Ramil Məmmədli: “Pistoriusun bu açıqlaması daha çox silah istehsalına və ixracına hesablanıb”
“NATO ilə Rusiya arasında müharibə 2029-cu ildən əvvəl başlaya bilər”. Bunu Almaniyanın müdafiə naziri Boris Pistorius alman mətbuatına müsahibəsində bildirib.
Onun sözlərinə görə, əvvəlcə silahlı qarşıdurmanın 2029-cu ildə mümkün olacağı düşünülürdü, lakin bəzi hərbi ekspertlər bunun artıq 2028-ci ildə baş verə biləcəyini istisna etmir. “Bəzi hərbi tarixçilər hətta son dinc yay fəslini geridə qoyduğumuzu düşünürlər”, - deyə Pistorius Frankfurter Allgemeine Zeitung qəzetinə müsahibəsində qeyd edib.
Pistorius müsahibəsində onu da qeyd edib ki, Rusiya ilə potensial qarşıdurmaya hazırlaşmaq üçün NATO ölkələrinin silahlı qüvvələrinin təchizatını gücləndirmək lazımdır. Onun sözlərinə görə, hazırda alyans həm adi, həm də nüvə vasitələri daxil olmaqla, əhəmiyyətli çəkindirmə imkanlarına malikdir.
Maraqlıdır, doğrudanmı belə bir təhlükə var? Hər halda bunu rəsmi şəxs bəyan edir.
“Düşünmürəm ki, Rusiya bir neçə ildən sonra NATO ölkələrinə hücum etsin”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında bildirdi ki, Pistoriusun belə bir açıqlama ilə çıxış etməsi müəyyən məqsədlərə hesablanıb: “Əvvəla, düşünmürəm ki, Rusiya bir neçə ildən sonra NATO ölkələrinə hücum etsin. Ən azından ona görə ki, Rusiya 4 ilə yaxındır Ukraynada qanlı müharibə aparır, amma hədəflərinə hələ çata bilməyib. Müharibə Rusiyaya baha başa gəlir. Çoxlu canlı qüvvə və maddi resurslarını itirir. Hələ bunun fəsadları müharibə bitəndən sonra özünü daha qabarıq göstərəcək. Müharibədən qayıdan əsgərlər uzun illər bunun travması altında olacaq. Bu səbəbdən Rusiyada cinayətkarlıq, intihar halları və s. artacaq. Ən başlıcası isə, biz bunu Rusiyada əhali artımının daha da azalmasında görəcəyik. Təkcə ötən il Rusiya əhalisinin sayı 600 min nəfərdən çox azalıb. Hesab edirəm ki, Pistoriusun bu açıqlaması daha çox Almaniya hərbi sənayesinin daha da gücləndirilməsinə hesablanıb. Məsələ ondadır ki, 2022-ci ildə Ukraynada müharibə başlayana qədər Almaniyanın silah istehsalı ilə bağlı müəyyən məhdudiyyətlər var idi. Bu onunla əlaqədar idi ki, Hitler Almaniyasından sonra ölkənin silah istehsal etməsi Avropa üçün təhlükə hesab edilirdi. Artıq bütün bunlar ortadan qalxıb. Almaniya Avropa İttifaqında Ukraynaya ən çox yardım edən ölkədir. Ukraynanın silah təchizatında Almaniya vacib rol oynayır. Ukrayna müharibəsi həm də dünyada silahlanmanı körüklədi. Bu isə Almaniya hərbi sənayesinin ixrac imkanlarını sürətlə artırmaqdadır. Təkcə İsrailin idxal etdiyi silahların 30 faizini Almaniya təmin edib. Xüsusən də son vaxtlar bir sıra Avropa ölkələri müdafiə qabiliyyətlərini artırmaq üçün silahlanırlar. Almaniyanın silah ixracının artması həm də ölkənin iqtisadi göstəricilərinə əlavə müsbət təkan verir. Almaniya müdafiə nazirinin bu açıqlanması silahlanmanı daha da gücləndirəcək. Bu da ilk növbədə Almaniya istehsalı olan silahlara olan tələbatı artıracaq. Bu baxımdan hesab edirəm ki, Pistoriusun bu açıqlaması daha çox silah istehsalına və ixracına hesablanıb”.
Vidadi ORDAHALLI
