Məhəmməd Əsədullazadə: “Baş verənlər Gürcüstanın beynəlxalq imicinə böyük zərbə vuracaq”
Gürcüstan vətəndaşları xaricdə parlament seçkilərində səsvermə hüquqlarından istifadə edə bilməyəcəklər. Bu barədə Gürcüstan parlamentinin sədri Şalva Papuaşvili brifinqdə bildirib.
“Gürcüstan parlamenti ölkə xaricində yaşayan respublika vətəndaşlarının seçkilərdə səs verə bilməsini qadağan edəcək yeni Seçki Məcəlləsi üzərində işləməyə başlayır”, - spiker qeyd edib.
Onun sözlərinə görə, xaricdə yaşayan Gürcüstan vətəndaşları seçkilərdə yalnız ölkəyə gələrək qeydiyyat yeri üzrə səs verməklə iştirak edə biləcəklər: “2024-cü ildə keçirilmiş parlament seçkiləri seçicilərə informasiya və siyasi təzyiqin necə açıq və sərt şəkildə ola biləcəyini yaxşı göstərdi. Bu baxımdan, qeyri-rezident vətəndaşlar, yəni xaricdə yaşayan Gürcüstan vətəndaşları üçün təzyiq risqləri artmaqdadır”.
Maraqlıdır, Gürcüstanda bu üsulun tətbiqi ölkənin beynəlxalq imicinə, beynəlxalq münasibətlərdə əlaqələrinə, ümumiyyətlə ölkənin nüfuzuna, yerinə nə kimi təsir göstərəcək? Gürcüstanın Rusiya ilə diplomatik münasibətləri yoxdur, Avropa İttifaqı, ABŞ-la qarşıdurma vəziyyətindədir. Belə bir vəziyyətdə səsvermə ilə bağlı atılan bu addım Gürcüstanın beynəlxalq münasibətlərdəki mövqeyinə necə təsir edəcək?
“İstisna deyil ki, bu gedişlə ölkəyə qarşı sanksiyalar da qəbul ediləcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı: “Gürcüstan hökumətinin son aylarda qəbul etdiyi qərarlar, təbii ki, Tbilisinin Avrointeqrasiya siyasətinə kölgə salır. Ona görə ki, Gürcüstanın 2004-cü ildə tutduğu siyasət Avropaya inteqrasiyanı özündə əks etdirir. Bununla Gürcüstan müəyyən bir siyasi yol istiqamətində addımlar atırdı. Ancaq göründüyü kimi, “Gürcü Arzusu” hökuməti həm QHT-lərlə bağlı qanunda dəyişikliklər etdi, həm də vətəndaş cəmiyyəti, müxalif partiyalarla bağlı radikal qərarlar qəbul etdi. Bütün bunlar Gürcüstan cəmiyyətində siyasi aktivliyin aşağı düşməsinə gətirib çıxartdı. Bundan başqa, belə vəziyyət Gürcüstanın Avropa ilə münasibətlərinin kəskinləşməsinə səbəb oldu. Bütün bunlar azmış kimi, indi də gürcü hökuməti xaricdə yaşayan Gürcüstan vətəndaşlarının səsvermə hüququnu məhdudlaşdırır. Hesab edirəm ki, bu, Gürcüstan vətəndaşlarının hüquqlarının pozulması deməkdir. Baş verənlər Gürcüstanın beynəlxalq imicinə böyük zərbə vuracaq. Tbilisinin Avropa İttifaqı və ABŞ-la münasibətləri daha da kəskinləşəcək. İstisna deyil ki, bu gedişlə ölkəyə qarşı sanksiyalar da qəbul ediləcək. Müəyyən səbəblərdən bu gündəmdə olmasa da, növbəti mərhələdə bunun baş verəcəyi istisna edilmir. Yəni tərəflər arasında vəziyyət bu dərəcədə gərgindir. Konkret olaraq “Gürcü Arzusu”nun qərarları Gürcüstanın 20 il əvvəl qəbul etdiyi qərarlardan uzaqlaşması deməkdir”.
Vidadi ORDAHALLI
