Fuad İbrahimov: “Ölkəmiz bir sıra Afrika, Asiya ölkələrinə öz PUA-larını ixrac edə biləcək”
Bu günlərdə Prezident İlham Əliyev AMEA-da etdiyi çıxışında bəyan edib ki, müasir müharibələrdə tətbiq edilən pilotsuz uçuş aparatlarının (PUA) təməlini birinci biz qoymuşuq:
“O cümlədən, pilotsuz uçuş aparatlarının tətbiqi. Müharibədə məhz birinci biz bunu tətbiq etmişik. Bu gün müasir müharibələri bunsuz təsəvvür etmək mümkün deyil. Yəni, bunun təməlini biz qoymuşuq və bu gün bu istiqamətdə Azərbaycanda çox böyük işlər görülür. Biz bu məhsulları həm xarici bazarlardan tədarük edirik, eyni zamanda, özümüz də bir çox növdən ibarət pilotsuz uçuş aparatlarını istehsal etməyə başlamışıq və bunu davam etdirəcəyik”.
Maraqlıdır, Azərbaycan istehsalı olan PUA-ların əsas satış bazarları hansı ölkələr olacaq və biz bu məhsulun ixracından təxminən nə qədər pul qazana bilərik?
“İstehsalın genişləndirilməsi həm də qeyri-neft sektorunun inkişafı baxımından mühüm əhəmiyyət kəsb edir”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimov bununla bağlı bir sıra məqamlara toxundu: “Son illər PUA-lara olan maraq sanki bir trendə çevrilib. Ancaq təəssüflər olsun ki, PUA-lar münaqişə zonalarında ən perspektivli döyüş aparma qabiliyyəti yaradan bir varlığa çevrilib. O da məlumdur ki, 5 il əvvəl 44 günlük müharibədə və şanlı Zəfərimizin qazanılmasında bu vasitələr vacib rol oynayıb. Azərbaycanın bu yeniliklərdən uğurla istifadə etməsi dünya savaş tarixində öz izini qoydu. Yəni praktiki yenilik gətirdi. Bu gün biz bunu yeri gələndə Rusiya-Ukrayna müharibəsində görürük. Biz görürük ki, hər iki tərəf 5 il əvvəl Azərbaycanın tətbiq etdiyi taktikadan geniş istifadə edir. Bütövlükdə, PUA-lar aktual və cazibədar varlığa çevrilib. Burada söhbət təkcə hərbi xarakterli vasitələrdən getmir. Azərbaycan bunun istehsalını həyata keçirməklə, aydın məsələdir ki, bu sahədə istehsalı genişləndirə bilər. Təkcə öz tələbatını ödəmək üçün yox, həm də bu məhsulları ixrac edə bilər. PUA ixracından ildə nə qədər gəlir əldə edəcəyini indidən proqnozlaşdırmaq çətindir. Çünki bu, istehsalın həcminə və keyfiyyətinə, o cümlədən rəqabət qabiliyyətinə görə dəyişəcək. Nəzərə almaq lazımdır ki, bu sahədə dünyada rəqabət güclənməkdədir. Biz elə PUA-lar istehsal etməliyik ki, bunun daha çox alıcısı olsun. Azərbaycan bir sıra Afrika, Asiya ölkələrinə öz PUA-larını ixrac edə biləcək. Bu, onlar üçün həm qiymət baxımından sərfəli olacaq, həm də digər nöqteyi-nəzərdən. Son illər PUA-lardan kənd təsərrüfatı sahəsində geniş istifadə edilir. Tarlaların dərmanlanmasında, gübrələnməsində bu vasitələrdən istifadə edilir. Ərazilərin müşahidəsi, meşə yanğınları ilə mübarizədə sözügedən vasitələrdən istifadə edilir. Bir sözlə, mülki məqsədlər üçün də bunlardan geniş istifadə edilir. Ölkəmizdə PUA istehsalının genişləndirilməsi həm də qeyri-neft sektorunun inkişafı baxımından mühüm əhəmiyyət kəsb edir. Nəzərə almaq lazımdır ki, sözügedən sahə əmək tutumludur”.
Vidadi ORDAHALLI
