İbrahim Rüstəmli: “Rəsmi İrəvan bu barədə hansısa bir mövqe bildirə bilməz”
Azərbaycanla İran “Araz-2025” adlı birgə təlim keçirib. "Araz-2025" birgə təlimi işğaldan azad edilmiş ərazilərimizdə mayın 21-dək davam edib.
Ermənistan Qarabağda Azərbaycanla İranın təliminə heç bir reaksiya vermədi. Bu susqunluğun səbəbi nədir?
“Ermənistan bu təlimlərə münasibət bildirərsə özünü gülünc vəziyyətə sala bilər”
Hərbi ekspert İbrahim Rüstəmli “Bakı-Xəbər”ə bildirdi ki, Azərbaycan bölgədə və dünyada balanslaşdırılmış siyasət həyata keçirir: “Bu balanslaşdırılmış siyasətin əsas prioriteti də ondan ibarətdir ki, Azərbaycan daim sülhü dəstəkləyən və müharibə istəməyən bir dövlətdir. Belə bir şəraitdə Azərbaycan istər Rusiya, istər İranla, istərsə də elə Ermənistanın özü ilə isti münasibətlər qurmağa çalışır. Baxmayaraq ki, öz təcrübəsində adıçəkilən ölkələrdən - istər İrandan, istərsə də Rusiyadan Qarabağ məsələsinə münasibətdə heç də ürəyi istəyən yanaşmanı görməyib. Ancaq bununla belə, Azərbaycan bugünkü siyasətində çox ciddi irəliləyişlərə nail olub. Bu irəliləyişlərin əsas dinamikası da onun ən yaxın qonşuları və dünya dövlətləri ilə barış mövqeyindən münasibət qurması, öz münasibətlərini zamanın tələbləri çərçivəsində fomalaşdırmasıdır. Bilirsiz ki, bu gün İranla münasibətlərimizdə xeyli irəliləyişlər var. İran prezidentinin Azərbaycana böyük bir heyətlə səfəri, onun burda səsləndirdiyi bəyanatlar iki qardaş xalq arasında münasibətlərdə yeni eranın, yeni bir mərhələnin başlanğıcına işarədir. Təbii ki, Azərbaycan müstəqil dövlət olaraq İranla da çox ciddi əlaqələr qurub və bu əlaqələrin genişləndirilməsi ilə bağlı artıq biz böyük ürək açıqlığı ilə danışa bilərik. Əsas arqumentimiz İran prezidentinin səfəridir. Yəqin ki, Azərbaycan Prezidenti də nə vaxtsa İrana rəsmi səfər edəcək.
Bilirsiz ki, Azərbaycan Rusiya ilə də müttəfiqlik səviyyəsində əlaqələr qurub. Eyni zamanda Azərbaycan bu gün özünün tarixi düşməni olan, Azərbaycana çox böyük ziyanlar vuran, bizə münasibətdə heç vaxt nümunə ola bilməyəcək bir ölkə ilə, yəni Ermənistanla da əlaqələrinin normal istiqamətdə dinamikasına nail olmağa çalışır.
Bu gün İran hərbiçilərinin Azərbaycan hərbiçiləri ilə birlikdə azad ərazilərdə təlim keçməsi Azərbaycanın Cənubi Qafqazdakı dominantlığını, mövqeyini göstərir. Yəni Azərbaycan həqiqətən də Cənubi Qafqazın ən ciddi, sözü, əməli bütöv bir ölkəsidir”.
Azərbaycanın Cənubi Qafqazda yeni geosiyasi reallıqlar yaratmaqla özünün hansı gücə sahib olduğunu göstərdiyini deyən İ.Rüstəmlinin sözlərinə görə, bütün bunlar bizim üçün müsbətdir. “Müsbət olan məsələlərdən biri də Azərbaycanla İran arasında münasibətlərin mövcud dinamikasıdır. Azərbaycanla İranı çox ciddi milli-mənəvi tellər bağlayır. Azərbaycanla İran arasında münasibətlər o qədər sıxdır ki, heç bir ölkə ilə bunu müqayisə edə bilmirəm”.
İrəvanın Azərbaycanla İranın birgə təliminə reaksiya verməməsinə gəlincə, İ.Rüstəmli qeyd etdi ki, Ermənistanın buna haqqı yoxdur: “Ermənistan Azərbaycanla İranın birgə təliminə nə münasibət bildirə bilər. Azərbaycan müstəqil dövlətdir, müstəqil siyasət yürüdən bir dövlətdir, İran da müstəqil dövlətdir, özünün müstəqil siyasəti var. Bu baxımdan, rəsmi İrəvan bu barədə hansısa bir mövqe bildirə bilməz. Təlimlər Azərbaycanın suveren ərazisində keçirilib.
Bu təlimlər, təbii ki, dövlətlərarası razılaşdırılmış müqavilələrə və digər hüquqi sənədlərə əsasən keçirilib. Azərbaycan müstəqil dövlət kimi dünyanın 30-dan çox ölkəsi ilə bu və digər səviyyələrdə, yəni bir, iki və daha çoxtərəfli əlaqələr qurub, müqavilələr imzalayıb. Bu istiqamətdə çox ciddi təcrübə mübadiləsi aparılır, xüsusilə də hərbi sahədə. Təbii ki, belə bir vəziyyətdə Ermənistan Azərbaycanla İran arasında hərbi təlimlərin keçirilməsinə, xüsusən də bu təlimlərin azad ərazilərdə baş tutmasına nə münasibət göstərə bilər? Əlbəttə ki, heç bir münasibət göstərə, reaksiya verə bilməz. Çünki Azərbaycan Cənubi Qafqazın ən güclü, sülhə, əminamanlığa sədaqətli bir dövlətidir”.
İ.Rüstəmli qeyd etdi ki, Azərbaycan müstəqil dövlətdir və rəsmi şəkildə imzalanan müqavilələrə, rəsmi sənədlərə əsasən istənilən dövlətin hərbiçiləri ilə hərbi təlim keçirə bilər. “Ermənistan bu təlimlərə münasibət bildirərsə özünü gülünc vəziyyətə sala bilər.
Təbii ki, bu təlimin keçirilməsi çox ciddi irəliləyişdir...”-deyə İ.Rüstəmli bildirdi.
O vurğuladı ki, biz sülh istiqamətində atılan bütün addımları xalq olaraq dəstəkləyirik: “İnanıram ki, İranla Azərbaycanın birgə təlimi bölgədə sülhün, əminamanlığın inkişafına böyük töhfələr verəcək”.
İradə SARIYEVA
