Azər Həsrət: “Fransada antiazərbaycan qüvvələr heç vaxt boş dayanmayıb, dayanmayacaqlar da, sadəcə...”
Beynəlxalq Ədalət Məhkəməsinin 17 noyabr 2023-cü il tarixli qərarının ildönümü münasibətilə müxtəlif ölkələrdən olan 23 parlamentarinin imzası ilə Fransanın məşhur “Le Monde” qəzetində məqalə dərc olunub. Həmin məqalədə Dağlıq Qarabağdan məcburi köçkünlərin geri qayıtması məsələsinə toxunulub.
Qeyd edilir ki, 17 noyabr 2023-cü ildə Beynəlxalq Ədalət Məhkəməsi Azərbaycana Dağlıq Qarabağdan didərgin salınmış ermənilərin təhlükəsiz, ləyaqətli və maneəsiz qayıtmasını, əmlaklarının qorunmasını və mədəni irslərinin qorunmasını dərhal təmin etməyi tapşırıb. Halbuki, bu tamamilə yalandır. Beynəlxalq Ədalət Məhkəməsi belə bir qərar verməyib. Fransa mətbuatında 23 deputatın bu məsələyə toxunması Azərbaycanın daxili işlərinə qarışmaqdan başqa bir şey deyil.
Qeyd edək ki, Fransa mətbuatı zaman-zaman Azərbaycan haqqında həqiqətə uyğun olmayan materiallar yayımlayıb.
“Bizim deputatlar bu kimi məsələlərdə fəal olmalı, Fransa mətbuatı ilə işləməli, oranın ictimai rəyindən xəbərdar olmalıdır”
Məsələ ilə bağlı fikir bildirən siyasi şərhçi Azər Həsrət “Bakı-Xəbər”ə açıqlamasında bildirdi ki, Fransada antiazərbaycan qüvvələr heç vaxt boş dayanmayıb, dayanmayacaqlar da. Sadəcə olaraq meydan boş buraxılmamalıdır: “İndi onlar bu cür məqalələr yayımlayırsa, heç bir problem yoxdur. Azərbaycan Səfirliyi başda olmaqla, Azərbaycan Parlamentinin üzvləri də bu məsələlərə reaksiya verməlidir. Bizim deputatlar bu kimi məsələlərdə fəal olmalı, Fransa mətbuatı ilə işləməli, oranın ictimai rəyindən xəbərdar olmalıdır. Bu kimi yerlər boş buraxıldıqca, yalan məlumatlarla üstümüzə gələcəklər. Fransa ictimaiyyətinin düşüncəsini dəyişmək elə də çətin deyil. Çünki Fransa əhalisinin böyük əksəriyyəti ümumiyyətlə Azərbaycanın, Ermənistanın harda yerləşdiyini belə bilmir. Onlar üçün bu coğrafiyada nə baş verdiyi heç maraqlı da deyil. Bu səbəbdən də aidiyyəti qurumlar məlum məsələdə aktiv olmalıdır”.
Günel CƏLİLOVA
