Sahil Kərimli: “Dünya mediasının, xüsusən də “Euronews”un bu məsələyə xüsusi diqqət ayırması Azərbaycanın dünyada artan nüfuzu ilə sıx bağlıdır”
“Euronews” telekanalı Özbəkistanın paytaxtı Daşkənddə keçirilmiş Mərkəzi Asiya Dövlət Başçılarının 7-ci Məşvərət Görüşü haqqında material hazırlayıb. Reportajda Azərbaycanın bu formata qoşulması qərarına xüsusi diqqət yetirilib.
“Məşvərət görüşü əlamətdar nəticə ilə başa çatdı: liderlər yekdilliklə Azərbaycanın bu formata tamhüquqlu iştirakçı kimi qoşulmasını təsdiqlədi”-deyə videomaterialda vurğulanıb.
Telekanal vurğulayıb ki, Özbəkistan, Azərbaycan, Qazaxıstan, Qırğızıstan, Tacikistan və Türkmənistan liderləri bu qərarı tarixi adlandırıblar. Dövlət başçıları qeyd ediblər ki, bu qərar Cənubi Qafqazı rəsmi olaraq Mərkəzi Asiya əməkdaşlığı çərçivəsinə daxil edir və Xəzərdən dünya bazarlarına qədər daha geniş qarşılıqlı əlaqələr məkanı üçün əsas formalaşdırır.
“Azərbaycanın iştirakı formata yeni impuls verəcək, iki strateji əhəmiyyətli region arasında ticarəti, investisiyaları, mədəni əlaqələri və razılaşdırılmış inkişafı genişləndirəcək” – deyə reportajda bildirildi.
Reportajda xüsusi diqqət Azərbaycan Prezidenti İlham Əliyevə yönəldilib. "Euronews" qeyd edib ki, İlham Əliyev Azərbaycan və Mərkəzi Asiya ölkələri arasında münasibətlərin aktiv siyasi dialoq və iqtisadi, mədəni və humanitar əməkdaşlığın artması ilə möhkəmlənən strateji tərəfdaşlığa çevrildiyini vurğulayıb: "İlham Əliyev Azərbaycanın regional əməkdaşlığın təmin edilməsində artan rolunu vurğulayaraq, iri infrastruktur layihələri, orta dəhliz boyunca tranzit daşımalarının sürətli artımı, həmçinin yeni təşəbbüsləri - Rəqəmsal İpək Yolu və Xəzər enerji layihələrini qeyd edib".
Reportajda, həmçinin, Azərbaycan liderinin Mərkəzi Asiya ölkələrinə Azərbaycanın azad edilmiş ərazilərinin bərpasında dəstəyə görə təşəkkürü də qeyd olunub.
“İlham Əliyev Azərbaycanın Mərkəzi Asiya formatına tam hüquqlu iştirakçı kimi qoşulmasını alqışlayıb və bunu əməkdaşlığı və həmrəyliyi daha da möhkəmləndirəcək tarixi addım adlandırıb” - reportajda vurğulanır.
Daşkənddəki sammit regional əməkdaşlığın daha da möhkəmləndirilməsinə yönəlmiş bir sıra əsas sənədlərin imzalanması ilə başa çatıb.
Telekanal xatırladıb ki, dövlət başçıları ümumi prioritetləri müəyyən edən birgə bəyanat qəbul ediblər, Azərbaycanın məşvərət formatına tamhüquqlu iştirakçı kimi qoşulmasını təsdiqləyiblər, həmçinin Qırğızıstanın 2027-2028-ci illər üçün BMT Təhlükəsizlik Şurasına namizədliyini dəstəkləyiblər.
“Euronews” Mərkəzi Asiya dövlət başçıları zirvəsinə və Azərbaycanın Mərkəzi Asiya üzrə Məşvərət Görüşlərinin tamhüquqlu iştirakçısı statusu almasına böyük maraq göstərdi.
Bu nə ilə izah oluna bilər?
“Azərbaycan liderinin bu tədbirdə iştirakı beynəlxalq aləmdə maraqla izlənirdi”
Siyasi ekspert Sahil Kərimli “Bakı-Xəbər”ə bildirdi ki, Mərkəzi Asiya dövlət başçılarının zirvə görüşü, əlbəttə, çox önəmli bir görüş idi. “Bu, həm sözügedən zirvə görüşündə iştirak edən ölkələr, həm də dünyanın bir çox siyasi dairələri üçün bir tədbir idi. Əlbəttə ki, dünyanın bir çox media qurumları, aparıcı kütləvi informasiya vasitələri, televiziyaları da bu zirvə görüşünü maraqla izləyirdilər. “Euronews” telekanalının bu tədbirə böyük önəm verməsi, bu tədbiri ciddi işıqlandırması da təqdirəlayiq hal kimi qiymətləndirilməlidir. Dünya mediasının, xüsusən də “Euronews”un bu məsələyə xüsusi diqqət ayırması Azərbaycanın dünyada artan nüfuzu ilə sıx bağlıdır. Azərbaycan liderinin bu tədbirdə iştirakı beynəlxalq aləmdə maraqla izlənirdi.
Ümumiyyətlə, Azərbaycanın Mərkəzi Asiya üzrə Məşvərət Görüşlərinin tamhüquqlu iştirakçısı statusu alması böyük önəm daşıyan məsələdir. Çünki Azərbaycan dövləti daim dünyaya açılır, xüsusilə qardaş və dost ölkələrlə əməkdaşlığı həm ikitərəfli, həm çoxtərəfli formatda davam etdirir. Bu baxımdan, Mərkəzi Asiya dövlət başçılarının zirvə görüşündə Azərbaycan liderinin də iştirak etməsi, dövlətimizin xüsusilə də burada tamhüquqlu iştirakçı kimi təmsil olunması Azərbaycanın Mərkəzi Asiya dövlətlərinə necə böyük önəm verməsi, bu dövlətlərlə əməkdaşlığı daha da inkişaf etdirməsi istiqamətində çox böyük addımlardan biridir”.
S.Kərimlinin sözlərinə görə, ümumiyyətlə, Azərbaycan daim dost və qardaş ölkələrlə, tərəfdaşlarla həm siyasi, həm iqtisadi, həm də digər sahələrdə əməkdaşlığa üstünlük verir. “Azərbaycanın dünyada gedən proseslərə təsir imkanları daim artır. Azərbaycana inam, etimad və etibar çox böyükdür. Azərbaycanın əvəzedilməz bir tərəfdaş olması da bu ölkələr üçün xüsusi maraq kəsb edir. Azərbaycan dünya miqyaslı nəhəng layihələrin, iqtisadi və nəqliyyat, kommunikasiya, enerji layihələrinin həm müəllifi, həm də icraçılarından biridir. Azərbaycan Cənubi Qafqazda lider ölkədir. Eyni zamanda Azərbaycan Mərkəzi Asiya dövlətləri ilə də bu cür əməkdaşlıq quraraq liderliyini daha böyük areala daşıyır, bu istiqamətdə çox ciddi addımlar atır”.
S.Kərimli qeyd etdi ki, Prezident İlham Əliyevin həyata keçirdiyi düşünülmüş, praqmatik, dünyaya açılım siyasəti, dünya dövlətləri, beynəlxalq təşkilatlarla sıx əməkdaşlığın qurulması, əlbəttə, Azərbaycanın gələcəyi, siyasi, iqtisadi müstəqilliyini möhkəmləndirmək üçün atılmış addımılardan biridir. “Bu hamımız üçün böyük fəxr və qürur hissi yaradır”-deyə S.Kərimli bildirdi.
İradə SARIYEVA
