Ceyhun Məmmədov: “Regionda gərginliyin getdikcə daha da artacağı gözlənilir”
Xəbər verildiyi kimi, ABŞ Prezidenti Donald Tramp 28 May Müstəqillik Günü ilə əlaqədar Prezident İlham Əliyevə təbrik məktubu ünvanlayıb. Ekspertlər məktubun məzmunu və kontekstini nəzərə alaraq Vaşinqton-Bakı münasibətlərində yeni mərhələnin başlandığını bildirir. Tramp məktubunda Azərbaycanla ABŞ arasında münasibətləri bir neçə vacib istiqamət üzrə yüksək qiymətləndirir
Məktubda belə bir məqam var: “Biz qarşıdakı illərdə və onilliklər ərzində daha dərin tərəfdaşlığa ümid edirik”.
Maraqlıdır, Tramp Azərbaycanla tərəfdaşlığa dair yeni təşəbbüslər irəli sürənə oxşayırmı? Ümumən, ekspertlər iki ölkə arasında dərin tərəfdaşlıq perspektivlərini necə dəyərləndirir?
“O baxımdan ABŞ Azərbaycanla əlaqələrini daha da gücləndirə bilər”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, əvvəlki dövrlərdə ABŞ-la Azərbaycan arasında münasibətlər yüksək səviyyədə olub: “Hər zaman Azərbaycan iki ölkə arasında əlaqələrin inkişafına önəm verib. Azərbaycan ABŞ-ın Əfqanıstanda 2001-ci ildən başlayan fəaliyyətinə dəstək verib. 2002-ci ildə Azərbaycan sülhməramlıları Əfqanıstanda xidmət etməyə başlayıb. 2021-ci ildə Azərbaycan Əfqanıstanı sonuncu tərk edən ölkə olub. Ölkəni sonuncu tərk edən hərbi kontingent Azərbaycan kontingenti və əsgərləri olub. O üzdən, bizim münasibətimiz həmişə yüksək səviyyədə olub. Trampın birinci prezidentliyi dövründə iki ölkə arasında yaxşı əməkdaşlıq mövcud olub. Ancaq təəssüf ki, Bayden prezident olandan sonra Birləşmiş Ştatların siyasətində biz müəyyən dəyişikliklər müşahidə etməyə başladıq. Bu dəyişikliklərin mahiyyəti ondan ibarət oldu ki, Azərbaycana qarşı qərəz və ədavət özünü bütün sahələrdə göstərdi. Yəni işğalçı tərəfin Ermənistan olmasına baxmayaraq, Bayden dönəmində davamlı olaraq Azərbaycan ittiham edildi. Ölkəmizə qarşı qərəz daha geniş müstəvidə özünü göstərməyə başladı. Özü də bu, bir-iki dəfə deyil, bir neçə dəfə özünü göstərdi. Bu da təbii ki, münasibətlərin gərginləşməsinə aparıb çıxartdı. Təbii ki, Bayden administrasiyasının yanlış siyasəti nəticə etibarı ilə buna gətirib çıxarmalı idi. İndi isə yeni bir reallıq yaranıb. Hesab edirəm ki, Birləşmiş Ştatlar regiona diqqət yetirməyin vacib olduğunu anlayır. Diqqət artırılmalıdır ona görə ki, bölgədə çox ciddi proseslərin getmə ehtimalı var. Regionda gərginliyin getdikcə daha da artacağı gözlənilir. Ona görə də hazırkı dövrdə bunu Vaşinqton nəzərə almalıdır. Fikrimcə, Birləşmiş Ştatların bölgəmizdə ən yaxşı müttəfiqi ola biləcək ölkə də Azərbaycandır. Ona görə də Azərbaycanın dəstəklənməsi çox önəmlidir. Çünki ölkəmiz bu istiqamətdə səy göstərir, addımlar atır və Bakının bu prosesdə mövqeyi çox önəmlidir. Bir çox aspektlərdən xüsusi əhəmiyyət və önəm daşıyır. O baxımdan ABŞ Azərbaycanla əlaqələrini daha da gücləndirə bilər. Trampın məktubunda buna maraq sezilməkdədir. Hesab edirəm bu, ABŞ-ın dövlət marağı baxımından da xüsusi önəm və əhəmiyyət daşıyan məsələdir”.
Vidadi ORDAHALLI
