Tural İsmayılov: “ABŞ-ın iştirakı layihəyə beynəlxalq diqqət gətirir, amma strateji üstünlükləri Azərbaycan üçün qoruyur”
News.am-ın yaydığı məlumata görə, Ermənistan Baş naziri Nikol Paşinyan ABŞ dövlət katibinin müavini Elison Hukerin rəhbərlik etdiyi nümayəndə heyətini qəbul edərkən E.Huker qeyd edib ki, İrəvana ticarət, investisiyalar, infrastruktur, regional əlaqəlilik və təhlükəsizlik sahələrində əməkdaşlığın dərinləşdirilməsi məsələlərini müzakirə etmək üçün gəlib.
Eyni zamanda o, dövlət katibinin müavininin köməkçisi Sonata Kalterin rəhbərlik etdiyi ikitərəfli işçi qrupların fəaliyyətə başlamasını vurğulayıb. Qrupun məqsədi tarixi sammitdə qəbul edilmiş ikitərəfli razılaşmaları həyata keçirmək və “Beynəlxalq sülh və rifah naminə Tramp yolu”nu (Zəngəzur dəhlizi) inkişaf etdirməkdir. Dövlət katibinin müavini qeyd edib ki, ABŞ və Ermənistan arasındakı davamlı əməkdaşlıq, Ermənistan və Azərbaycan arasında tamhüquqlu sülh sazişi və Türkiyə ilə münasibətlərin normallaşdırılması istiqamətində əldə olunan irəliləyişlə birgə, Cənubi Qafqazın həyati əhəmiyyətli ticarət marşrutu kimi açılmasına söz verir. Görüş zamanı tərəflər baş nazir Paşinyan və prezident Tramp arasında əldə olunmuş razılaşmaların icrası, işçi qrupların fəaliyyəti, TRIPP (Zəngəzur dəhlizi-red.) layihəsinin reallaşdırılması və qarşıdakı planlarla bağlı məsələləri müzakirə ediblər”.
“İşçi qrupun uğuru ticarət və geosiyasi inteqrasiyanı sürətləndirə bilər”
Siyasi ekspert Tural İsmayılov “Bakı-Xəbər”ə bildirdi ki, ABŞ-ın işçi qrupu yaratması regionda diqqət çəkən addımdır, amma Bakı və Ankara üçün narahatlıq mənbəyi deyil. “Əksinə, bu, Zəngəzur dəhlizinin işləməsini dəstəkləyir və marşrutun praktiki icrasına xidmət edir. ABŞ-ın iştirakı layihəyə beynəlxalq diqqət gətirir, amma strateji üstünlükləri Azərbaycan üçün qoruyur. Bu, həm də regionda ticarət və nəqliyyat imkanlarını genişləndirir, Bakı üçün tranzit gəlirlərinin artırılması perspektivini açır. Ermənistan üçün iqtisadi “qapı” rolunu gücləndirə bilər. İşçi qrupun fəaliyyəti ABŞ-ın vasitəçilik rolunu gücləndirir. Layihənin iqtisadi motivləri əsasdır, nəqliyyat xərclərini azaltmaq və gəlirləri artırmaq mümkündür. İnfrastruktur və siyasi çətinliklər hələ də mövcuddur, sadəcə razılıq kifayət etmir”-deyə T.İsmaylov bildirdi.
T.İsmayılov vurğuladı ki, ABŞ-ın aktivliyi tərəfləri dialoqa təşviq edir. “Bu təşəbbüs regional normallaşmanın yeni mərhələsinə işarə edir. İşçi qrupun uğuru ticarət və geosiyasi inteqrasiyanı sürətləndirə bilər. ABŞ-ın dəstəyi prosesi sürətləndirir. Ən əsası, layihə Azərbaycan və Türkiyə üçün uzunmüddətli iqtisadi fayda və strateji möhkəmlik təmin edir. Regionda oyunçular arasında balans qorunur, lakin Azərbaycan üçün imkanlar artır. Nəticədə, ABŞ-ın iştirakı Zəngəzur dəhlizinin işləməsini təmin edən bir faktor kimi dəyərləndirilə bilər”-deyə T.İsmayılov bildirdi.
İradə SARIYEVA
