Hüseyn İbrahimov: “Rusiya prezidenti hələ ötən il Kiriyenkonu Ermənistan üzrə kurator təyin edib”
Avropa Parlamenti Ermənistan-Azərbaycan münasibətləri ilə bağlı sənəd dərc edib. Sənəddə Qarabağdakı müharibələr, Ermənistanla Azərbaycan arasındakı münasibətlərin hazırkı vəziyyəti, Aİ-Ermənistan və Aİ-Azərbaycan ikitərəfli münasibətləri araşdırılır.
Ermənistanla Azərbaycan arasında uzunmüddətli sülh ehtimalına toxunulan sənəddə qeyd olunur ki, Baş nazir Paşinyan hökuməti Qarabağdakı məğlubiyyətindən sonra artıq xeyli siyasi kapital sərf edib.
Orada vurğulanır ki, Paşinyanın siyasi zəifliyi mart ayında keçirilən yerli seçkilərdə onun Vətəndaş Müqaviləsi Partiyasının zəif çıxışı ilə nümayiş etdirilib. Hökumətin ictimai dəstəyinin azalmasına baxmayaraq, siyasi rəqibləri hələ də geridə qalırlar. Xüsusilə də konstitusiya dəyişiklikləri şəklində olan Bakıya qarşı hər hansı bir güzəşt 2026-cı ilin iyun ayında keçiriləcək parlament seçkilərindən əvvəl Ermənistanın müxalifət partiyaları tərəfindən siyasi silah kimi istifadə olunacaq. Bu kampaniyada müxalifət partiyaları və erməni diasporları keçmiş müttəfiqləri və Ermənistanın təhlükəsizliyinin mənbəyi olan Rusiyada dəstək tapa bilərlər. Rusiya mediasının məlumatına görə, Prezident Vladimir Putin ən yaxın köməkçilərindən biri olan Sergey Kiriyenkoya Ermənistanda "Rusiyanın maraqlarını təşviq etməyi" tapşırıb.
Diqqəti çəkən məqam odur ki, Ermənistanda Konstitusiya referendumu iflasa uğrayacağı təqdirdə bunun Paşinyana çox güclü zərbə olacağı qeyd edilir. Eyni zamanda, Putinin Kiriyenkoya Rusiyanın maraqlarını orada möhkəmləndirməklə bağlı tapşırıq verməsi diqqəti cəlb edir. Bütün bunlar Ermənistanda məsələlərin nə qədər ciddi olmağından xəbər verir.
“Parlament seçkiləri yaxınlaşdıqca Paşinyana yönəlik təzyiqlər müxtəlif müstəvidə daha da artacaq”
Sözügedən məsələni “Bakı-Xəbər”ə şərh edən İdarəçilik Akademiyasının müəllimi, sosioloq Hüseyn İbrahimovun fikrincə, Qərb Ermənistanda gedən proseslərin fərqindədir: “Yaxşı bilirlər ki, Rusiya Qərbə qarşı hibrid müharibə aparır, o cümlədən, Ermənistanda onların təsir dairəsini zəiflətməyə çalışır. Rusiya prezidenti hələ ötən il Kiriyenkonu Ermənistan üzrə kurator təyin edib. Məqsəd Ermənistanda Rusiyanın zəifləyən mövqeyini gücləndirməkdir. Məsələ ondadır ki, son dövrlər Rusiyanın Ermənistanda mövqeyi əhəmiyyətli dərəcədə zəifləyib. Erməni əsilli oliqarx Samvel Karapetyanı şişirtmək cəhdləri də bir nəticə vermədi. Rusiya üçün revanşist müxalifətin zəifləməsindən sonra ən böyük zərbə erməni kilsəsinin mövqelərinin laxlaması oldu. Halbuki, 7 il əvvəl kilsə Ermənistanda əsas güc mərkəzlərindən biri idi. Ona görə də Rusiyanın media resursları sistemli şəkildə Paşinyanı və komandasını tənqid edirlər. İstisna deyil ki, Ermənistanda parlament seçkiləri yaxınlaşdıqca Paşinyana yönəlik təzyiqlər müxtəlif müstəvidə daha da artacaq. Bütün bunların fərqində olan Paşinyan manevrləri artırır. Azərbaycanla sülh gündəliyinin Ermənistanın gələcəyi üçün vacib olduğunu qabardır. Sülh sazişi və referendumu seçkidən sonrakı dövrə saxlayır. Hesab edirəm ki, avqustun 8-də Vaşinqtonda Azərbaycanla Ermənistan arasında sülh sazişi bəndlərinin paraflanması Paşinyanın mövqeyini gücləndirib. Ancaq bu, gələn il keçiriləcək seçkilərdəki qələbə üçün yetərli deyil. Fikrimcə, Qərbdən Ermənistana iqtisadi yardımlar artsa, Paşinyan Rusiyapərəst qüvvələri seçkilərdə məğlub edəcək”.
Vidadi ORDAHALLI
