Tural İsmayılov: "Bu məsələ hüquqi və siyasi baxımdan hələ də mübahisəlidir və bəzi ölkələrdə bu addıma qarşı ehtiyatlı yanaşmalar mövcuddur"
Finlandiya Ukraynaya silah tədarük etmək məqsədlə Rusiyanın dondurulmuş aktivlərindən əldə etdiyi gəlirdən istifadə edəcək.
Finlandiya hakimiyyəti Avropa Komissiyası ilə təxmin edilən 90 milyon avro dəyərində müvafiq saziş imzalayıb. Müdafiə naziri Antti Hakkänen bildirib ki, Ukrayna Silahlı Qüvvələri üçün döyüş sursatları Finlandiya istehsalçılarından alınacaq.
O, Finlandiyanın Rusiyanın işğalına qarşı Ukraynanın müdafiəsinə sarsılmaz dəstəyini vurğulayıb və Finlandiyanın Ukraynaya 660 milyon avroluq dəstək proqramını xatırladıb. "Bu, Finlandiya müdafiə sənayesinin imkanlarının gözəl nümunəsidir və bizim silah-sursat istehsal gücünə sərmayələrimizin öz bəhrəsini verdiyini göstərir", - Hakkänen əlavə edib. Rusiya aktivlərindən əldə edilən gəlirlə bağlı Helsinkidən Ukraynaya hərbi yardımın digər təfərrüatları verilmir...
Bu, Rusiyanın aktivlərinin digər Avropa ölkələri tərəfindən də istifadəsinə "yaşıl işıq" yandıra bilərmi?
Baki-xeber.com-a açıqlamasında politoloq Tural İsmayılov bildirdi ki, Finlandiyanın Rusiyanın dondurulmuş aktivlərindən əldə etdiyi gəlirlə Ukraynaya silah tədarük etmək qərarı beynəlxalq hüquq və geopolitik kontekstdə olduqca önəmli bir hadisədir: "Bu addım Avropa İttifaqının Rusiyaya qarşı tətbiq etdiyi sanksiyaların daha da sərtləşdirilməsi və Ukraynanın müdafiə qabiliyyətinin gücləndirilməsi istiqamətində atılmış mühüm addımlardan biridir.
Finlandiyanın Avropa Komissiyası ilə imzaladığı təxminən 90 milyon avro dəyərində saziş, həmçinin Ukrayna Silahlı Qüvvələrinin döyüş sursatlarının yerli istehsalçılardan alınması ölkənin müdafiə sənayesinin inkişafına və özünütəminatına verdiyi önəmi göstərir. Bu, həmçinin Avropanın Rusiyanın işğalına qarşı vahid mövqeyini nümayiş etdirir.
Digər tərəfdən, bu təcrübə digər Avropa ölkələri üçün də nümunə ola bilər və Rusiyanın dondurulmuş aktivlərinin hərbi yardım üçün istifadəsinə “yaşıl işıq” yandırmaq potensialına malikdir. Lakin bu məsələ hüquqi və siyasi baxımdan hələ də mübahisəlidir və bəzi ölkələrdə bu addıma qarşı ehtiyatlı yanaşmalar mövcuddur.
Ümumilikdə, Finlandiyanın bu təşəbbüsü Rusiyanın işğalçılıq siyasətinə qarşı beynəlxalq həmrəyliyin gücləndirilməsi və Ukraynanın müdafiəsinin davamlı dəstəklənməsi baxımından müsbət və strateji əhəmiyyət kəsb edir. Bu həm də Rusiyaya təsir vasitələrindən biri kimi dəyərləndirilə bilər. Yəqin ki, bu presedentdən sonra digər Avropa ölkələri də analoji addımlar atacaq. Əvvəllər Rusiyanın dondurulmuş aktivlərinin müsadirə edilərək Ukraynaya əvəzsiz və kredit şəklində verilməsi müzakirə edilirdi. Lakin bu variant yəqin ki, ən məqbul seçimdir. Yəni ölkə vəsaiti dövriyyəyə cəlb edərək onu investisiya kimi yatırım edir və faiz əvəzinə Ukraynaya yardım göstərir".
Dəniz NƏSİRLİ
