Qardaş Türkiyə parlamentinin sədri Numan Kurtulmuşun nəyin xatirinə bu boyda tarixi səhvə yol verdiyi məni çox təəccübləndirdi.
Bir daha əmin oldum ki, siyasətçilər tarixi təşviq üçün yox, kimlərisə öyrətmək üçün yox, özlərinə düzgün siyasət yolu seçmək üçün öyrənməlidirlər...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
“Məsələn, cənab Numan Kurtulmuş rəsmi bəyan edib ki, səlcuqların böyük sərkərdəsi Sultan Alparslan 1064-cü ildə Şeybanilərin və Mərvanilərin köməyi ilə Anadoluda ilk məscidi inşa edə bildi... "Bravo"...
Şeybanilər hara, Mərvanilər hara, səlcuq sultanı Alparslan hara???
Hörmətli Numan bəy, tarixə bir daha diqqətlə baxaq.
Sultan Alparslan 11-ci əsrdə yaşamış və tariximizin şərəfli türk imperiyalarının birini yaratmış şəxsiyyətdir. Həqiqətən də 1064-cü ildə Anadoluda inşa etdirdiyi ilk məscid xristian səlibçilərinin Roma papası rəhbərliyində şərqə böyük istilalara başlaması ərəfəsində oğuz türklərini islam ideologiyası altında səfərbər etməkdə müstəsna rol oynadı. Bu hadisədən cəmi 25 il sonra -1089-cu ildə Şərqə ilk səlib xristian yürüşü başladı. Xristian dininin böyük toparlayıcı gücünün qarşısında daha güclü birləşdirici amil olan islam bayrağını çıxarmaq səlcuq türk sultanlarının tarixi dəyişdirən qərarı idi... Ancaq və ancaq...
Şeybanilər və Mərvanilər 1064-cü ildə Anadoluda məscid tikintisində Sultan Alparslana necə kömək edə bilərdilər?
Şeybanilər Çingiz xanın nəvəsi Şeybani tərəfindən Buxarada yaradılmış sülalə dövləti idi və 1500-cü ildən 1599-cu ilədək mövcud oldu. Yəni Alparslandan 400 il sonra...
Mərvanilərə baxaq. Mərvanilər 661-750-ci illərdə mövcud olmuş Əməvi ərəb xilafətinin təxminən 40 illik bir dövrünü əhatə edir və Əməvi tarixində Mərvanilərin cəmi 2 xəlifəsi olub. 705-ci ildə bu iki Mərvani xəlifəsinin dövrü bitdi... Mərvanilər 400 il sonra Alparslana məscid tikintisində necə yardım edə bilərdilər?...
"Anadolunu başdan ayağa qana və zülmə qərq etmiş Şah İsmayıl Səfəvi" ifadəsi isə heç işlənməsəydi, daha yaxşı olardı..."
Tahir TAĞIYEV
