Təbriz Musayev: “Bütün bunlar Rusiyanın imperiya xislətini ortaya qoyur”
Prezident Vladimir Putin Abxaziya və Cənubi Osetiya vətəndaşlarına Rusiya vətəndaşlığını almaq üçün tələblərin yüngülləşdirilməsi haqqında sərəncam imzalayıb.
Sərəncama əsasən, Abxaziya və Cənubi Osetiya vətəndaşları və 2008-ci ildən bəri vətəndaşlığını itirməyən 18 yaşdan yuxarı şəxslər sadəcə ərizə verməklə Rusiya vətəndaşlığını ala bilərlər. Bu açıqlama Abxaziya “prezidenti” Badra Qunba və Cənubi Osetiya “prezidenti” Alan Qaqloyevin Moskvada 9 May Qələbə Günü tədbiri zamanı Putinlə görüşündən sonra verilib. Sərəncam, həmçinin, Rusiyada daimi yaşamaq tələbini, dil və tarix imtahanından keçmək zərurətini aradan qaldıraraq prosesi asanlaşdırır. Yeni qaydalara əsasən, abxazlar və cənubi osetinlər Suxumi və ya Tsxinvali, həmçinin Rusiya daxilindəki Daxili İşlər Nazirliyinin ofisinə ərizə verə bilərlər.
O da məlumdur ki, Gürcüstan hakimiyyəti Rusiya ilə münasibətləri yoluna qoymaqdan ötrü Qərblə demək olar bütün körpüləri yandırdı. Buna görə Gürcüstan Avropa İttifaqına namizəd ölkələrin siyahısından çıxarıldı. Qərb Gürcüstana verdiyi bütün qrant proqramlarını və digər yardımları dayandırdı. Tbilisi ümid edirdi ki, bütün bunların müqabilində Rusiya Gürcüstana öz ərazi bütövlüyünü təmin etməyə kömək edəcək. Bu da Putinin Tbilisiyə cavabı.
“Allah göstərməsin, Ukraynada qalib gəlsə, Gürcüstanı da ilhaq edəcək”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, bütün bunlar Rusiyanın imperiya xislətini ortaya qoyur: “Əvvəla, Rusiya üçün beynəlxalq hüquq, tərəfdaşlıq, müttəfiq dövlət anlayışı yoxdur. Rusiya üçün prioritet olan odur ki, bütün dövlətlər Moskvanın dediyini etsin, əmrlərinə tabe olsun. Bu, həmin Rusiyadır ki, 90-cı illərdə Abxaziyada, Cənubi Osetiyada separatizmi körükləyərək sözügedən bölgələri Gürcüstandan qopardı. Bütün bunlar azmış kimi, 2008-ci ildə Gürcüstana hücum edərək ölkəni viran qoydu. Rəsmən separatçı rejimlərin “müstəqilliyini” tanıdı. Məgər Rusiyanın ərazilərini böyütməyə ehtiyacı var? Əsla yox. Rusiya ərazisinə görə dünyada birincidir. Ərazilərinin də böyük hissəsi boşdur, yaşayış yoxdur. Çünki Rusiyada əhalinin sayı azdır, ərazi böyüklüyünə adekvat deyil. Sadəcə, Rusiya separatçılar vasitəsi ilə postsovet ölkələrini yenidən ilhaq etmək istəyir. Ukraynada 3 ildən çoxdur davam edən dağıdıcı müharibə, Gürcüstanda yaşananlar bunun göstəricisidir. Erməni separatçılarını, Ermənistanın ərazilərimizi işğal etməsini himayə edən Rusiya idi. Sadəcə, bir sıra səbəblərdən Azərbaycanda bunu davam etdirə bilmədi. Azərbaycan güc yolu ilə işğala son qoydu, erməni separatizminin belini qırdı. Rusiya, Allah göstərməsin, Ukraynada qalib gəlsə, Gürcüstanı da ilhaq edəcək. Digər postsovet ölkələri üçün də ciddi təhdidə çevriləcək. Ona görə də rəsmi Tbilisi nə qədər Rusiyaya doğru reverenslar etsə də, bu, abxaz separatçılarına münasibətdə nəyisə dəyişməyəcək. Çünki Rusiya yenidən imperialist mövqeyindən çıxış edir”.
Vidadi ORDAHALLI
