Tural İsmayılov: “Ərdoğanın çağırışları sülhə və əməkdaşlığa xidmət edir”
“Zəngəzur dəhlizi təkcə Naxçıvanla Azərbaycanın qərb bölgələri arasında quru yolu deyil, həm də Türkiyəni Türk dünyası ilə birləşdirən yeni inteqrasiya marşrutudur. Bu marşrutun tezliklə açılması Cənubi Qafqazın həm nəqliyyat, həm də enerji infrastrukturunu gücləndirəcək”.
Bu sözləri Türkiyə Prezidenti Rəcəb Tayyib Ərdoğan Azərbaycana səfəri zamanı onu müşayiət edən jurnalistlərlə söhbətində deyib.
Ərdoğan vurğulayıb ki, Ankara Cənubi Qafqazı münaqişə deyil, sülh və sabitlik zonası kimi görmək istəyir. O əlavə edib: “Bölgədə davamlı sülhdən bütün tərəflər faydalanacaq. Azərbaycan ilə Ermənistan arasında sülhün artıq üfüqdə görünməsindən məmnunuq”.
Prezident Ərdoğan Türkiyənin bu prosesi yaxından izlədiyini, ona lazımi töhfə verdiyini qeyd edib. Onun sözlərinə görə, Bakı ilə İrəvan arasında sülh Türkiyə üçün də dəyərli olacaq. “Biz Ermənistanla normallaşma prosesini diqqətlə irəliyə doğru aparırıq. Buna nail olunarsa və münasibətlər normallaşarsa, razılaşmanın Türkiyə üçün faydasını görəcəyik. Buna heç bir şübhə yoxdur”, - deyə Prezident Ərdoğan bildirib.
Prezident Ərdoğan qeyd edib ki, Türkiyə qonşu İrandan da regionda əminamanlığın, sülhün və inkişafın təmin edilməsi istiqamətində addımları dəstəkləməsini gözləyir. “Mən istərdim ki, onlar qarşılıqlı fayda mühitindən yararlansınlar. Atılan hər bir addım, hər açıq qapı və dəhliz iqtisadi səmərə ilə əlaqələndirilir ki, bu da ölkələrin bir-birinə daha da yaxınlaşmasına imkan verir”, - deyə o vurğulayıb.
İran Ərdoğanın sözünə baxacaqmı?
“Bu prosesə dəstək verən hər bir ölkə gələcəkdə qazanan tərəf olacaq”
Politoloq Tural İsmayılov “Bakı-Xəbər”ə bildirdi ki, “Zəngəzur dəhlizi” regionun gələcək siyasi və iqtisadi düzənində əsas rol oynayacaq strateji layihədir: “Bu layihə yalnız Azərbaycan üçün deyil, bütün türk dünyası üçün həyati əhəmiyyət daşıyır. Dəhlizin açılması Cənubi Qafqazda sülh və əməkdaşlıq üçün yeni imkanlar yaradır. Ərdoğan bu məsələdə prinsipial və ardıcıl mövqe nümayiş etdirir. Türkiyə bölgədə sabitlik və tərəqqi üçün açar oyunçudur. Ankara təkcə sözlə yox, əməli dəstək və siyasi iradə ilə bu təşəbbüsü irəli aparır. Bütün tərəflərin maraqlarını nəzərə alan konstruktiv dialoq regionun xeyrinədir. Regional əməkdaşlıq uğur qazanmaq istəyirsə, qarşılıqlı anlayış ön planda olmalıdır. Türkiyə bu anlayışı həm siyasi, həm də tarixi məsuliyyət prizmasından dəyərləndirir”. T.İsmayılov qeyd etdi ki, “Zəngəzur dəhlizi” ilə türk dünyası daha sıx inteqrasiya imkanları əldə edəcək. Politoloqun sözlərinə görə, bu yol təkcə yük və sərnişindaşıma deyil, həm də ideya və dəyərlərin ötürülməsi olacaq: “Ankara bu istiqamətdə liderlik məsuliyyətini üzərinə götürməkdən çəkinmir. Ərdoğanın çağırışları sülhə və əməkdaşlığa xidmət edir. Regionda real güc mərkəzi axtarılırsa, Türkiyənin mövqeyi gözardı edilə bilməz. “Zəngəzur dəhlizi” həm iqtisadi, həm də siyasi mənzərəni dəyişəcək. Bu prosesə dəstək verən hər bir ölkə gələcəkdə qazanan tərəf olacaq”.
İradə SARIYEVA
