrəm Zülfüqarlı “Bakı-Xəbər”ə şərhində bildirdi ki, ermənilərin tarix boyu yalan üzərində siyasət qurmasını bütün dünya bilir: “Hazırda Azərbaycan-Ermənistan münasibətləri əvvəlki illərdən fərqli olaraq müsbət istiqamətdə dəyişib. Bu cür düşmən fikirlərin irəli sürülməsinin bir sıra səbəbləri var. İlk olaraq deyim ki, bu cür ağılsız fikirlərin yayılmasında maraqlı olan sifarişçiləri var. Məlumdur ki, Qərb mərkəzləri, xüsusi fondlar mövcuddur. Onlar müəyyən təşkilatlara, şəxslərə qrant ayıraraq bu cür saxta məlumatların yayılmasını tələb edir.
Bununla yanaşı, o da bəllidir ki, Ermənistan işğalçı dövlət kimi Azərbaycan abidələrini dağıdıb. Bu danılmaz faktdır, ölkəmizə gələn xarici qonaqlar da bunu görüb, şahidi olublar. Belə bir vəziyyətdə ermənilər saxta məlumatlarla əks hücuma keçməyə cəhd göstərir. Bunun da heç bir əhəmiyyəti yoxdur. Erməni təxribatçısı Kaşatağ bölgəsinin Ayqek kəndindəki şiə məscidinin dağıdıldığını iddia edir. Ancaq bu iddia absurddur. Ermənilər bununla Azərbaycan İran münasibətlərinin korlanması, Cənubi Azərbaycanda yaşayan azərbaycanlıların və ya İranda olan digər şiə mənsublu şəxslərə təxribatçı fikir verməklə münasibətləri korlaya bilər. Ancaq onu da deyim ki, bütün dünya Azərbaycanın tolerant ölkə olduğunu bilir, ölkəmiz nəinki islam, o cümlədən xristian abidələrini də qoruyur”.
Həmsöhbətimiz onu da əlavə etdi ki, bu cür fikirlər məğlub dövlətin son çırpınışları kimi dəyərləndirilməlidir: “Son zamanlar Azərbaycanda Qərbi Azərbaycan İcmasının öz işlərini mükəmməl şəkildə qurması erməniləri ciddi şəkildə narahat edir. Ermənistanda tarixi Azərbaycan abidələrinin dağıdılmasının faktlarla göstərilməsi də onları hiddətləndirir. Öz aləmlərində guya cavab verməyə çalışırlar. Ancaq yanlışdır. Nəzərə almalıdırlar ki, Azərbaycan güclü dövlətdir, onların bu kimi çabaları əhəmiyyətsizdir”.
Günel CƏLİLOVA
