Ceyhun Məmmədov: “Bu, TDT-nin nə qədər güclü, nə qədər möhkəm, nə qədər nüfuza malik olduğunu, nə qədər sistemli addımlar atdığını bir daha açıq-aydın göstərir”
Macarıstanın paytaxtı Budapeştdə Türk Dövlətləri Təşkilatının (TDT) Dövlət Başçıları Şurasının qeyri-rəsmi iclası keçirilib. Prezident İlham Əliyev də tədbirdə iştirak edib.
Qeyd edək ki, birinci Zirvə görüşü Azərbaycanın təşəbbüsü ilə keçən il Şuşa şəhərində keçirilib, Budapeştdə keçirilən qeyri-rəsmi zirvə görüşünün isə təşəbbüskarı Macarıstandır.
Avropanın mərkəzində Türk Zirvəsi dünyaya nə kimi mesajlar verir və Şuşadan sonra qeyri-rəsmi zirvənin Budapeştdə keçirilməsinin nə kimi anlamları var?
“Bu gün Avropanın mərkəzində belə bir tədbirin keçirilməsi, verilən mesajlar...”
Millət vəkili Ceyhun Məmmədov “Bakı-Xəbər”ə bildirdi ki, Macarıstanda belə bir zirvə görüşünün keçirilməsinin çox böyük önəmi var: “Bir müddət əvvəl Şuşada belə bir qeyri-rəsmi zirvə görüşü keçirildi. İndi isə artıq Macarıstanda keçirilib. Böyük və önəmli bir tarixi hadisədir, çox vacib bir mərhələnin, tədbirin şahidiyik. Yəni bu gün Avropanın mərkəzində belə bir tədbirin keçirilməsi, verilən mesajlar onu göstərir ki, türk birliyi, TDT böyük bir qüvvədir, böyük bir təşkilatdır. Bu təşkilat günü-gündən daha da güclənir, daha da möhkəmlənir, öz mövqeyini daha da gücləndirir, artırır. Bu onu göstərir ki, artıq Azərbaycan rəhbərliyinin həyata keçirdiyi uğurlu siyasət nəticəsində Azərbaycan öz məqsədlərinə və hədəflərinə nail olur. Yəni bu sıradan bir hadisə deyil, çox vacib, önəmli bir hadisədir. Azərbaycan çox önəmli, vacib bir tədbirə ev sahibliyi etdi, indi isə Macarıstan belə bir əhəmiyyətli tədbirə ev sahibliyi edir”.
C.Məmmədov qeyd etdi ki, Azərbaycan Türkiyə, Türk dünyası ilə birlikdə öz məqsədlərinə, öz hədəflərinə doğru sistemli, davamlı, ardıcıl addımlar atır və tədbirlər həyata keçirir. “Bir daha qeyd edək ki, bu, Azərbaycanın uğurlu siyasətini, addımlarının və tədbirlərinin davamlılğını, önəmini bir daha göstərir. Azərbaycan artıq Türkiyə ilə birgə bu cür tədbirləri həyata keçirən, öz gücünü, qüdrətini, qüvvəsini artıran, inkişaf edən, öz maraqlarını təmin edən bir dövlətdir. Azərbaycan öz məqsəd və hədəflərinə doğru inamla addımlayır və gələcəkdə də buna doğru addımlayacaq, bu istiqamətdə davamlı olaraq tədbirlərini həyata keçirəcək, məqsədlərinə nail olmaq üçün real işlərini görəcək.
Bu mənada Azərbaycan həqiqətən də türkdilli bir dövlət kimi nüfuzunu, mövqeyini ortaya qoymaqdadır və gücləndirməkdədir, maraqlarına doğru sürətlə, inamla addımlamaqdadır. Yəni bu, TDT-nin nə qədər güclü, nə qədər möhkəm, nə qədər nüfuza malik olduğunu, nə qədər sistemli addımlar atdığını bir daha açıq-aydın göstərir”-deyə C.Məmmədov bildirdi.
İradə SARIYEVA
